'క' బాక్సాఫీస్.. 4 రోజుల్లో ఎంత వచ్చాయంటే

టాలీవుడ్ యంగ్ హీరో కిరణ్ అబ్బవరం తన లేటెస్ట్ మూవీ 'క'తో భారీ విజయాన్ని అందుకున్నారు. దీపావళి సందర్బంగా విడుదలైన ఈ సస్పెన్స్ థ్రిల్లర్ మూవీ ప్రేక్షకులను ఆకట్టుకుంటూ బాక్సాఫీస్ వద్ద మంచి వసూళ్లు సాధిస్తోంది. చింత వరలక్ష్మి సమర్పణలో రూపొందిన ఈ సినిమా ప్రేక్షకుల నుంచి విశేషమైన స్పందన అందుకుంటోంది. కేవలం నాలుగు రోజుల్లోనే ఈ చిత్రం రూ. 26.52 కోట్ల గ్రాస్ వసూళ్లను సాధించి, కిరణ్ అబ్బవరం కెరీర్‌లో మరో బిగ్ రికార్డ్ గా నిలిచింది.

క సినిమా విడుదలైన తొలి రోజునుంచే ప్రీమియర్ షోల ద్వారా పాజిటివ్ టాక్ సంపాదించింది. దీపావళి కానుకగా విడుదలైన ఈ చిత్రం మొదటి రోజు నుంచే ప్రేక్షకులను థియేటర్లకు ఆకర్షించడంలో సఫలమైంది. సినిమా కథ, దర్శకత్వం, కిరణ్ అబ్బవరం నటనకు మంచి ప్రశంసలు దక్కాయి. ఫస్ట్ డే నుంచే హౌస్‌ఫుల్ బోర్డులు దర్శనమిచ్చాయి. నాలుగో రోజుకి ఈ చిత్రం వసూళ్లలో ఏమాత్రం తగ్గకుండా కొనసాగుతుండటం విశేషం.

తొలి నాలుగు రోజుల్లోనే రూ. 26.52 కోట్ల గ్రాస్ వసూళ్లను సాధించడం వలన ఈ చిత్రం కిరణ్ అబ్బవరం కెరీర్‌లోనే అత్యధిక వసూళ్లను సాధించిన చిత్రంగా నిలిచింది. దీపావళి కానుకగా విడుదలైన ఈ చిత్రం ఓవర్సీస్ లో కూడా మంచి ఆదరణ పొందుతోంది. యూఎస్ లో కేవలం రెండు రోజుల్లోనే 330K డాలర్ల వసూళ్లు సాధించడం విశేషం.

ఇక ‘క’ సినిమాకు ప్రీ రిలీజ్ ఈవెంట్ లో భావోద్వేగంగా మాట్లాడిన కిరణ్ అబ్బవరం, ఈ చిత్రం విజయవంతమైతే సీక్వెల్ కృతజ్ఞతలు చెబుతానని చెప్పారు. ఇప్పుడు ఈ విజయం సాధించిన నేపథ్యంలో ‘క 2’ సినిమా త్వరలోనే ప్రారంభమవుతుందని ప్రకటించారు. ‘క’ సీక్వెల్ లో మరింత ఆసక్తికరమైన అంశాలతో కథను ముందుకు తీసుకెళ్తున్నట్లు తెలిపారు.

అంతేకాక, ప్రేక్షకుల పబ్లిక్ డిమాండ్ మేరకు ‘క’ సినిమాకు కొత్తగా 186 స్క్రీన్స్‌ను యాడ్ చేస్తామని చిత్రబృందం ప్రకటించడం విశేషం. దీని వల్ల మరింత ప్రజాదరణ పొందే అవకాశం ఉందని భావిస్తున్నారు. ఈ విజయవంతమైన ప్రయాణంతో కిరణ్ అబ్బవరం టాలీవుడ్‌లో తన స్థాయిని మరింత బలపరచుకునే దిశగా అడుగులు వేస్తున్నాడు. సుజీత్-సందీప్ దర్శకత్వంలో రూపొందిన ఈ చిత్రం ప్రేక్షకులను ఆకట్టుకుంటూ మంచి వసూళ్లను సాధిస్తోంది. సంగీతం సమకూర్చిన సామ్ సీఎస్, కథాంశంలో కొత్తదనం చేకూర్చారు. ‘క’ లో కథ, కథనాలు ప్రేక్షకుల మనసులను హత్తుకునేలా రూపొందించారు. చూస్తుంటే ఈ వారంలో కలెక్షన్లు మరీంత పెరిగే అవకాశం ఉన్నట్లు తెలుస్తోంది.