ప్రభాస్ సినిమాలో పూజాహెగ్డే అలా కనిపించనుందా...?

టాలీవుడ్ 'బుట్టబొమ్మ' పూజాహెగ్డే ప్రస్తుతం యంగ్ రెబల్ స్టార్ సరసన ఒక సినిమాలో నటిస్తున్న సంగతి తెలిసిందే. ఈ చిత్రానికి 'జిల్' ఫేమ్ రాధాకృష్ణ దర్శకత్వం వహిస్తున్నారు. ఇది ఒక పీరియాడిక్ లవ్ ఎంటర్ టైనర్ అని సమాచారం. కాగా ఈ సినిమాలో పూజాహెగ్డే పాత్రకి సంబంధించి ఒక ఆసక్తికర విషయం బయటకి వచ్చింది. ఈ సినిమాలో పూజాహెగ్డే రెండు పాత్రల్లో నటించబోతుందట. వాటిలో ఒకటి యువరాణి పాత్ర కాగా మరొకటి మోడరన్ గర్ల్ రోల్ అని సమాచారం. అయితే యువరాణి పాత్ర కోసం చిత్ర యూనిట్ ప్రత్యేక శ్రద్ధ తీసుకుంటోందట. ముఖ్యంగా పూజాహెగ్డేని యువరాణి లుక్ లో చూపించడానికి చిత్ర బృందం చాలా కేర్ తీసుకుంటున్నారట. ప్రత్యేకంగా ఆమె కోసం యువరాణి కాస్ట్యూమ్స్ డిజైన్ చూపిస్తున్నారట. కేవలం ఆమె కాస్ట్యూమ్స్ కోసమే నిర్మాతలు భారీగా ఖర్చుపెడుతున్నారట. ఈ దుస్తుల్లో పూజాహెగ్డే గతంలో కనిపించనంత అందంగా కనిపించనుందట. అయితే గత కొన్ని రోజులుగా ఈ సినిమాలో ఒక పాత్రలో పూజాహెగ్డే మ్యూజిక్ టీచర్ గా కనిపించబోతోంది అని వార్తలు వచ్చాయి. ఈ నేపథ్యంలో ఇంకో రోల్ మోడరన్ గర్ల్ లేక మ్యూజిక్ టీచర్ అనేది తెలియాల్సి ఉంది.

సున్నితమైన ప్రేమకథలా తెరక్కుతున్న ఈ మూవీలో ఎమోషన్స్ కూడా పీక్స్ లో ఉంటాయట. ప్యూర్ అండ్ సెన్సిబుల్ లవర్స్ గా కనిపించే ప్రభాస్ - పూజాహెగ్డే ల మధ్య కెమిస్ట్రీ సినిమాలో ప్రధాన ఆకర్షణగా ఉండబోతోందట. ఇంకా పేరు ఖరారు చేయని ఈ చిత్రానికి 'ఓ డియర్' - 'రాధే శ్యామ్' అనే టైటిల్స్ వినిపిస్తున్నాయి. యూవీ క్రియేషన్స్ మరియు గోపీ కృష్ణ మూవీస్‌ సంయుక్తంగా భారీ బడ్జెట్ తో నిర్మిస్తున్న ఈ సినిమాని పాన్ ఇండియాగా రూపొందిస్తున్నారని సమాచారం. ఇప్పటికే ఈ సినిమాకి సంబంధించిన కీలక సన్నివేశాలను జార్జియాలో సెట్ వేసి చిత్రీకరించి కరోనా నేపథ్యంలో ఇండియాకి తిరిగి వచ్చారు. లాక్ డౌన్ ఎత్తేసిన వెంటనే ఈ సినిమా షూటింగ్ స్టార్ట్ కాబోతోందని సమాచారం. కాగా పూజాహెగ్డే ఈ సినిమాతో పాటు అక్కినేని అఖిల్ హీరోగా నటిస్తున్న 'మోస్ట్ ఎలిజిబుల్ బ్యాచిలర్' సినిమాలో నటిస్తోంది. ఇప్పటికే చాలా భాగం షూటింగ్ జరుపుకున్న ఈ సినిమాకి బొమ్మరిల్లు భాస్కర్ దర్శకత్వం వహిస్తున్నారు.