హాట్ టాపిక్: సేతుప‌తికి మెగా పారితోషికం

ఒకేసారి రెండు మెగా సినిమాల‌తో టాలీవుడ్ ఎంట్రీ ఇస్తున్నాడు త‌మిళ స్టార్ హీరో విజ‌య్ సేతుప‌తి. మెగాస్టార్ చిరంజీవి క‌థానాయ‌కుడిగా న‌టించిన `సైరా-న‌ర‌సింహారెడ్డి`లో త‌మిళనాడు మూలాలు ఉన్న వీరుడిగా న‌టిస్తున్నాడు. ఉయ్యాల‌వాడ తో క‌లిసి ఆంగ్లేయుల‌పై పోరాడే త‌మిళుడిగా అత‌డి ఆహార్యం ట్రైలర్ లో ఆక‌ట్టుకుంది. అయితే ఈ సినిమా కంటే ముందే అతడు మ‌రో మెగా హీరో చిత్రానికి అంగీక‌రించారు. అదే `ఉప్పెన‌`. సుప్రీం హీరో సాయిధ‌ర‌మ్ తేజ్ సోద‌రుడు వైష్ణ‌వ్ తేజ్ డెబ్యూ చిత్ర‌మిది. ఇందులో సేతుప‌తి పాత్ర ఎంతో కీల‌కంగా ఉండ‌నుంద‌ని తెలుస్తోంది. ఉప్పెన ర‌క‌ర‌కాల కార‌ణాల‌తో ఆల‌స్య‌మ‌వ్వ‌డంతో ఈలోగానే సైరా అత‌డికి టాలీవుడ్ డెబ్యూ సినిమా కాబోతోంది.

విజ‌య్ సేతుప‌తి టాలీవుడ్ లో ఒక్కో చిత్రానికి ఎంత పారితోషికం అందుకుంటున్నారు? అంటే ఆస‌క్తిక‌ర సంగతులే తెలిశాయి. ఉప్పెన చిత్రానికి రూ.5 కోట్లు.. సైరాకు రూ.3- 4కోట్ల మేర పారితోషికం అందుకుంటున్నాడ‌ని తెలుస్తోంది. కోడంబాక్క‌మ్ ఎంజీఆర్ హైస్కూల్లో చ‌దువుకున్న సేతుప‌తి స్కూల్ డేస్ లోనే పెద్ద స్టార్ అవ్వాల‌ని క‌ల‌గ‌న్నాడు. అందుకు త‌గ్గ‌ట్టే కోలీవుడ్ లో క‌థానాయ‌కుడిగా తాను ఆశించిన స్థాయిని అందుకున్నాడు.

ర‌జ‌నీకాంత్- క‌మ‌ల్ హాస‌న్-విక్ర‌మ్-అజిత్-సూర్య లాంటి గ్రేట్ స్టార్లు ఉన్న ప‌రిశ్ర‌మ‌లో త‌న‌కంటూ ఒక స్థాయి ఉంద‌ని నిరూపించాడు. క‌మ‌ల్ హాస‌న్ త‌ర‌హాలో ప్ర‌యోగాత్మ‌క పాత్ర‌ల్ని ఎంచుకుంటూ బాక్సాఫీస్ వ‌ద్ద‌ స‌త్తా చాటుతున్నాడు. అందుకే త‌మిళ‌నాడులో అత‌డికి ఉన్న ఇమేజ్ దృష్ట్యా టాలీవుడ్ లోనూ భారీ పారితోషికం అందుతోంద‌ని తెలుస్తోంది. సేతుప‌తి బ్రాండ్ తో సైరా- ఉప్పెన చిత్రాల‌కు త‌మిళంలో డిజిట‌ల్ శాటిలైట్ స‌హా ఇత‌ర‌త్రా మార్కెట్ వ‌ర్క‌వుట‌వుతుంద‌ని ట్రేడ్ నిపుణులు విశ్లేషిస్తున్నారు.