వీడియో: హీరోయిన్ కూతురితో హీరో మేన‌ల్లుడి ల‌వ్ బావుందే
నంద‌మూరి బాలకృష్ణ స‌ర‌స‌న న‌టించిన ప్ర‌ముఖ క‌థానాయిక టీనేజీ కుమార్తె ఇప్పుడు హీరోయిన్ గా పరిచయం కాబోతోంది.
నంద‌మూరి బాలకృష్ణ స‌ర‌స‌న న‌టించిన ప్ర‌ముఖ క‌థానాయిక టీనేజీ కుమార్తె ఇప్పుడు హీరోయిన్ గా పరిచయం కాబోతోంది. అగ్ర క‌థానాయ‌కుడి వార‌సుడిగా టీనేజీ మేన‌ల్లుడు ఇదే సినిమాతో వెండితెర‌కు ప‌రిచ‌య‌మ‌వుతున్నాడు. ఇద్ద‌రు డెబ్యూ తార‌లను పరిచయం చేస్తున్న ఆ సినిమా టైటిల్ `ఆజాద్`. ఇందులో న‌టించిన న‌ట‌వార‌సుల పేర్లు రాషా త‌డానీ- అమన్ దేవగన్. ర‌వీనా టాండ‌న్- అజ‌య్ దేవగన్ ల న‌ట‌వార‌సులు వీళ్లు.
తాజాగా ఆజాద్ టీజర్ విడుద‌లైంది. ఇందులో అజ‌య్ దేవగన్ కీల‌క పాత్ర‌ను పోషించారు. మహారాణా ప్రతాప్ `వఫాదర్ ఘోడా ఆజాద్` ఆధారంగా రూపొందించిన ఈ చిత్రం టీజర్ ఆద్యంతం యాక్షన్ ఎలిమెంట్స్ తో ర‌క్తి క‌ట్టించింది. చారిత్రాత్మకమైన హల్దీఘాటి యుద్ధం నేపథ్యంలో సాగే యాక్షన్ చిత్ర‌మిది. 40 వేల మంది అజేయమైన ప్రత్యర్థి దళ సైన్యానికి వ్యతిరేకంగా ఎనిమిది నుండి తొమ్మిది వేల మంది పరాక్రమ సైన్యాన్ని నడిపించిన మహారాణా ప్రతాప్ క‌థ‌తో తెర‌కెక్కింది. ఈ టీజర్ లో సైన్యాన్ని గ‌మ్య స్థానాల‌కు చేర్చే గుర్రాల పాత్ర ఏమిట‌న్న‌ది అద్భుతంగా చూపించారు. మహారాణా ప్రతాప్ రెప్ప పాటులో దూసుకెళ్లే బ‌ల‌మైన గుర్రాన్ని ఏనుగులా పొడవు..నెమలి వంటి సన్నని మెడ..మెరుపులా వేగంగా...ఉండే ఆయుధంగా వ‌ర్ణించ‌డం ఆస‌క్తిని క‌లిగిస్తుంది. లోయల మీదుగా దూకగల సామర్థ్యం ఉన్న గుర్రం ఇది.
ఈ చిత్రంలో ధీరుల‌తో వారి నమ్మకమైన గుర్రాలకు ఉండే ఘాడ‌మైన అనుబంధాన్ని తెర‌పై చూపిస్తుండ‌డం విశేషం. యాక్షన్-ప్యాక్డ్ అడ్వెంచర్ చిత్ర‌మిద‌ని టీజర్ చెబుతోంది. టీజర్ లో యువ‌కుడైన అమన్ ని, అత‌డి ప్రేయ‌సి రాషా త‌డానీని కూడా పరిచయం చేసారు. అమన్- రాషా న‌డుమ ప్రేమాయ‌ణం, రొమాంటిక్ గ్లింప్స్ కి సంబంధించిన సీన్లు చూపించారు. ఇక రాషా అంద‌చందాలు టీజర్ లో అద్భుతంగా ఎలివేట్ అయ్యాయి. ఈ టీజర్‌పై అభిమానులు వేగంగా స్పందించారు. అద్భుత‌మైన టీజర్ అంటూ ఓ అభిమాని వ్యాఖ్యానించారు. ``మీ మొదటి చిత్రానికి అభినందనలు అమన్`` అని ఒకరు పేర్కొన్నారు. ఒకరు `అద్భుతంగా చూస్తున్నారు సార్ జీ` అని దేవగన్ ని పొగిడారు. ప్రేక్షకులు ఇంతకు ముందెన్నడూ చూడని విధంగా అజయ్‌ని ప్రెజెంట్ చేసే క్యారెక్టర్‌ని డెవలప్ చేసినట్లు గ‌తంలో చిత్ర‌ద‌ర్శ‌కుడు చెప్పారు. ఈ సినిమా కోసం రాషా థడానీ - అమన్ దేవగన్ ఇద్దరూ ర‌క‌ర‌కాల శిక్షణా సెషన్‌లలో పాల్గొన్నారు.
రోనీ స్క్రూవాలా - ప్రగ్యా కపూర్‌ల స‌మ‌ర్ప‌ణ‌లో ఈ చిత్రాన్ని అభిషేక్ నయ్యర్, అభిషేక్ కపూర్ సంయుక్తంగా నిర్మించారు. ఆర్‌ఎస్‌విపి, గై ఇన్ ద స్కై పిక్చర్స్ బ్యానర్‌లపై రూపొందిన ఈ చిత్రాన్ని వచ్చే జనవరిలో థియేటర్లలో విడుదల చేసేందుకు ప్లాన్ చేస్తున్నారు.