బుట్టబొమ్మ ఆశలన్నీ వాటిపైనే..!

టాలీవుడ్‌లో ఒకానొక సమయంలో టాప్‌ స్టార్‌ హీరోల సినిమాలకు సైతం డేట్లు సర్దుబాటు చేయలేనంత బిజీగా సినిమాలు చేసిన హీరోయిన్‌ పూజా హేగ్డే గత రెండేళ్లుగా ఏడాదికి ఒకటి రెండు సినిమాలు సైతం చేయడం లేదు. ఉన్నట్టుండి పూజా కి ఆఫర్లు తగ్గాయి. టాలీవుడ్‌లో దాదాపు యంగ్ స్టార్‌ హీరోల అందరికి జోడీగా నటించింది. మరోసారి ఆమెతో నటించేందుకు ఏ హీరో ఆసక్తి చూపడం లేదు. దాంతో టాలీవుడ్‌లో ఆమెకు ఆఫర్లు దక్కడం లేదు అంటూ కొందరు అభిప్రాయం వ్యక్తం చేస్తున్నారు. ఆమె ప్రేక్షకులకు అప్పుడే బోర్‌ కొట్టింది అంటూ మరికొందరు కామెడీగా ట్రోల్స్ చేస్తూ ఉన్నారు.

బాలీవుడ్‌లో ఆఫర్లు దక్కించుకున్నా అవి కూడా పూజా హెగ్డేకు మంచి విజయాన్ని తెచ్చి పెట్టలేదు. దాంతో పూజా హెగ్డే ఇండస్ట్రీలో కొనసాగడమే కష్టం అనుకుంటున్న సమయంలో అనూహ్యంగా కోలీవుడ్‌ నుంచి వరుసగా ఆఫర్లు వచ్చాయి. రెండు తమిళ సినిమాల్లో హీరోయిన్‌గా నటిస్తున్న పూజా హెగ్డే ఆ రెండు సినిమాలు విజయం సాధిస్తే మరోసారి బిజీ హీరోయిన్‌గా మారిపోతాను అనే నమ్మకంతో ఉంది. రెండు సినిమాల్లో ఒకటి సూర్య హీరోగా కార్తీక్‌ సుబ్బరాజ్ దర్శకత్వంలో రూపొందుతున్న సినిమా కాగా, రెండోది కూడా స్టార్‌ హీరో సినిమా కావడం విశేషం.

ఇటీవల సూర్య హీరోగా కార్తీక్‌ సుబ్బరాజ్ దర్శకత్వంలో రూపొందుతున్న సినిమాలో తాను నటిస్తున్నట్లు పూజా హెగ్డే ప్రకటించింది. ఆ విషయాన్ని స్వయంగా ఒక చిట్‌చాట్‌లో చెప్పడంతో పాటు సినిమాకు సంబంధించిన ఆసక్తికర విషయాలను వెల్లడించింది. సోషల్‌ మీడియాలో ఆమె షేర్‌ చేసిన విషయాలు ప్రస్తుతం వైరల్‌ అవుతున్నాయి. కార్తీక్‌ సుబ్బరాజ్ సినిమా అనగానే భారీ యాక్షన్‌ సన్నివేశాలు ఉంటాయని అంతా అనుకుంటారు. కానీ ఈ సినిమాలో అలా కాదని, యాక్షన్‌తో పాటు లవ్ స్టోరీ కూడా ఉంటుందని చెప్పుకొచ్చింది.

సూర్యకి తనకి మధ్య ఉండే సన్నివేశాలు ఆకట్టుకుంటాయని చెప్పుకొచ్చింది. కథలో అత్యంత ప్రముఖ పాత్రలో తాను నటిస్తున్నందుకు చాలా సంతోషంగా ఉందని చెప్పుకొచ్చింది. సూర్యతో కార్తీక్‌ సుబ్బరాజ్ చేస్తున్న ఈ సినిమాపై టాలీవుడ్‌ ప్రేక్షకులు సైతం ఆసక్తిగా ఉన్నారు. అయితే కంగువా సినిమాతో సూర్య కు పెద్ద దెబ్బ పడింది. ఆ సినిమా నిరాశ పరచినా కార్తీక్‌ సుబ్బరాజ్ సినిమాతో పాటు సూర్య చేయబోతున్న వెట్రిమారన్‌ సినిమా కచ్చితంగా మంచి విజయాన్ని తెచ్చి పెడుతుంది అనే నమ్మకం వ్యక్తం అవుతోంది. సోషల్‌ మీడియాలో సూర్య, పూజా హెగ్డే కాంబో కి పాజిటివ్‌ రెస్పాన్స్ ఉన్న కారణంగా సినిమా తప్పకుండా మంచి విజయాన్ని సొంతం చేసుకుంటుంది అనే నమ్మకం వ్యక్తం అవుతోంది.