వారం గ్యాప్ తో వస్తున్న పంజా బ్ర‌దర్స్..!

మెగాస్టార్ చిరంజీవి మేనల్లుళ్లు సాయి తేజ్ - పంజా వైష్ణ‌వ్ తేజ్ హీరోలుగా ఇండస్ట్రీలో అడుగుపెట్టిన సంగతి తెలిసిందే. ప్రస్తుతం బ్రదర్స్ ఇద్దరూ వరుస సినిమాలతో బిజీగా ఉన్నారు. అయితే ఇప్పుడు ఇద్దరి సినిమాలు ఒకే నెలలో ఒక వారం గ్యాప్ లో థియేటర్స్ లో సందడి చేయడానికి వస్తున్నాయి.

'సోలో బ్రతుకే సో బెటర్' తర్వాత సాయి తేజ్‌ ''రిపబ్లిక్'' అనే సినిమాలో నటిస్తున్నాడు. ఈ పొలిటికల్ థ్రిల్లర్ మూవీకి దేవ కట్టా దర్శకత్వం వహిస్తున్నారు. జీ స్టూడియోస్ సమర్పణలో జె.బి.ఎంటర్టైన్మెంట్స్ బ్యాన‌ర్‌ పై జె.భగవాన్ - జె.పుల్లారావు ఈ చిత్రాన్ని నిర్మిస్తున్నారు. ఇందులో ఐఏఎస్ ఆఫీసర్ పాత్రలో తేజ్ కనిపించనున్నాడు. కరోనా కారణంగా వాయిదా పడిన ఈ మూవీని అక్టోబర్ 1న థియేట్రికల్ రిలీజ్ చేస్తున్నట్లు అధికారికంగా ప్రకటించారు.

మరోవైపు 'ఉప్పెన' చిత్రంతో డెబ్యూ హీరోగా సూపర్ హిట్ అందుకున్న పంజా వైష్ణవ్ తేజ్.. ఫస్ట్ సినిమా రిలీజ్ కాకముందే రెండో ప్రాజెక్ట్ ని సెట్స్ మీదకు తీసుకెళ్లాడు. క్రిష్ జాగర్లమూడి దర్శకత్వంలో తెరకెక్కుతున్న ఈ సినిమా షూటింగ్ అప్పుడెప్పుడో పూర్తి అయింది. ఫస్ట్ ఫ్రేమ్ ఎంటర్‌టైన్‌మెంట్స్ బ్యానర్‌ పై సాయిబాబు జాగర్లమూడి - రాజీవ్ రెడ్డి ఈ చిత్రాన్ని నిర్మిస్తున్నారు. ఇంకా టైటిల్ ఖరారు చేయని ఈ చిత్రాన్ని అక్టోబర్ 8న విడుదల చేస్తున్నట్లు మేకర్స్ ప్రకటించారు. ఈ క్రమంలో ఆగస్టు 20న టైటిల్ & ఫస్ట్ లుక్ ని రిలీజ్ చేయనున్నారు.

ఇలా అక్టోబర్ నెలలో ఓ వారం గ్యాప్ తో పంజా బ్రదర్స్ సాయి తేజ్ - వైష్ణ‌వ్ తేజ్ ఇద్దరూ తమ సినిమాలతో థియేట‌ర్స్ లో సంద‌డి చేయబోతున్నారు. మరి ఇద్దరిలో ఎవరు సక్సెస్ అందుకుంటారో చూడాలి. ఇకపోతే సాయి తేజ్.. కార్తీక్ దండు దర్శకత్వంలో ఓ మిస్టికల్ థ్రిల్లర్ లో నటిస్తున్నాడు. మరోవైపు గిరీశయ్య దర్శకత్వంలో వైష్ణవ్ తేజ్ ఓ సినిమా చేస్తున్నాడు. వీటితో పాటుగా మెగా మేనల్లుళ్ల మరికొన్ని ప్రాజెక్ట్స్ చర్చల దశలో ఉన్నాయి.