అఖిల్ వ‌ర్సెస్ సూరి.. అస‌లేం జ‌రుగుతోంది?

న‌ట‌వార‌సుల‌తో ప‌ని చేయ‌డం అంటేనే బిగ్ ఛాలెంజ్. ష్యూర్ షాట్ గా హిట్ ఇవ్వాల‌న్న కండీష‌న్ ఉంటుంది. దానికి త‌గ్గ‌ట్టు స్క్రిప్టు ప‌ని మొద‌లు ప్ర‌తిదీ చాలా అలెర్ట్ గా ఉండాలి. ముఖ్యంగా క‌థా చ‌ర్చ‌ల కోస‌మే చాలా ఎక్కువ స‌మ‌యం కేటాయించి ఆరంభ‌మే ఎలాంటి స‌మ‌స్యా లేకుండా జాగ్ర‌త్త‌ప‌డాలి. బౌండ్ స్క్రిప్ట్ వంద శాతం ది బెస్ట్ గా కుదిరింది అన్న‌ప్పుడే చిత్రీక‌ర‌ణ‌కు వెళ్లాల్సి ఉంటుంది.

స‌రిగ్గా ఇలాంటి స‌న్నివేశ‌మే అఖిల్ - సురేంద‌ర్ రెడ్డి మూవీ ప్రారంభానికి అడ్డంకిగా మారింద‌న్న గుస‌గుస‌లు ఫిలింన‌గ‌ర్ లో వినిపిస్తున్నాయి. సురేంద‌ర్ రెడ్డి స్క్రిప్టు ద‌శ‌లోనే 200 శాతం ప‌క్కాగా ఉండాల‌ని ప‌ని చేస్తున్నార‌ట‌. ఇప్ప‌టికే ప‌లుమార్లు స్క్రిప్టుకు తుది మెరుగులు దిద్దారు. వ‌క్కంతం వంశీ(క‌థ ఆయ‌న‌దే)తో క‌లిసి స్క్రిప్టులో అవ‌స‌రం మేర మార్పులు చేర్పులు చేశారు.

ఇందులో అఖిల్ బాడీ లాంగ్వేజ్ కి త‌గ్గ‌ట్టు రొమాన్స్.. యాక్ష‌న్.. ఉండాల‌ని దానికోసం ప్ర‌త్యేకించి గ్రౌండ్ వ‌ర్క్ చేశార‌ట‌. ఇక రేసుగుర్రం రేంజులో మాస్ ఎలిమెంట్స్ కామెడీని వ‌ర్క‌వుట్ చేసేందుకు చాలానే స‌న్నివేశాల్ని రెడీ చేశార‌ట‌. ఓవ‌రాల్ గా స్క్రిప్టు ఫైన‌ల్ డ్రాఫ్ట్ రెడీ అవుతోంది.

ఈలోగానే బొమ్మ‌రిల్లు భాస్క‌ర్ తో `మోస్ట్ ఎలిజిబుల్ బ్యాచిల‌ర్` చిత్రీక‌ర‌ణ పూర్త‌వుతోంది. ఈ నెలాఖ‌రు నాటికి  ఈ మూవీ  చిత్రీక‌ర‌ణ‌ను ముగించి అఖిల్ ఫ్రీ అవుతాడ‌ట‌. త‌దుప‌రి పూర్తిగా సురేంద‌ర్ రెడ్డి తో జాయిన్ అవుతాడు. మొత్తంగా స్క్రిప్టులో తుదిమెరుగుల‌కు ఎక్కువ స‌మ‌యం కేటాయించ‌డం వ‌ల్ల‌నే అఖిల్-సూరి షూటింగ్ ఆలస్యం అవుతోందట‌. `మోస్ట్ ఎలిజిబుల్ బ్యాచిల‌ర్` చిత్రాన్ని వేస‌విలో రిలీజ్ చేయ‌నున్నారు.