స్టార్ హీరోతో డైరెక్ట‌ర్‌కి సృజ‌నాత్మ‌క విభేధాల వెన‌క‌

ప్ర‌ముఖ ద‌ర్శ‌కుడు వ‌ర‌స బ్లాక్ బ‌స్ట‌ర్ల త‌ర్వాత పాపుల‌ర్ స్టార్ హీరోతో క‌లిసి ప‌ని చేయాల‌నుకున్నాడు. స్క్రిప్టు కూడా వినిపించాడు. కానీ ఆ స్క్రిప్టు ఎందుక‌నో స‌ద‌రు హీరోకి న‌చ్చ‌లేదు. చాలా కాలం పాటు స్క్రిప్టుపై ట్రావెల్ చేసాక ప్రాజెక్ట్ ఆగిపోయింది. దీంతో ఇరువురి మ‌ధ్యా పెద్ద‌ గొడ‌వ‌లు అయ్యాయ‌ని, తిరిగి మాట్లాడుకునేందుకు ఆస్కారం లేద‌ని, అందుకే ప్రాజెక్ట్ ఆగిపోయింద‌ని కూడా గుస‌గుస‌లు వినిపించాయి.

అయితే ఆ త‌ర్వాత ఇద్ద‌రి మ‌ధ్యా మాట‌ల్లేవ్ మాట్లాడుకోడాల్లేవా? మునుముందు క‌లిసి ప‌ని చేసే అవ‌కాశం లేదా? అంటూ అభిమానులు సందేహిస్తున్నారు. అయితే హీరో నుంచి ఎలాంటి స‌మాధానం లేదు. ద‌ర్శ‌కుడు మాత్రం త‌మ మ‌ధ్య క్రియేటివ్ డిఫ‌రెన్సెస్ వ‌చ్చాయ‌ని అంగీక‌రించారు. భిన్నాభిప్రాయాలు సృజనాత్మక ప్రక్రియలో ఒక భాగమని, ఒప్పందం కుదరకపోతే తనతో కలిసి పనిచేయమని ఎవరినీ బలవంతం చేయకూడదని అతడు చెప్పాడు. తనకు ఎవరితోనూ శత్రుత్వం లేదని స్టార్ హీరోతో మళ్లీ కలిసి పనిచేయడానికి సిద్ధంగా ఉన్నానని చెప్పాడు.

ఇప్ప‌టికే కొన్నేళ్లు గ్యాప్ వ‌చ్చింది. ఇంత గ్యాప్ త‌ర్వాత ఇప్పుడున్న బిజీ షెడ్యూళ్ల న‌డుమ నేను తిరిగి ఆ స్టార్ హీరోతో ప‌ని చేయ‌లేక‌పోతున్నాన‌ని కూడా అత‌డు చెప్పాడు. తామిరువురూ కలిస్తే అది గొప్ప సినిమా అవుతుందని కూడా నమ్మ‌కం వ్య‌క్తం చేసాడు. ఆ ద‌ర్శ‌కుడు చెప్పిన దానిని బ‌ట్టి ఇద్ద‌రి మ‌ధ్య క్రియేటివ్ డిఫ‌రెన్సెస్ త‌లెత్తితే ఆ ఇద్ద‌రికీ గొడ‌వ‌ల‌య్యాయ‌ని అర్థం కాదు. కేవ‌లం సృజ‌నాత్మ‌క ప్ర‌క్రియ‌లు న‌చ్చ‌లేదు అంతే. ఆ త‌ర్వాత వారు మ‌ళ్లీ స్నేహితులుగానే కొన‌సాగ‌వ‌చ్చు.

ఇదే త‌ర‌హాలో టాలీవుడ్ సూప‌ర్ స్టార్ మ‌హేష్ బాబు- సుకుమార్ మ‌ధ్య కూడా క్రియేటివ్ డిఫ‌రెన్సెస్ వ‌చ్చిన సంగ‌తి తెలిసిందే. మ‌హేష్ కాద‌నుకున్న త‌ర్వాత సుకుమార్ నేరుగా బ‌న్ని వ‌ద్ద‌కు వ‌ళ్లి పుష్ప స్టోరి వినిపించాడు. అది పాన్ ఇండియా బ్లాక్ బ‌స్ట‌ర్ కాగానే, సీక్వెల్ తీసి రిలీజ్ కి రెడీ చేసిన సంగ‌తి తెలిసిందే. అలాగే సందీప్ వంగా `యానిమ‌ల్` చిత్రాన్ని మ‌హేష్ తో చేయాల్సి ఉండ‌గా, అత‌డు కాద‌న్నాక ర‌ణ‌బీర్ తో తెర‌కెక్కించి పాన్ ఇండియాలో బ్లాక్ బ‌స్ట‌ర్ కొట్టాడు.