ఘట్టమనేని కొత్త వారసుడు రెడీనా?

మెగా ఫ్యామిలీలో తొమ్మిది మంది దాకా హీరోలున్నారు ప్రస్తుతం. ఇంకా ఒకరిద్దరు వస్తారన్న ప్రచారం జరుగుతోంది. నందమూరి కుటుంబంలో నలుగురు హీరోలు యాక్టివ్ గా ఉన్నారు. మోక్షజ్న వచ్చే ఏడాదికి రంగంలోకి దిగే అవకాశముంది. అక్కినేని కుటుంబంలో కూడా ఐదుగురు హీరోలు ఫీల్డులో ఉన్నారు. ఐతే ఘట్టమనేని కుటుంబం నుంచి మాత్రం మహేష్ బాబు ఒక్కడే రేసులో ఉన్నాడు.

కృష్ణ ‘శ్రీ శ్రీ’ సినిమాతో పునరాగమనం చేస్తున్నప్పటికీ ఆయన యాక్టివ్ గా లేనట్లే. సుధీర్ బాబు సినిమాలు చేస్తున్నాడు కానీ.. అతను డైరెక్ట్ ఘట్టమనేని ఫ్యామిలీ కాదు. నరేష్ ఉన్నాడు కానీ.. ఆయనిప్పుడు హీరో కాదు. అతడి కొడుకు నవీన్ ఏదో సినిమా మొదలుపెట్టాడు కానీ.. దాని గురించి అతీ గతీ లేదు. మహేష్ అన్నయ్య రమేష్ బాబు ఒకప్పుడు సినిమాలు చేశాడు కానీ.. సక్సెస్ కాలేకపోయాడు. మహేష్ కొడుకు హీరో కావాలంటే ఇంకా పదేళ్లయినా పడుతుంది.

మరి అప్పటిదాకా మహేష్ ఒక్కడే హీరోగా ఘట్టమనేని వారసత్వాన్ని కొనసాగించాలా.. ఇంకెవరూ ఈ ఫ్యామిలీ నుంచి హీరోలవరా? అని అభిమానులు ఫీలవ్వనక్కర్లేదు. త్వరలోనే ఈ ఫ్యామిలీ నుంచి ఒక హ్యాండ్సమ్ హీరో తెరమీదికి వచ్చే అవకాశాలు కనిపిస్తున్నాయి. అతనెవరో కాదు.. రమేష్ బాబు కొడుకు జయకృష్ణ. నిన్న ఈ కుర్రాడికి ధోవతీ ఫంక్షన్ నిర్వహించిన సంగతి తెలిసిందే.

అందులో జయకృష్ణను చూస్తే గ్లామర్ విషయంలో మహేష్ బాబుకు ఏమాత్రం తీసిపోడనే అనిపించింది. మంచి హైట్, ఛార్మ్ రెండూ ఉన్నాయి కుర్రాడికి. ఓ మూణ్నాలుగేళ్లు పోతే అతడు హీరో అవ్వడం ఖాయమని అంటున్నారు. రమేష్ బాబుకి కూడా ఆ ఆలోచన ఉందట. ప్రస్తుతానికి చదువు మీదే దృష్టిపెట్టాడు జయకృష్ణ. ఐతే కొన్నేళ్ల తర్వాత అతను హీరో అవ్వడం మాత్రం గ్యారెంటీ అనే అంటున్నారంతా.