'క' కలెక్షన్స్‌... సెకండ్ వీకెండ్‌లోనూ కుమ్మేసింది

కిరణ్ అబ్బవరం హీరోగా సుజీత్‌, సందీప్‌ దర్శకత్వంలో వచ్చిన 'క' సినిమా భారీ విజయాన్ని సొంతం చేసుకుంది. ఏడాది ముందు వరకు వరుసగా సినిమాలు చేస్తూ వచ్చిన కిరణ్ అబ్బవరంకు బాక్సాఫీస్ వద్ద నిరాశే మిగిలింది. పైగా సోషల్‌ మీడియాలో కిరణ్ అబ్బవరంను ట్రోల్స్‌తో ముంచెత్తారు. ఎలాగైనా సూపర్‌ హిట్‌ మూవీ తీయాలనే పట్టుదలతో కిరణ్ అబ్బవరం ఏడాది పాటు కష్టపడి 'క' సినిమాతో ప్రేక్షకుల ముందుకు వచ్చాడు. విభిన్నమైన పీరియాడిక్‌ కాన్సెప్ట్‌ను నమ్మడంతో పాటు, దర్శకులు సుజీత్‌, సందీప్‌లపై నమ్మకం పెట్టి కిరణ్‌ అబ్బవరం 'క' సినిమాను చేయడం జరిగింది. ఏడాది తర్వాత వచ్చి హిట్‌ కొడతాను అన్నట్లుగానే కిరణ్ హిట్‌ కొట్టి చూపించాడు.

'క' సినిమాకు విడుదలకు ముందే బజ్‌ క్రియేట్‌ కావడంతో అన్ని ఏరియాల్లో కలిపి రూ.10 కోట్ల బిజినెస్ అయింది. ఆ మొత్తంను చేరుకోవాలంటే సాధ్యమేనా అంటూ మొదట కొందరు అనుమానం వ్యక్తం చేశారు. రూ.20 కోట్ల గ్రాస్ కలెక్షన్స్ సాధిస్తేనే 'క' సినిమాకు బ్రేక్‌ ఈవెన్ సాధ్యం అవుతుంది. మరి అంత సాధ్యమేనా అనుకుంటూ ఉన్న సమయంలో కేవలం నాలుగు రోజుల్లోనే 'క' సినిమా బ్రేక్‌ ఈవెన్‌ వసూళ్లు నమోదు చేసింది. వీక్‌ డేస్‌లోనూ సాలిడ్‌ షేర్‌ ను రాబట్టిన 'క' సినిమా సెకండ్‌ వీకెండ్‌లోనూ దాదాపు రెండు కోట్ల షేర్‌ ను రాబట్టడంతో భారీ లాభాల దిశగా దూసుకు పోతుంది.

బాక్సాఫీస్ వర్గాల ద్వారా అందుతున్న సమాచారం ప్రకారం 'క' సినిమా సెకండ్‌ వీకెండ్‌ పూర్తి అయ్యేప్పటి వరకు దాదాపు 25 కోట్ల గ్రాస్‌ కలెక్షన్స్‌ను నమోదు చేసింది. రూ.10 కోట్ల బ్రేక్‌ ఈవెన్‌ టార్గెట్‌తో వచ్చిన ఈ సినిమాకు ఇప్పటికే రూ.14.5 కోట్ల షేర్‌ నమోదు అయింది. రూ.4.5 కోట్ల లాభాలను ఇప్పటికే సొంతం చేసుకున్న 'క' సినిమా లాంగ్‌ రన్‌లో మరో కోటిన్నర షేర్‌ దక్కించుకున్నా మొత్తంగా రూ.6 కోట్ల షేర్‌ నమోదు అయ్యే అవకాశాలు ఉన్నాయి. ఒక చిన్న సినిమా ఈ స్థాయిలో లాభాలను దక్కించుకోవడం అంటే మామూలు విషయం కాదు. సినిమా సూపర్‌ హిట్‌ కావడంతో శాటిలైట్‌ రైట్స్ తో పాటు ఓటీటీ రైట్స్ కి భారీ మొత్తం ఆఫర్లు వస్తున్నాయట.

'క' సినిమా ఏరియా వారిగా సాధించిన వసూళ్లను చూస్తే నైజాం ఏరియాలో రూ.5 కోట్లు, ఆంధ్రా ఏరియాలో రూ.7 కోట్లు, సీడెడ్‌ ఏరియాలో రూ.2.64 కోట్లు, ఓవర్సీస్ తో పాటు ఇతర ఏరియాల్లో రూ.4 కోట్ల వసూళ్లు సొంతం చేసుకుంది. సినిమాకు ప్రముఖుల నుంచి ప్రశంసలు దక్కాయి. దిల్ రాజు తో పాటు పలువురు ప్రముఖులు సక్సెస్‌ మీట్‌ కి హాజరు అయ్యి శుభాకాంక్షలు తెలియజేశారు. మెగాస్టార్‌ చిరంజీవి 'క' హీరో కిరణ్‌ అబ్బవరంతో పాటు యూనిట్‌ సభ్యులను ప్రత్యేకంగా తన ఇంటికి ఆహ్వానించి సన్మానించి సినిమా సక్సెస్ నేపథ్యంలో శుభాకాంక్షలు తెలియజేశారు. దాంతో సినిమాపై మరింత ఆసక్తి పెరిగి వసూళ్లు నమోదు అవుతూనే ఉన్నాయి.