పొగ‌రు ఒగ‌రు ఉన్న పందెంకోడి

పొగ‌రు ఒగ‌రు ఉన్నోడు విశాల్‌. అలా లేక‌పోతే ఒక తెలుగోడు అయ్యి ఉండీ - త‌మిళ తంబీల్ని గెల‌వ‌డం అంటే ఆషామాషీనా?  నుదిటిన‌ పెద్ద నామం బొట్టు పెట్టి నేటివిటీ - క‌ల్చ‌ర్ అంటూ భీష్మించుకునే చోట‌ - మ‌నోడు కూడా నెగ్గుకొచ్చాడు. అక్క‌డ ఏకంగా పిలింఛాంబ‌ర్‌ - నిర్మాత‌ల మండ‌లి రాజ‌కీయాల్లో మ‌నోడిదే పైచేయి. అంతేనా ఇప్పుడు త‌మిళ ప్ర‌జ‌లంతా హ‌ర్షించే మంచి ప‌నులెన్నో చేస్తూ రియ‌ల్ హీరోగా వెలిగిపోతున్నాడు. వ‌ర‌ల‌క్ష్మిని ప్రేమించి మామ‌ శ‌ర‌త్ కుమార్‌నే ఛాలెంజ్ చేసిన సిస‌లైన పందెంకోడి అత‌డు. అందుకే అత‌డిలోని రియ‌ల్ హీరోని అభిమానించే వీరాభిమానులు పెరిగారు. ఇదివ‌ర‌కూ చెన్న‌య్ వ‌ర‌ద‌ల్లో - అప్ప‌ట్లోనే వైజాగ్ సునామీ వేళ విశాల్ జనాల‌కు సాయం చేయ‌డానికి ముందుకొచ్చాడు. ఇప్పుడు  వ‌ర‌ద‌ల్లో కేర‌ళ మునిగిపోతుంటే త‌న‌వంతుగా నిత్యావ‌స‌రాలు స‌ర‌ఫ‌రా చేసి - ఈ విప‌త్తుపై స్టార్లంద‌రిలో ముందుగా స్పందించిన మ‌న‌సున్న‌ హీరోగానూ పేరు తెచ్చుకున్నాడు. అందుకే అత‌డు పొగ‌రు ఒగ‌రు ఉన్న పందెంగిత్త‌.

అటువైపు ఉన్నోడు ఎవ‌డైనా కావొచ్చు. ఇటువైపు ఉన్నోడు విశాల్! అన్న తీరుగానే అత‌డి ప‌య‌నం సాగుతోంది. స‌రిగ్గా ఇదే ఫార్ములాతో తీసిన డెబ్యూ సినిమా పందెంకోడి బంప‌ర్ హిట్ కొట్టింది 12 ఏళ్ల‌ క్రితం. ఇన్నాళ్ల‌కు ఆ సినిమా సీక్వెల్‌ లో న‌టించాడు విశాల్‌. అన్ని ప‌నులు శ‌ర‌వేగంగా పూర్తి చేసి రిలీజ్ బ‌రిలోకి వ‌చ్చేస్తున్నారు. ఆ క్ర‌మంలోనే ప్ర‌మోష‌న్ మొద‌లెట్టాడు. వ‌స్తూనే ఇలా పెళ్లికొడుకు గెట‌ప్‌లో దిగిపోయాడు. 20 ఆగ‌స్టు సోమ‌వారం నాడు.. మాస్‌ హీరో విశాల్ `సందెకోజి 2` తొలి సింగిల్ జ‌నం ముందుకు వ‌స్తోంద‌హో!! అని ప్ర‌క‌టించారు. ఇది త‌మిళ వెర్ష‌న్ టీజ‌ర్‌. ఒక‌వేళ తెలుగు వెర్ష‌న్ టీజ‌ర్ అదే రోజు రిలీజ‌వుతుందా? అన్న‌ది వేచి చూడాల్సిందే.

అప్ప‌ట్లో రిలీజైన పందెంకోడి సినిమా ఇప్ప‌టికీ జ‌నం క‌ళ్ల‌లోనే ఉంది. ఆ సినిమాలో యాక్ష‌న్ టైమింగ్, క‌థానాయిక మీరా జాస్మిన్‌ తో విశాల్ రొమాన్స్ - అదిరిపోయే సాంగ్స్ ఇంకా మ‌ర్చిపోలేం. అలాంటి బ్లాక్‌ బ‌స్ట‌ర్‌ కి సీక్వెల్ కోసం మ‌ళ్లీ లింగుస్వామితో క‌లిసి ప‌ని చేశాడంటే అంత‌కుమించిన అంచ‌నాలుంటాయి. `అభిమ‌న్యుడు` సినిమాతో బంప‌ర్ హిట్ కొట్టిన విశాల్ గ్రాఫ్‌ ని తెలుగులో ఈ సినిమా మ‌రో లెవ‌ల్‌ కి తీసుకెళుతుందేమో చూడాలి.