సెంటిమెంట్ల‌ను ఫాలో అవుతున్న సెల‌బ్రిటీలు

ఇదో ఆస‌క్తిక‌ర కోణంగా చెప్పాలి. సంచ‌ల‌నంగా మారిన డ్ర‌గ్స్ విచార‌ణ కేసుకు సంబంధించి నోటీసులు అందుకున్న సినీ సెల‌బ్రిటీల‌కు సంబంధించిన ఒక కొత్త విష‌యం బ‌య‌ట‌కు వ‌చ్చింది. డ్ర‌గ్స్ కేసులో ఆరోప‌ణ‌లు ఎదుర్కొంటున్న ప‌లువురు సినీ ప్ర‌ముఖులు ఇప్ప‌టికే సిట్ విచార‌ణ‌కు హాజ‌రైన సంగ‌తి తెలిసిందే. విచార‌ణ సంద‌ర్భంగా కొన్ని సెంటిమెంట్ల‌ను వారు ప‌క్కాగా ఫాలో అవుతున్న‌ట్లు చెబుతున్నారు.

సిట్ విచార‌ణ‌కు వెళుతున్న వారంతా ముంద‌స్తుగా ముహుర్తాలు పెట్టించుకొని మ‌రీ బ‌య‌లుదేరుతున్న‌ట్లుగా తెలుస్తోంది. అదే స‌మ‌యంలో ధ‌రించే దుస్తుల విష‌యంలోనూ జాగ్ర‌త్త‌లు తీసుకుంటున్న‌ట్లుగా స‌మాచారం. విచార‌ణ‌కు హాజ‌రవుతున్న వారంతా తెల్ల‌టి వ‌స్త్రాల్ని ధ‌రించాల‌న్న సూచ‌న‌ను ఇప్ప‌టివ‌ర‌కూ అంద‌రూ పాటించిన‌ట్లుగా చెప్పాలి.

విచార‌ణ‌కు వెళ్లే ముందు ప్ర‌త్యేక పూజ‌లు నిర్వ‌హించి.. పండితుల సూచ‌న‌ల్ని తూచా త‌ప్ప‌కుండా ఫాలో అవుతున్న‌ట్లు సినీ వ‌ర్గాలు చెబుతున్నాయి. విచార‌ణ‌కు ఇప్ప‌టివ‌ర‌కు హాజ‌రైన  ద‌ర్శ‌కుడు పూరీ జ‌గ‌న్నాథ్.. సుబ్బ‌రాజు.. త‌రుణ్‌.. ఈ రోజు వ‌చ్చిన న‌వ‌దీప్ అంద‌రూ తెల్ల చొక్కాలు ధ‌రించి రావ‌టం గ‌మ‌నార్హం.

మిగిలిన వారు కూడా ఇదే సెంటిమెంట్‌ ను ఫాలో అవుతార‌ని చెబుతున్నారు. ఇవాల్టికి ఇవాళ సంగ‌తే చూస్తే.. సిట్ విచార‌ణ‌కు హాజ‌రైన న‌వ‌దీప్ త‌న ఇంటి నుంచి రాకుండా.. ఉద‌యాన్నే ఇంటి నుంచి బ‌య‌ట‌కు వెళ్లి.. స్నేహితుల ఇళ్ల నుంచి సిట్‌ కార్యాల‌యానికి చేరుకున్న‌ట్లు చెబుతున్నారు. ఇష్ట‌దైవాల్ని భ‌క్తితో మొక్కుతున్న ఈ సెల‌బ్రిటీల ప్రార్థ‌న‌ల్ని వారి ఇష్ట‌దైవాలు ఎంత‌వ‌ర‌కు వింటాయ‌న్న‌ది కాల‌మే స‌మాధానం చెప్పాలి. ఏమైనా విచార‌ణ‌కు హాజ‌ర‌వుతున్న సినీ ప్ర‌ముఖులు త‌మ‌దైన సెంటిమెంట్ల‌ను ఫాలో కావ‌టం ఆస‌క్తిక‌రంగా మారింది.