శంకర్-రజినీ భలే చెప్పారు గ్రీటింగ్స్

క్రియేటివిటీకి కేరాఫ్ అడ్రస్ డైరెక్టర్ శంకర్. తన ప్రతి సినిమాలోనూ ఏదో ఒక కొత్తదనం చూపించాలని ప్రయత్నిస్తుంటాడీ విలక్షణ దర్శకుడు. ‘రోబో-2’తో ఇండియన్ సినిమాకు పరిచయం లేని ఎన్నో విశేషాల్ని పరిచయం చేశాడు. మన సినిమా స్థాయిని ఎక్కడికో తీసుకెళ్లాడు. ఇప్పుడిక ‘రోబో-2’ భారతీయ సినిమాను మరో మెట్టు ఎక్కించే ప్రయత్నంలో ఉన్నాడు శంకర్. మొదలవకముందే విపరీతమైన చర్చకు దారితీసిన ఈ సినిమా.. రెండు వారాల కిందటే లాంఛనంగా మొదలైంది. ఐతే ఏదో మొక్కుబడిగా ప్రారంభోత్సవం చేసి ఊరుకోకుండా వెంటనే రంగంలోకి దిగిపోయాడు శంకర్.

రెండు వారాల తొలి షెడ్యూల్లో కొన్ని కీలక సన్నివేశాలు తెరకెక్కించాడు. కొన్ని రోజుల విరామానంతరం మళ్లీ రెండో షెడ్యూల్ మొదలు కాబోతోంది. ఈ లోపు రజినీ అభిమానుల కోసం, తన ఫ్యాన్స్ కోసం ఓ కొత్త సంవత్సర కానుక ఇచ్చాడు శంకర్. రోబో-2 సెట్స్ లో రజినీతో తాను కలిసి సీరియస్ గా ఉన్న ఓ ఫొటోను ట్టిట్టర్లో పెట్టాడు. అంతే కాదు.. తనదైన శైలిలో నూతన సంవత్సర శుభాకాంక్షలు చెప్పాడు శంకర్. రోబో-2కు అసలు టైటిల్ ‘2.0’ అన్న సంగతి తెలిసిందే. ఈ టైటిల్ కలిసొచ్చేలా.. హ్యాపీ న్యూ ఇయర్ ‘2.0’16 అని విష్ పెట్టి తన ప్రత్యేకత చాటుకున్నాడు శంకర్.