సూర్య-విక్రమ్.. అప్పుడలా ఇప్పుడిలా

ఒక పుష్కరం వెనక్కి వెళ్తే.. తమిళ స్టార్ హీరో విక్రమ్‌ కు అప్పటికి తెలుగులోనూ సూపర్ ఫాలోయింగ్ ఉండేది. ‘అపరిచితుడు’ సినిమాతో అతను తెలుగులో తిరుగులేని ఆదరణ సంపాదించుకున్నాడు. అప్పుడే ‘శివపుత్రుడు’ కూడా విడుదలైంది. అది కూడా సంచలన విజయం సాధించింది. ఆ చిత్రంలో విక్రమ్ లీడ్ రోల్ చేస్తే.. సూర్య సహాయ పాత్రలో కనిపించాడు. అతడిని మన జనాలు పెద్దగా పట్టించుకోలేదప్పుడు. ఆ సినిమా హిట్టయ్యాక కూడా సూర్య పేరు జనాల్లో రిజిస్టర్ కాలేదు. కానీ ఏడాది తర్వాత ‘గజిని’ అనే సినిమా విడుదలై సెన్సేషనల్ హిట్ కావడంతో సూర్య కెరీర్ మలుపు తిరిగింది. ఆ సినిమాతో వచ్చిన గుర్తింపును సరిగ్గా ఉపయోగించుకున్నాడు. తెలుగు హీరోలతో సమానంగా ఇక్కడ ఆదరణ సంపాదించుకున్నాడు.

అప్పుడప్పుడూ కొన్ని ఒడుదొడుకులు ఎదురైనా సరే.. తెలుగులో సూర్యకు ఉన్న ఫాలోయింగే వేరు. రజినీకాంత్, కమల్ హాసన్‌ ల తర్వాత తెలుగులో ఎక్కువ ఫాలోయింగ్ సంపాదించుకున్న తమిళ కథానాయకుడు సూర్యనే. అతడిని మన హీరోలాగే చూస్తారు మన ప్రేక్షకులు. ఈ సంక్రాంతికి ‘అజ్ఞాతవాసి’.. ‘జై సింహా’ లాంటి భారీ సినిమాలతో నేరుగా ఢీకొట్టేంత సత్తా సూర్య సినిమాకు వచ్చిందంటే చిన్న విషయం కాదు. ఈ సినిమాకు మంచి క్రేజ్ కూడా వచ్చింది. మరోవైపు సంక్రాంతికే తమిళంలో విక్రమ్ సినిమా ‘స్కెచ్’ కూడా రిలీజవుతోంది. కానీ ఆ చిత్రాన్ని తెలుగులో నేరుగా రిలీజ్ చేసే పరిస్థితి లేదు. తమన్నా కథానాయిక అయినప్పటికీ ఆ సినిమాపై ఇక్కడ పెద్దగా ఆసక్తి లేదు. కొంచెం లేటుగా అయినా ఈ సినిమాను రిలీజ్ చేసినప్పుడు పట్టించుకుంటారో లేదో తెలియదు. ఇందుకు గత దశాబ్ద కాలంలో విక్రమ్ మార్కెట్ అంతకంతకూ పడిపోతూ వచ్చి.. ఇక్కడ అతడి బేసే లేకుండా పోవడమే. ఒకప్పుడు తెలుగులో విక్రమ్-సూర్యల పరిస్థితి ఎలా ఉండేదో.. దానికి పూర్తి భిన్నంగా ఇప్పుడుండటం విశేషం.