మహేష్ తో పూజ చేయనుందా??

ముంబై భామ పూజా హెగ్డే తమిళ్.. తెలుగు సినిమాల్లో చాలానే ప్రయత్నాలు చేసింది. ఐదేళ్ల నుంచి బోలెడన్ని ట్రయల్స్ వేసింది. ఒక లైలా కోసం అంటూ చైతుతో.. ముకుంద అంటూ వరుణ్ తేజ్ తో చేసిన ఈ భామకు సక్సెస్ మాత్రం దరి చేరలేదు. బాలీవుడ్ లో హృతిక్ రోషన్ సరసర ఆఫర్ వస్తే.. ముంబై పరిగెట్టేసింది.

మొహెంజొదారో అంటూ పెద్ద ఫ్లాప్ ను ఖాతాలో వేసుకోవాల్సి వచ్చింది. ఐరన్ లెగ్ అనే స్టాంప్ పడిపోతున్న తరుణంలో.. లక్కీగా అల్లు అర్జున్ ముూవీ దువ్వాడ జగన్నాధం చిత్రంలో ఆఫర్ వచ్చింది. ఈ సినిమాలో అమ్మడు బాగానే ట్యాలెంట్ చూపించేసిందనే సంగతి అర్ధమవుతూనే ఉంది. అయితే.. బన్నీ మూవీతో అమ్మడి ఫేట్ మారినట్లుగానే కనిపిస్తోంది. ఎందుకంటే.. క్రేజీ ప్రాజెక్టుల్లో ఈమె పేరు తెగ వినిపించేస్తోంది. బాహుబలి2తో భారీ సక్సెస్ అందుకున్న ప్రభాస్ నెక్ట్స్ మూవీ సాహోలో.. పూజా హెగ్డేను హీరోయిన్ గా తీసుకుంటారనే టాక్ వినిపించింది.

ఇప్పుడు మహేష్ బాబు మూవీ కోసం కూడా ఈమెను అడుగుతున్నారని అంటున్నారు. ప్రస్తుతం స్పైడర్ లో నటిస్తున్న మహేష్.. ఆ తర్వాత కొరటాలతో ఓ మూవీ చేస్తాడు. ఆ తర్వాత వంశీ పైడిపల్లితో ఓ కమిట్మెంట్ ఉంది. మహేష్-వంశీ పైడిపల్లి కాంబోలో రూపొందే చిత్రంలో పూజా హెగ్డే హీరోయిన్ గా నటించే అవకాశం ఉందని తెలుస్తోంది. మొత్తం మీద.. డీజే దరువు.. పూజకు బాగానే వర్కవుట్ అయినట్లుంది.

Like Us on Facebook : https://www.facebook.com/Tupakidotcom/