'క' ఓటీటీ.. అడ్వాన్స్ ఫీచర్స్ తో మరింత స్పెషల్ గా..

టాలీవుడ్ యంగ్ హీరో కిరణ్ అబ్బవరం.. రీసెంట్ గా 'క' మూవీతో ప్రేక్షకుల ముందుకు వచ్చి ఎలాంటి హిట్ అందుకున్నారో అందరికీ తెలిసిందే. ఫాంట‌సీ మిస్ట‌రీ థ్రిల్ల‌ర్‌ గా సుజీత్, సందీప్ తెరకెక్కించిన ఆ మూవీ.. దీపావ‌ళి కానుక‌గా అక్టోబ‌ర్ 31న థియేట‌ర్ల‌లో రిలీజైంది. బ్లాక్ బస్టర్ గా నిలిచి బాక్సాఫీస్ వద్ద యాభై కోట్ల‌కుపైగా వసూళ్లను రాబట్టింది.

థియేటర్లలో సక్సెస్ ఫుల్ గా రన్ ను కంప్లీట్ చేసుకున్న ఆ సినిమా.. ఇప్పుడు ఓటీటీలో రిలీజ్ కు సిద్ధమవుతోంది. మరికొన్ని గంటల్లో అందుబాటులోకి రానుంది. థియేటర్లలో విడుదలకు ముందే క డిజిటల్ రైట్స్ ను ఈటీవీ విన్ ఓటీటీ సొంతం చేసుకుంది. ఇప్పుడు నవంబర్ 28వ తేదీ నుంచి స్ట్రీమింగ్ చేయనుంది. కేవలం తెలుగు వెర్షన్ విడుదల అవ్వనుంది.

దీంతో ఇప్పుడు టాలీవుడ్ మూవీ లవర్స్.. క సినిమా కోసం ఎంతో వెయిట్ చేస్తున్నారు. ఓటీటీలో మరోసారి చూడాలని తహతహలాడుతున్నారు. అలా సోషల్ మీడియాలో ఎక్కడ చూసినా క సినిమా పోస్టులే కనిపిస్తున్నాయి. అయితే అధునాతన ఫీచర్లతో క సినిమాను ఓటీటీలోకి తీసుకురానుంది ఈటీవీ విన్. ఆడియన్స్ ను సరికొత్త అనుభూతిని అందించనుంది.

డాల్బీ విజన్‌ : అట్మాస్ టెక్నాలజీలతో మాస్టర్ పీస్ 'క' సినిమాను స్ట్రీమింగ్ చేయనుంది ఈటీవీ విన్ ఓటీటీ. తమ డిజిటల్ ఫ్లాట్ ఫామ్ లో తొలిసారి అధునాతన ఫీచర్స్ తో కూడిన మూవీగా 'క'ను అందుబాటులోకి తేనుంది. ఓటీటీలు ఓ రేంజ్ లో పోటీపడుతున్న ప్రస్తుత రోజుల్లో తాను కూడా సత్తా చాటాలని ఈటీవీ విన్ ప్రయత్నిస్తున్నట్లు క్లియర్ గా అర్థమవుతోంది.

కథేంటంటే? సినిమాలో అభినయ్‌ వాసుదేవ్‌ (కిరణ్‌ అబ్బవరం) ఓ అనాథ. ఇతరులకు వచ్చే ఉత్తరాలు చదువుతూ.. తన సొంత వాళ్లే రాశారని ఊహించుకుంటూ.. పోస్ట్ మ్యాన్ గా ఉద్యోగం చేస్తూ జీవితాన్ని గడుపుతుంటాడు. అలా అలవాటుగా ఓ రోజు ఉత్తరం చదువుతుండగా అతడికి ఆ ఊరిలో కనిపించకుండా పోయిన అమ్మాయిల గురించి ఓ విషయం తెలుస్తుంది.

ఆ తర్వాత హీరో జీవితంలో ఎలాంటి ఘటనలు ఎదురయ్యాయనే ప్రశ్నల చుట్టూ సినిమా సాగింది. ముఖ్యంగా క మూవీ కాన్సెప్ట్‌ తో పాటు ట్విస్టులు ఆడియెన్స్‌ ను తెగ ఆక‌ట్టుకున్నాయి. క్లైమాక్స్ ఎపిసోడ్ వేరే లెవెల్ లో మెప్పించింది. అలా కిరణ్ అబ్బవరం.. చిన్న గ్యాప్ తర్వాత మంచి హిట్ అందుకుని సత్తా చాటారు. ఇప్పుడు ఓటీటీలో సందడి చేయనున్నారు.