ఆ సినిమాను రీమేక్ చేయాలనుకున్నా-దిల్ రాజు

కొన్నేళ్ల కిందట తమిళ సినిమా ‘రాజా రాణి’ని తెలుగులోకి రీమేక్ చేయాలని తాను ప్రయత్నించానని దిల్ రాజు వెల్లడించాడు. కానీ కొన్ని కారణాల వల్ల ఆ ఆలోచన కార్యరూపం దాల్చలేదని.. అత్లీ తీసిన రెండో సినిమా ‘తెరి’ని తెలుగులో తనే డబ్ చేసి రిలీజ్ చేస్తుండటం చాలా సంతోషంగా ఉందని రాజు చెప్పాడు.

వచ్చే శుక్రవారమే ‘పోలీసోడు’ను తెలుగులో రిలీజ్ చేస్తున్న నేపథ్యంలో దిల్ రాజు మాట్లాడుతూ.. ‘‘అట్లీ తొలి సినిమా ‘రాజా రాణి’ నాకు బాగా నచ్చింది. తెలుగులో రీమేక్ చేయాల‌నుకున్నాను. కానీ కుద‌ర్లేదు. తొలి సినిమా అయినా ఎంతో బాగా తీశాడు అట్లీ. గత నెల ‘తెరి’ ప్రోమోస్ చెన్నైలో చూశాను. ‘రాజా రాణి’ చూసిన‌ప్పుడు ఎలా ఫీల‌య్యానో.. ఈ ప్రోమోస్ చూస్తున్న‌ప్పుడు కూడా అలాంటి ఫీలింగే కలిగింది. అందుక‌నే ఈ చిత్రాన్ని తెలుగులో డ‌బ్ చేసి రిలీజ్ చేస్తున్నాను.

కొత్త‌ద‌నం ఉంది.. ఈ చిత్రాన్ని తెలుగు ప్రేక్ష‌కుల‌కు చూపించాలి అని ఫీలైతేనే నేను అనువాదం చేయిస్తాను. గ‌తంలో శంక‌ర్ నిర్మించిన ‘వైశాలి’.. మ‌ణిర‌త్నం తెర‌కెక్కించిన ‘ఓకే బంగారం’ అలా ఫీలై తెలుగులోకి తీసుకొచ్చినవే. మ‌న‌కి ఇక్క‌డ బిగ్ స్టార్స్ ఎలాగో తమిళంలో విజయ్ అలా. ‘పోలీసోడు’తో తెలుగులోనూ విజయ్ మంచి ఫాలోయింగ్ సంపాదిస్తాడని ఆశిస్తున్నా’’ అని దిల్ రాజు అన్నాడు.