బాప్‌రే.. న‌ట‌వార‌సుడిని మెచ్చుకున్న కంగ‌న
ఆర్యన్ ఖాన్ అరంగేట్రం కోసం ఎదురుచూడండి.. అత‌డు ర‌చ‌యిత.. ఫిలింమేక‌ర్ గా మ‌న ముందుకు వ‌స్తున్నారు'' అని రాసారు.
బాలీవుడ్‌లో ఇన్ సైడ‌ర్స్, ఔట్ సైడ‌ర్స్ డిబేట్ లో న‌ట‌వార‌సుల‌కు వ్య‌తిరేకంగా మాట్లాడుతూ నిరంత‌రం హెడ్ లైన్స్ లో నిలుస్తోంది క్వీన్ కంగ‌న రనౌత్. కపూర్ వార‌సులు, భ‌ట్స్ వార‌సులు, మ‌ల్హోత్రాల వార‌సులు, రోష‌న్ ల వార‌సుల‌ను తూర్పార‌బ‌డుతుంది. అగ్ర నిర్మాత కరణ్ జోహార్ ఎవ‌రిని పరిచయం చేసినా వారిని చీల్చి చెండాడుతుంది. బాలీవుడ్ మాఫియాపై నిప్పులు చెరుగుతుంది. ఖాన్ ల వార‌సులెవ‌రూ ప‌రిశ్ర‌మ‌లో లేక‌పోవ‌డాన్ని కూడా కొనియాడుతుంది.
అయితే ఇప్పుడు అందుకు భిన్నంగా కింగ్ ఖాన్ షారూఖ్ వార‌సుడు ఆర్యన్‌పై ప్రశంసల వర్షం కురిపించారు కంగ‌న. షారుఖ్ ఖాన్ కుమారుడు ఆర్యన్ ఖాన్ ఒక వెబ్ సిరీస్‌తో దర్శకుడిగా పరిచయం కానున్నాడని నెట్‌ఫ్లిక్స్ ప్రకటించిన తర్వాత, కంగనా రనౌత్ సహా చాలా మంది బాలీవుడ్ ప్రముఖులు దీనిపై స్పందించారు. కరణ్ జోహార్, అలియా భట్, సుహానా ఖాన్, అనన్య పాండే , షానాయ కపూర్ కూడా ఆర్యన్ ఖాన్‌ను ఉత్సాహపరిచారు. వీరంతా తమ తమ ఇన్‌స్టాలో అంద‌మైన నోట్స్ షేర్ చేసారు. లవ్ హార్ట్ ఈమోజీల‌ను షేర్ చేసారు.
షారూఖ్ ఖాన్ అంతటి పెద్ద స్టార్ కి న‌ట‌వార‌సుడే అయినా కానీ ఆర్యన్ న‌ట‌నా కెరీర్ లోకి వెళ్ల‌కుండా భిన్న‌మైన ప్ర‌య‌త్నం చేస్తున్నాడు. అత‌డు ద‌ర్శ‌క‌త్వంలో అడుగుపెడుతున్నాడు. ఆర్యన్ తొలిసారి ద‌ర్శ‌క‌త్వం వ‌హించిన వెబ్ సిరీస్ వచ్చే ఏడాది నెట్‌ఫ్లిక్స్‌లో విడుదల కానుంది. దీనిపై తండ్రి షారుఖ్ ఖాన్ కూడా స్పందించారు. ''ఎట్ట‌కేల‌కు ఇది జ‌రుగుతోంది...!'' అంటూ షారూఖ్ ఎమోష‌న‌ల్ అయ్యారు. ఆర్యన్ ఖాన్ దర్శకుడిగా అరంగేట్రం చేసినందుకు బాద్ షా ప్రశంసించారు. ఈ ప్ర‌య‌త్నానికి కంగనా, కరణ్, సుహానా చీర్ చేయ‌డం చూస్తే ఆర్యన్ చుట్టూ పాజిటివ్ వైబ్స్ ని నింపుతోంది.
ఆర్యన్ ప్ర‌య‌త్నంపై స్పందిస్తూ కంగనా రనౌత్ ఇలా వ్యాఖ్యానించారు. ''సినిమా కుటుంబాల పిల్లలు మేకప్ వేసుకోవడం, బరువు తగ్గడం, బొమ్మలు వేయడం, నటీనటులుగా భావించడం కంటే ఇలా ద‌ర్శ‌క‌త్వంలో ముందుకు రావడం గొప్ప విషయం. భారతీయ సినిమా ప్రమాణాలు మెరుగుప‌రిచేందుకు వనరులు ఉన్నవారు కెమెరాల వెనుక ప‌ని చేయ‌డానికి చాలా మంది కావాలి. ఆర్యన్ ఖాన్ అరంగేట్రం కోసం ఎదురుచూడండి.. అత‌డు ర‌చ‌యిత.. ఫిలింమేక‌ర్ గా మ‌న ముందుకు వ‌స్తున్నారు'' అని రాసారు.
కరణ్ జోహార్ వ్యాఖ్యానిస్తూ...''లవ్ యు, ఆర్యన్!'' నేను మీ గురించి చాలా గర్వపడుతున్నాను. మీ అద్భుతమైన సిరీస్‌ని ప్రపంచం చూసే వరకు వేచి ఉండలేను. ఇది రాక్& రూల్ కానుంది'' అని రాసారు. ఆర్యన్‌ని ట్యాగ్ కూడా చేశాడు. ఆర్యన్ సోదరి సుహానా ఖాన్ మాట్లాడుతూ, ''చాలా నవ్వులు, డ్రామాలు, యాక్షన్ ..కొంచెం ట్ర‌బుల్.. ఎప్పటిలాగే మీతో .. ఆర్యన్ .. నేను వేచి ఉండలేను! చాలా గర్వంగా ఉంది'' అని స్పందించారు. అలియా, అనన్య, షానయ కూడా అలియా భట్ నెట్‌ఫ్లిక్స్ పోస్ట్‌ను మళ్లీ షేర్ చేసి 'ఇంకా వేచి ఉండలేను' అంటూ రెడ్ హార్ట్ ఎమోజీలు షేర్ చేసారు.
రెడ్ చిల్లీస్ ఎంటర్‌టైన్‌మెంట్ బ్యానర్‌పై గౌరీ ఖాన్ నిర్మించిన ఆర్యన్ తొలి ప్రాజెక్ట్ కి ఇంకా టైటిల్ నిర్ణ‌యించాల్సి ఉంది. ఈ సిరీస్ చిత్ర పరిశ్రమ నేపథ్యంలో సాగే క‌థ‌తో రూపొందింది. దీనిని షారుఖ్ ఖాన్ 'ఆల్ హార్ట్, హస్టిల్' అని అభివర్ణించారు. బాలీవుడ్ త‌ళుకుబెళుకుల గమ్మత్తైన ప్రపంచాన్ని బ‌య‌టి ప్ర‌జల‌కు చూపించే ప్ర‌య‌త్నం ఇది. ఇందులో ప‌లువురు అగ్ర తార‌లు అతిథి పాత్ర‌ల్లో మెర‌వ‌నున్నారు. ఈ సిరీస్ 2025లో నెట్‌ఫ్లిక్స్‌లో విడుదలవుతుంది.