స్టార్ కమెడియన్.. సైలెంట్ రీ ఎంట్రీ..!

90వ దశకంలో స్టార్ కమెడియన్ గా ఓ వెలుగు వెలిగిన బాబు మోహన్ ఆ తర్వాత ఫాం కోల్పోయారు. ఆ రోజుల్లో బ్రహ్మానందం, కోటా శ్రీనివాస్ రావు లకు ధీటుగా ఆయన కామెడీ ఉంది. ఒకానొక దశలో కామెడీలో టాప్ పొజిషన్ కి వెళ్లిన సందర్భాలు ఉన్నాయి. కోటా అసిస్టెంట్ గా బాబు మోహన్ చేసిన కామెడీ ఎంతోమంది ప్రేక్షకులను అలరించింది. ఇప్పటికీ ఆ సీన్స్ చూస్తే మాత్రం కడుపుబ్బా నవ్వుకుంటాం. అలాంటి స్టార్ కమెడియన్ కెరీర్ లో అవకాశాలు సన్నగిల్లాయి అనిపించిన తర్వాత పాలిటిక్స్ లోకి వెళ్లారు.

రాజకీయాల్లోకి వెళ్తే సినిమాలకు దాదాపు దూరమైనట్టే. పాలిటిక్స్ లో కూడా పెద్దగా ప్రభావం చూపించలేని ఆయన కొన్నాళ్లు ఎవరికి కనిపించలేదు. ఫైనల్ గా మళ్లీ ముఖానికి రంగేసుకుని కుమారి శ్రీమతి సినిమాతో రీ ఎంట్రీ ఇచ్చారు. బాబు మోహన్ కెరీర్ లో ఫస్ట్ టైం డిజిటల్ ఎంట్రీ ఇస్తున్నారు. నిత్యా మీనన్ లీడ్ రోల్ లో నటించిన కుమారి శ్రీమతి సినిమాలో బాబు మోహన్ జడ్జి పాత్రలో నటించారు. వైజయంతి మూవీస్ బ్యానర్ లో తెరకెక్కిన ఈ సినిమా 28న అమేజాన్ ప్రైం లో రిలీజ్ అవుతుంది.

బాబు మోహన్ సర్ ప్రైజ్ రోల్ ఈ సినిమాకు స్పెషల్ ఎట్రాక్షన్ కానుంది. అయితే ఆయనకి కేవలం ఒకటి రెండు సీన్స్ మాత్రమే ఇచ్చారా లేక ఆయన కామెడీని సినిమాలో వాడుకున్నారా అన్నది తెలియాల్సి ఉంది. లెజెండరీ కమెడియన్ గా తెలుగు ప్రేక్షకుల హృదయాల్లో సుస్థిర స్థానాన్ని సంపాదించుకున్న బాబు మోహన్ వరుసగా సినిమాల్లో నటించాలని ప్రేక్షకులు కోరుతున్నారు.

కుమారి శ్రీమతి సినిమాలో బాబు మోహన్ పాత్ర బాగా పండితే మాత్రం కచ్చితంగా ఆయనకు ఇంకా మరిన్ని పాత్రలు వచ్చే అవకాశం ఉంది. అసలు బాబు మోహన్ నటించడానికి రెడీ అంటే దర్శక నిర్మాతలు ఆయన్ని తమ సినిమాల్లో పెట్టుకునేందుకు ఆసక్తి చూపిస్తారు. ఇక కుమారి శ్రీమతి ట్రైలర్ ఇంప్రెస్ చేయగా నిత్యా మీనన్ పర్ఫార్మెన్స్ సినిమాను నెక్స్ట్ లెవెల్ కి తీసుకెళ్తుందని అంటున్నారు.

సినిమాల్లో బిజీ అవ్వాలని చూస్తున్న బాబు మోహన్ కి కుమారి శ్రీమతి మంచి అవకాశమని చెప్పొచ్చు. ఆయనకు తగిన పాత్రల్లో నటిస్తూ మరోసారి ఆయన హాస్యంతో ఈ తరం తెలుగు ప్రేక్షకులను అలరించాలని కోరుకుందాం.