ప్రభాస్ హీరోయిన్.. సుధీర్ కు నో చెప్పిందా?

పాన్ ఇండియా స్టార్ ప్రభాస్, టాలెంటెడ్ డైరెక్టర్ హను రాఘవపూడి కాంబోలో పీరియాడికల్ యాక్షన్ మూవీ తెరకెక్కుతున్న విషయం తెలిసిందే. ప్రభాస్ సైనికుడిగా కనిపించనున్న ఆ సినిమా.. విభిన్నమైన కథ, భారీ బడ్జెట్ తో రూపొందుతున్నట్లు తెలుస్తోంది. ఇప్పటికే మేకర్స్.. పూజా కార్యక్రమాలు జరిగిన రోజు కాన్సెప్ట్ పోస్టర్ రిలీజ్ చేసి మూవీపై అంచనాలు క్రియేట్ చేశారు.

అదే సమయంలో టాలీవుడ్ కు కొత్త హీరోయిన్ ను పరిచయం చేస్తున్న విషయం తెలిసిందే. ఇన్ స్టాగ్రామ్ స్టార్ గా ఫుల్ పాపులర్ అయిన ఇమాన్వీని ప్రభాస్ సరసన హీరోయిన్ గా సెలెక్ట్ చేశారు డైరెక్టర్ హను రాఘవపూడి. ఇమాన్వీ అందం, టాలెంట్ కలిగిన అమ్మాయి అని ఇప్పటికే చెప్పారు. ఆమె డ్యాన్స్‌ వీడియోలు చూశానని, అందుకే ఒక అవకాశం ఇవ్వాలనుకున్నానని తెలిపారు.

ప్రస్తుతం ప్రభాస్- హను సినిమా షూటింగ్ శరవేగంగా జరుగుతోంది. రీసెంట్ గా కంప్లీట్ అయిన ఓ సాంగ్ లో ఇమాన్వీ తన టాలెంట్ ను ప్రూవ్ చేసుకున్నట్లు టాక్ వినిపిస్తోంది. మూవీ టీమ్ అంతా సాటిస్ఫై అయినట్లు తెలుస్తోంది. అదే సమయంలో ఇప్పుడు సోషల్ మీడియాలో ఓ న్యూస్ వైరల్ అవుతోంది. ఇమాన్వీని సుడిగాలి సుధీర్ తన మూవీలో హీరోయిన్ గా నటించమని కాంటాక్ట్ అయ్యారట.

కమెడియన్ గా మంచి క్రేజ్ సంపాదించుకున్న సుధీర్.. ఇప్పుడు హీరోగా గోట్ మూవీ చేస్తున్న విషయం తెలిసిందే. ఆ సినిమాలో హీరోయిన్ గా ఇమాన్వీని తీసుకుందామని సుధీర్ అనుకున్నట్లు రీసెంట్ గా మరో కమెడియన్ గెటప్ శ్రీను ఓ కార్యక్రమంలో రివీల్ చేశారు. ఇన్ స్టా రీల్స్ చూసి ఆమెను సుధీర్ కాంటాక్ట్ అవ్వగా.. ఆమె గోట్ మూవీకి గ్రీన్ సిగ్నల్ ఇవ్వలేదని తెలిపారు.

ఆ తర్వాత ప్రభాస్, హను రాఘవపూడి మూవీ పూజా కార్యక్రమాల్లో ఇమాన్వీని చూసి సుధీర్ కాంటాక్ట్ అయింది ఆమెనే కదా అని గుర్తుపట్టానని చెప్పారు. అప్పుడు సుధీర్ కు ఆ విషయం చెప్పగా, ఆయన షాక్ అయ్యాడని గెటప్ శ్రీను తెలిపారు. ఇప్పుడు ఈ విషయం సోషల్ మీడియాలో వైరల్ గా మారింది. సుధీర్ ను తక్కువ చేయడం కాదని.. ప్రభాస్ పక్కన ఛాన్స్ ఎవరైనా వదులుకుంటారా అని నెటిజన్లు అంటున్నారు.

అదే సమయంలో ఇమాన్వీ సినిమాల్లోకి రావాలని ముందే ఫిక్స్ అయినట్లు ఉన్నారని.. కానీ భారీ ప్రాజెక్ట్ తో ఎంట్రీ ఇవ్వాలని అనుకున్నారేమోనని కామెంట్స్ పెడుతున్నారు. అందుకే సుధీర్ మూవీకి నో చెప్పి ఉంటారని అంచనా వేస్తున్నారు. ఏదేమైనా డెబ్యూ మూవీతో ట్రెండింగ్ హీరోయిన్ గా మారారని చెబుతున్నారు. మరి ఫస్ట్ సినిమాతో ఇమాన్వీ ఎలాంటి హిట్ అందుకుంటారో వేచి చూడాలి.