విజయ్ వారసుడి ఫస్ట్ సినిమా... ఆరంభంలోనే కిక్కిచ్చాడు

సౌత్ సినిమా లోనే అత్యంత ప్రతిష్టాత్మక నిర్మాణ సంస్థలలో ఒకటైన లైకా ప్రొడక్షన్స్, తమ ప్రాజెక్టులతో ఎప్పుడు ప్రత్యేకమైన గుర్తింపు తెచ్చుకుంది. భారీ సినిమాలను నిర్మించడమే కాకుండా, కొత్త దర్శకులను ప్రోత్సహించే ప్రయత్నం చేస్తూ ముందుకు సాగుతోంది. లేటెస్ట్ గా, లైకా ప్రొడక్షన్స్ తమ తాజా ప్రాజెక్ట్‌ను ప్రకటిస్తూ అందరికీ సర్‌ప్రైజ్ ఇచ్చింది. ఈ ప్రాజెక్ట్ ప్రత్యేకత ఏంటంటే, ఇది తమిళ స్టార్ విజయ్ కుమారుడు జేసన్ సంజయ్ కు దర్శకుడిగా మొదటి సినిమా కావడం విశేషం. ఈ సినిమాలో యంగ్ హీరో సందీప్ కిషన్ ప్రధాన పాత్రలో నటించబోతున్నారు.

ఇటీవల విడుదల చేసిన మోషన్ పోస్టర్ ఈ ప్రాజెక్టుపై ఆసక్తిని మరింత పెంచారు. ‘మీరు కోల్పోయిన దానిని అసలైన చోట వెతకడం’ అనే థీమ్ తో ఈ సినిమా రూపొందబోతుందని క్లారిటీ ఇచ్చారు. కథ ఎంత విభిన్నంగా ఉంటుందో ఈ చిన్న మోషన్ టీజర్ ద్వారా అర్థమవుతోంది. అలాగే ఓ ఓ వైపు హీరో సందీప్, మరోవైపు దర్శకుడిగా సంజయ్ ఉన్న తీరు హైలెట్ అయ్యింది. డబ్బుకు సంబంధించిన ఎలిమెంట్స్ ఇందులో ఉండబోతున్నాయని హింట్ ఇచ్చారు.

ఈ ప్రాజెక్ట్ విజయ్ అభిమానులలో కూడా భారీ అంచనాలను కలిగిస్తోంది. చాలా కాలంగా విజయ్ వారసుడు దర్శకుడిగా కెరీర్ మొదలు పెట్టాలనే చర్చలు జరుగుతున్నాయి. ఇప్పుడు ఆ డ్రీమ్ ఫైనల్ గా నిజమైంది. లైకా ప్రొడక్షన్స్ అధినేత జి.కె.యం. తమిళ్ కుమారన్ మాట్లాడుతూ, తమ సంస్థ ఎప్పుడూ కొత్త టాలెంట్ ను ప్రోత్సహించేందుకు ప్రాధాన్యత ఇస్తుందన్నారు. జేసన్ సంజయ్ కథ చాలా ఫ్రెష్ గా, పాన్ ఇండియా ప్రేక్షకులను ఆకట్టుకునేలా ఉందని తెలిపారు. ఇదే సమయంలో సందీప్ కిషన్ గురించి మాట్లాడుతూ, ఆయన తెలుగు, తమిళ ప్రేక్షకులను అలరించే టాలెంట్ కలిగిన నటుడని, ఈ కాంబినేషన్ మరింత రసవత్తరంగా ఉంటుందని నమ్మకం వ్యక్తం చేశారు.

ఈ ప్రాజెక్టుకు స్టార్ సంగీత దర్శకుడు తమన్ సంగీతం అందించబోతున్నారని మేకర్స్ క్లారిటీ ఇచ్చారు. ప్రాజెక్ట్‌కు సంబంధించి ఇతర ప్రముఖ నటులు, టెక్నీషియన్స్‌పై చర్చలు కొనసాగుతున్నాయని, జనవరి 2025లో షూటింగ్ ప్రారంభం కానుందని తెలిపారు. ఈ చిత్రానికి సంబంధించిన మరిన్ని అప్డేట్స్ త్వరలో తెలియజేస్తామన్నారు.

సందీప్ కిషన్, జేసన్ సంజయ్ కలిసి పనిచేయడం ఒక ప్రత్యేకమైన అనుభూతిగా మారనుంది. జేసన్ తన విజన్ తో ప్రేక్షకులను ఆకట్టుకుంటాడనే నమ్మకం అందరిలోనూ ఉంది. విజయ్ కుమారుడిగా వచ్చిన ఈ ఛాన్స్ ను ఆయన ఎంతవరకు సద్వినియోగం చేసుకుంటారో చూడాలి. ఈ సినిమాపై విడుదల కాబోయే ప్రతి అప్డేట్ ప్రేక్షకుల్లో మరింత ఆసక్తిని పెంచుతుందని, లైకా ప్రొడక్షన్స్ మరోసారి సౌత్ సినిమా స్థాయిని పెంచుతుందని భావిస్తున్నారు. ఏదేమైనా, జేసన్ సంజయ్ తొలి ప్రాజెక్ట్ దర్శకుడిగా రావడం విశేషం.