భయానకంగా ఆది సాయికుమార్ 'జంగిల్' టీజర్..!

యువ హీరో ఆది సాయికుమార్ - వేదిక జంటగా నటిస్తున్న లేటెస్ట్ మూవీ "జంగిల్". హార‌ర్ జోనర్ లో రూపొందుతోన్న ఈ చిత్రానికి కార్తీక్ - విఘ్నేష్ ద‌ర్శ‌క‌త్వం వహిస్తున్నారు. రణవీర్ కుమార్ సమర్పణలో న్యూ ఏజ్ సినిమా మరియు ఆరా సినిమాస్ బ్యానర్స్ పై మ‌హేశ్ గోవిందరాజ్‌ - అర్చ‌నా చందా ఈ చిత్రాన్ని నిర్మిస్తున్నారు. ఇటీవలే విడుదలైన 'జంగిల్' ఫస్ట్ లుక్ సినిమాపై ఆసక్తిని కలిగించింది. 'అది శ్వాసిస్తుంది.. అది దాక్కొని ఉంటుంది.. అది వేటాడుతుంది' అనే క్యాప్ష‌న్‌ తోనే ఈ సినిమాలో ఏదో భ‌యంక‌ర‌మైన జంతువో.. దెయ్య‌మో ఉండ‌బోతుంద‌నే ఇంట్రెస్ట్ క్రియేట్ చేశారు. ఈ క్రమంలో తాజాగా 'జంగిల్' మూవీ టీజర్‌ ని చిత్ర యూనిట్ విడుదల చేసింది.

''కారకుడు ఎరైనాడు.. కన్నతల్లి కాలాంతకురాలైంది.. సురుడు శవమైనాడు.. శవాన్ని పీక్కుతిన్నవాడు గాలిలో కలిసి, దిక్కులలో వ్యాపించి, చర్మం చీల్చి, ఉసురు తీసి.. వీడు రక్కసుడు'' అనే వాయిస్ ఓవర్ తో ఉన్న ఈ టీజర్ ఆధ్యంతం ఆకట్టుకునేలా ఉంది. దీనికి జోస్ ఫ్రాంక్లిన్‌ అందించిన నేపథ్య సంగీతం భయం కలిగించేలా ఉంది. ఇక గౌత‌మ్ జార్జ్‌ అందించిన విజువల్స్ బాగున్నాయి. ఇందులో హీరో హీరోయిన్లతో పాటు ఇతర నటులు భయపడుతూ కనిపిస్తూ చూసే వారిని కూడా భయపడేలా టీజర్ కట్ చేశారు. మొత్తం మీద టీజర్ చూస్తుంటే ఆది సాయికుమార్ కి 'జంగిల్' హిట్ అందుకేనాలా కనిపిస్తోంది. ఇందులో నోయరిక‌ - ల‌ల్లు - మ‌ధుసూద‌న్ రావు - జై కుమార్ త‌దిత‌రులు నటించారు. ఇప్పటికే షూటింగ్ పూర్తి చేసుకున్న ఈ సినిమా త్వరలోనే విడుదల కానుంది.