మహర్షి ఉగాది పోస్టర్.. కేకో కేక

సూపర్ స్టార్ మహేష్ బాబు కొత్త సినిమా 'మహర్షి' కోసం మహేష్ అభిమానులు మాత్రమే కాదు సినీ ప్రేమికులందరూ ఆసక్తిగా ఎదురుచూస్తున్నారు.  ఈ సమ్మర్ సీజన్లో టాలీవుడ్ కు ఇదే బిగ్గెస్ట్ ఫిలిం కావడంతో ప్రేక్షకులతో పాటుగా ట్రేడ్ వర్గాల దృష్టి కూడా ఈ సినిమాపైనే ఉంది.  రిలీజ్ కు నెల రోజుల సమయం మాత్రమే ఉండడంతో ప్రమోషన్ కార్యక్రమాలలో జోరు పెంచుతున్నారు నిర్మాతలు.

తెలుగువారికి ఎంతో ప్రియమైన ఉగాది పండగ సందర్భంగా రేపు ఉదయం 9 గంటల 09 నిముషాలకు మహర్షి టీజర్ ను రిలీజ్ చేస్తామని ఇప్పటికే ప్రకటించారు. తాజాగా మరో టీజర్ అనౌన్స్మెంట్ పోస్టర్ ను రిలీజ్ చేస్తూ అందరికీ ఉగాది శుభాకాంక్షలు తెలిపారు. మహేష్ బాబు ఈ పోస్టర్ లో గ్రే కలర్ చెక్స్ డిజైన్ ఉన్న సూటు బూటు ధరించి.. కళ్ళకు కూలింగ్ గ్లాసెస్ తో సూపర్ స్టైలిష్ గా ఉన్నాడు.  కాలేజి కుర్రాడి గెటప్ లో ఎంత చక్కగా సెట్ అయ్యాడో..  ఒక కార్పోరేట్ స్టైల్ బిజినెస్ మాగ్నెట్ గా ఈ గెటప్ లో అంతే చక్కగా సూట్ అయ్యాడు.  నేపథ్యంలో హెలికాప్టర్.. పొడవాటి బిల్డింగ్స్ ఉన్నాయి కాబట్టి ఈ స్టిల్ అమెరికా ఎపిసోడ్ కు సంబంధించినది అయి ఉండొచ్చు.

ఈ చిత్రంలో మహేష్ బాబు సరసన పూజా హెగ్డే హీరోయిన్ గా నటిస్తోంది. అల్లరి నరేష్ ఒక కీలక పాత్రలో నటిస్తున్నాడు.  దేవీ శ్రీప్రసాద్ సంగీతం అందించాడు.  ఈ చిత్రాన్ని దిల్ రాజు - అశ్విని దత్ - ప్రసాద్ వీ పొట్లూరి సంయుక్తంగా నిర్మిస్తున్నారు. మే 9 న 'మహర్షి' రిలీజ్ కానుంది.