ఖైదీ-2.. గ్యాంగ్ మొత్తం దిగబోతోంది

సినిమాటిక్ యూనివర్స్.. ఈ పేరు వింటేనే కోలీవుడ్ స్టార్ డైరెక్టర్ లోకేష్ కనగరాజ్ కచ్చితంగా గుర్తుకొస్తారు. తన లోకేష్ సినిమాటిక్ యూనివర్స్ తో భారతీయ సినీ ప్రేక్షకులకు కొత్త అనుభూతి పంచిన దర్శకుడాయన. ఎల్‌ సీయూలో భాగంగా ఇప్పటికే లోకేష్ కనగరాజ్ తెరకెక్కించిన ఖైదీ, విక్రమ్‌, లియో చిత్రాలు ఓ రేంజ్ లో అలరించాయి. బాక్సాఫీస్ వద్ద మంచి విజయాన్ని అందుకున్నాయి. లోకేష్ టాలెంట్ ఏంటో చూపించాయి.

2019లో కోలీవుడ్ స్టార్ హీరో కార్తి లీడ్ రోల్ లో నటించిన ఖైదీ సినిమాతో తన సినిమాటిక్ యూనివర్స్‌ ప్రారంభించారు లోకేష్. ఆ ట్రెండ్‌ లోనే విలక్షణ నటుడు కమల్‌ హాసన్‌ హీరోగా విక్రమ్‌ సినిమా ప్రేక్షకుల ముందుకు వచ్చింది. ఆ తర్వాత దళపతి విజయ్‌ హీరోగా తీసిన లియోలో యూనివర్స్‌ ఛాయలు క్లియర్ గా కనిపించాయి. అయితే వీటన్నింటికీ బీజం ఎలా పడిందో 10 నిమిషాల వీడియోను రిలీజ్ చేస్తామని రీసెంట్ గా లోకేష్ తెలిపారు.

ఆ తర్వాత ఇటీవల డ్యాన్స్ మాస్టర్ లారెన్స్ ను తన యూనివర్స్ లోకి ఇన్వైట్ చేశారు లోకేష్. బెంజ్ టైటిల్ తో సినిమా చేస్తున్నట్లు తెలిపారు. లారెన్స్ బర్త్ డే స్పెషల్ గా టీజర్ ను కూడా రిలీజ్ చేశారు. అదే సమయంలో కార్తి ఖైదీ సినిమాకు ప్రీక్వెల్ తీస్తున్నట్లు లోకేష్ తెలిపారు. దీంతో ఆయన యూనివర్స్ నుంచి వచ్చే అప్ కమింగ్ చిత్రాలపై అంతా ఆసక్తి నెలకొంది. లోకేష్ అసలు ఏంటి ప్లాన్ చేస్తున్నారో చూడాలని ఆత్రుతగా ఉందని చెబుతున్నారు.

అయితే ఇప్పుడు ఎల్ సీయూకు సంబంధించిన ఇంట్రెస్టింగ్ న్యూస్ చక్కర్లు కొడుతోంది. ఖైదీ-2ను లోకేష్ అదిరిపోయే రీతిలో ప్లాన్ చేస్తున్నారని జోరుగా ప్రచారం సాగుతోంది. నెవ్వర్ బిఫోర్ అనేలా తెరకెక్కించనున్నారని సమాచారం. తన ఎల్ సీయూలో ఇప్పటికే భాగమైన స్టార్ హీరోలు సూర్య, విజయ్, కమల్ హాసన్ ను రంగంలోకి దింపనున్నారని టాక్ వినిపిస్తోంది. దీంతో సినీ ప్రియులు, అభిమానులు ఫుల్ ఖుషీ అయిపోతున్నారు.

ఆ విషయం నిజమో కాదో తెలియక పోయినా నెట్టింట మాత్రం తెగ ట్రెండ్ అవుతోంది. ఖైదీ-2 మూవీ రెగ్యులర్ షూటింగ్ వచ్చే ఏడాది స్టార్టింగ్ లో మొదలు కానున్నట్లు తెలుస్తోంది. అందుకు తగ్గ ఏర్పాట్లు కూడా జరుగుతున్నట్లు సమాచారం. ఢిల్లీ (కార్తి రోల్ నేమ్) ప్రయాణం జైలులో ఎలా ముగుస్తుందన్న కాన్సెప్ట్ తో ఖైదీ-2 తెరకెక్కుతున్నట్లు తెలుస్తోంది. త్వరలో ప్రాజెక్టుకు సంబంధించి పూర్తి వివరాలు బయటకు వచ్చే అవకాశం ఉంది.