వివాదాస్పద దర్శకుడికి ఝలక్

పిశాచి’.. ‘డిటెక్టివ్’ లాంటి చిత్రాలతో తెలుగు ప్రేక్షకులకు కూడా చేరువైన తమిళ దర్శకుడు మిస్కిన్ కు కోలీవుడ్లో మంచి పేరే ఉంది. కానీ అతను తరచుగా వివాదాల్లో తల దూర్చుతుంటాడు. వర్ధమాన దర్శకులందరూ ఆరాధించే మణిరత్నంపై తీవ్ర విమర్శలు గుప్పించడమే కాదు.. తరచుగా ఏదో ఒక వివాదాస్పద వ్యాఖ్యలు చేసి వార్తల్లో నిలుస్తుంటాడతను. తాజాగా అతను మరో వివాదంలో చిక్కుకున్నాడు. ఒక నిర్మాత కొడుకుతో సినిమా తీస్తానని హామీ ఇచ్చి అడ్వాన్స్ కూడా తీసుకున్న అతను.. మాట తప్పి వేరొకరితో సినిమా మొదలు పెట్టి ఇబ్బందుల్లో పడ్డాడు. కోర్టు జోక్యంతో తాను చేస్తున్న సినిమాను ఆపేయాల్సిన పరిస్థితి తెచ్చుకున్నాడు. ఇంతకీ ఏం జరిగిందంటే..

2015లో నిర్మాత రఘునందన్.. తన కొడుకు మైత్రేయతో సినిమా చేయడానికి మిస్కిన్ తో ఒప్పందం కుదుర్చుకున్నాడు. మిస్కిన్ కోటి రూపాయల అడ్వాన్స్ కూడా తీసుకున్నాడు. విశాల్‌ తో ‘తుప్పరివాలన్’ (తెలుగులో డిటెక్టివ్) సినిమా పూర్తి చేసిన తర్వాత తమతో సినిమా చేస్తానని హామీ ఇచ్చాడు. ఐతే ఒప్పందాన్ని ఉల్లంఘించిన మిస్కిన్.. ప్రస్తుతం ఉదయనిధి స్టాలిన్‌తో ‘సైకో’ చిత్రాన్ని తెరకెక్కిస్తున్నాడన్నది ఆరోపణ. మైత్రేయతో తీయాల్సిన సినిమా స్క్రిప్టుతోనే ఉదయనిధితో సినిమా ప్రారంభించాడని రఘునందన్ ఆరోపిస్తున్నాడు. మిస్కిన్ తమను మోసం చేశాడనే ఆరోపణలతో రఘునందన్ మద్రాస్ హైకోర్టును ఆశ్రయించారు. దీనిపై విచారణ జరిపిన హైకోర్టు వీరి ఒప్పందాన్ని మీరి మరో సినిమా షూట్ చేయకూడదని.. రిలీజ్ చేయకూడదని హైకోర్టు ఆదేశాలు జారీ చేసింది. దీంతో ‘మిస్కిన్’ సైకో షూటింగ్‌ను నిలిపివేయాల్సి వచ్చింది. మరిప్పుడు మిస్కిన్ ఏం చేస్తాడో చూడాలి.