టాప‌ర్ ఫిదా అయ్యే గిఫ్ట్ ఇచ్చిన వ‌ర్మ‌

వివాదాస్ప‌ద అంశాల‌తో త‌ర‌చూ వార్త‌ల్లో ఎక్కే సినీ ప్ర‌ముఖుడు ఎవ‌ర‌న్న మాట నోటి వెంట వ‌చ్చిన క్ష‌ణంలోనే రాం గోపాల్ వ‌ర్మ పేరును చెప్పేస్తుంటారు. త‌న మాట‌ల‌తో.. వ్యాఖ్య‌ల‌తో.. పోస్టుల‌తో సంచ‌ల‌నాల మీద సంచ‌ల‌నాలు సృష్టిస్తుంటారాయ‌న‌. ఎప్పుడేం మాట్లాడ‌తారో అర్థం కాని వ‌ర్మ‌ను విప‌రీతంగా అభిమానించే వారు ఎంతమంది ఉంటారో.. అంతే మంది ఆయ‌న తీరును త‌ప్పు ప‌డుతుంటారు.

ఇదిలా ఉంటే.. సివిల్స్ టాప‌ర్‌.. తెలంగాణ కుర్రాడు య‌డ‌వ‌ల్లి అక్ష‌య్ కుమార్ ఇటీవ‌ల ఒక యూట్యూబ్ ఛాన‌ల్‌ కు ప్ర‌త్యేక ఇంట‌ర్వ్యూ ఇస్తూ.. తాను ఆర్జీవీ వీరాభిమానిగా చెప్పారు. అంతేనా.. ఆయ‌న కానీ లేకుంటే త‌న లైఫే లేద‌ని చెప్పారు. ఈ విష‌యాన్ని తెలుసుకున్న వ‌ర్మ.. త‌న టాప‌ర్ అభిమాని గురించి ప్ర‌త్యేకంగా ట్విట్ట‌ర్‌ లో ప్ర‌స్తావించారు. ఇక్క‌డితో ఈ విష‌యం ఆగితే ఈ వార్తే ఉండేది కాదు.

త‌న‌ను విప‌రీతంగా అభిమానించే సివిల్స్ టాప‌ర్ ను క‌లిశారు. స‌హ‌జంగా వాళ్లు.. వీళ్లు అన్న తేడా లేకుండా వ‌ర్మ‌తో సెల్పీలు దిగేందుకు చాలామంది ఉత్సాహాన్ని ప్ర‌ద‌ర్శిస్తుంటారు. కానీ.. ఈసారి సీన్ రివ‌ర్స్ అయ్యింది. సివిల్స్ టాప‌ర్  అక్ష‌య్ తో వ‌ర్మ తానే సెల్ఫీ తీసుకొని దాన్ని ట్వీట్ చేశారు. ఈ సంద‌ర్భంగా త‌న మార్క్ మిస్ కాకుండా.. సివిల్స్ టాప‌ర్‌.. ఫెయిల్ అయిన సివిల్ ఇంజినీర్ అంటూ కామెంట్ పెట్టి మ‌రీ పోస్ట్ చేశారు.  అక్ష‌య్ ను ప్ర‌త్యేకంగా క‌లిసి.. ఆయ‌న‌తో తాను సెల్ఫీ దిగాల‌ని వ‌ర్మ స్వ‌యంగా కోర‌టంతో స‌ద‌రు సివిల్స్ టాప‌ర్ మురిసిపోయాడు. తాము విప‌రీతంగా ఆరాధించే సెల‌బ్రిటీనే స్వ‌యంగా త‌న‌కు సెల్ఫీ కావాలంటే ఎవ‌రు మాత్ర‌మ మురిసిపోరు?