క్లీన్ U సర్టిఫికేట్ సంపాదించిన BRO

నటుడు-దర్శకుడు సముద్రఖని ఇద్ద‌రు మెగా హీరోల‌ను క‌లుపుతూ చేసిన ప్ర‌య‌త్నం- BRO. పవన్ కళ్యాణ్ - సాయి ధరమ్ తేజ్ అరుదైన కాంబినేష‌న్ తో అత‌డు తెర‌కెక్కించిన‌ ఫాంటసీ కామెడీ డ్రామా బ్రో జూలై 28న గ్రాండ్ రిలీజ్ కానుంది. ఇప్ప‌టికే ఈ సినిమా పోస్ట‌ర్లు ప్ర‌చార వీడియోలు ఆక‌ట్టుకున్నాయి. టీమ్ సీరియ‌స్ గా ప్రమోషన్స్ చేస్తోంది. త్వరలో ట్రైలర్ విడుదల కానుంది.

తాజా స‌మాచారం మేర‌కు..ఈ సినిమా సెన్సార్ పూర్త‌యింది. CBFC క్లీన్ U సర్టిఫికేట్ ఇచ్చింది. దీనితో బ్రో కుటుంబ స‌మేతంగా వీక్షించ‌ద‌గిన సినిమా అని క్లారిటీ వ‌చ్చేసింది. ప్రియా ప్రకాష్ వారియర్- కేతిక శర్మ- బ్రహ్మానందం- రోహిణి మొల్లేటి- సుబ్బరాజు- తనికెళ్ల భరణి- రాజా చెంబోలు కీలక పాత్రలు పోషించారు. జీ స్టూడియోస్ - పీపుల్ మీడియా ఫ్యాక్టరీ బ్యానర్ లపై టీజీ విశ్వ ప్రసాద్ ఈ చిత్రాన్ని నిర్మించారు.

ట్రైల‌ర్ ఈవెంట్ అప్పుడే..!

బ్రో ప్ర‌మోష‌న‌ల్ ఇంట‌ర్వ్యూల్లో నిర్మాత‌లు ప‌లు ఆస‌క్తిక‌ర విష‌యాల‌ను వెల్ల‌డించారు. బ్రో ట్రైలర్ - ప్రీరిలీజ్ ఈవెంట్ 21 లేదా 22 తేదీల్లో నిర్వ‌హించేందుకు ప్లాన్ చేస్తున్నామ‌ని విశ్వ‌ప్ర‌సాద్ తెలిపారు. వ‌కీల్ సాబ్ వేదిక అయిన శిల్పకళా వేదికలో ప్రీరిలీజ్ నిర్వహిస్తున్నట్టు చెప్పారు. అలాగే తమిళ సినిమాతో పోలిస్తే బ్రో చాలా భారీగా ఉంటుందని ఆయ‌న తెలిపారు. బలమైన కుటుంబ‌ ఎమోషన్స్ తో సెంటిమెంట్ ఉన్నా.. కమర్షియల్ అంశాల‌కు కొద‌వుండ‌దు. త‌మిళ వెర్ష‌న్ లోని ఆత్మ మిస్ కాకుండా ఉంటూనే గ్రాండియ‌ర్ విజువ‌ల్స్ తో ఆక‌ట్టుకుంటుంద‌ని తెలిపారు. ఈ సినిమా క‌థ‌నం ప‌రంగా క‌మర్షియల్ ఎలిమెంట్స్ పరంగా కొత్తగా ఉంటుందని తెలిపారు. మూవీ మొదలైన ఓ 10 నిమిషాల త‌ర్వాత ప‌వ‌న్ క‌నిపిస్తారు. సినిమా ఆద్యంతం ఆయ‌న అల‌రిస్తార‌ని కూడా ప‌వ‌న్ అభిమానుల‌కు శుభ‌వార్త అందించారు. బ్రో ప్రీమియ‌ర్ షోలు ఉంటాయా? అన్న ప్ర‌శ్న‌కు అప్ప‌టి స‌న్నివేశాన్ని బ‌ట్టి ప్లాన్ చేస్తామ‌ని ఆయ‌న తెలిపారు.