పుకార్లు నమ్మొద్దు..రవితేజ కొత్త సినిమా పక్కా: నిర్మాత

టాలీవుడ్ మాస్ మహారాజా రవితేజ తన సినీ జీవితంలో ఎన్నో హిట్స్, ప్లాపులు చూసాడు. రవితేజ టైమింగ్ పెర్ఫార్మన్స్ చూడటానికే జనాలు ఎక్కువగా ఇష్టపడతారు. లేటెస్ట్ గా రవితేజ చేసిన డిస్కో రాజా సైన్స్ ఫిక్షన్ సినిమా ఆయన కెరీర్ లోనే అతిపెద్ద డిజాస్టర్లలో ఒకటిగా నిలిచింది. ప్రస్తుతం రవితేజ చేస్తున్న క్రాక్ ఒక కాప్ డ్రామా సినిమా. ఇక ప్రస్తుతం రవితేజకి హిట్ కంపల్సరీ అనే పరిస్థితి నెలకొంది. ఈ నేపథ్యంలో మాస్ రాజా రవితేజ హీరోగా ఏ స్టూడియోస్ పతాకం పై హవీష్ ప్రొడక్షన్లో ఓ సినిమాను నిర్మించేందుకు సన్నాహాలు చేస్తున్నట్లు ప్రముఖ నిర్మాత కోనేరు సత్యనారాయణ తేల్చి చెప్పారు. ఈ సినిమాకు 'రాక్షసుడు' ఫేమ్ రమేష్ వర్మ దర్శకత్వం వహించనున్నాడు. అన్నీ వర్గాల ప్రేక్షకులను అలరించే అంశాలతో పక్కా కమర్షియల్ ఎంటర్టైనర్ గా ఈ సినిమాను రూపొందించడానికి ఏర్పాట్లు చేస్తున్నారు.

కరోనా మహమ్మారి కారణంగా గృహ నిర్బంధం అమలులోకి రావడంతో ఈ సినిమాకు సంబంధించిన పనులన్నీ ఆగిపోయాయి. లాక్ డౌన్ ముగిసి సాధారణ పరిస్థితులు నెలకొన్న వెంటనే గ్రాండ్ గా ఈ సినిమాను లాంచ్ చేస్తామని నిర్మాత కోనేరు సత్యనారాయణ తెలిపారు. ప్రస్తుతం సోషల్ మీడియాలో ఈ సినిమా గురించి వస్తున్న వదంతులను నమ్మవద్దు అని ఆయన పేర్కొన్నారు. బెల్లంకొండ శ్రీనివాస్ హీరోగా నిర్మించిన బ్లాక్ బస్టర్ మూవీ 'రాక్షసుడు' తర్వాత ఒక చక్కని స్క్రిప్ట్ తో రవితేజ, రమేష్ వర్మ కలయికలో సినిమా చేసేందుకు అన్నీ ఏర్పాట్లు చేస్తున్నామన్నారు. భారీ బడ్జెట్ తో, ఉన్నత స్థాయి సాంకేతిక విలువలతో నిర్మాణం కానున్న ఈ సినిమాకు పాపులర్ టెక్నీషియన్లు పని చేయబోతున్నారని ఆయన తెలిపారు. ఆర్టిస్టులు, టెక్నీషియన్ల వివరాలు త్వరలో వెల్లడిస్తామని నిర్మాత కోనేరు సత్యనారాయణ తెలిపారు.