ద‌ళ‌ప‌తితో 'లియో 2'పై లోకేష్ క‌న‌గ‌రాజ్ బిగ్ అప్‌డేట్‌

భార‌త‌దేశంలో మోస్ట్ వాంటెడ్ డైరెక్ట‌ర్ల జాబితాను త‌యారు చేస్తే అందులో టాప్ 10లో ఉంటాడు లోకేష్ క‌న‌గ‌రాజ్. అంత‌గా అత‌డు ఇటీవ‌ల క‌మ‌ర్షియ‌ల్ బ్లాక్ బ‌స్ట‌ర్ల‌తో అంద‌రి దృష్టిని ఆక‌ర్షించాడు. స్క్రీన్ ప్లే మాస్ట‌ర్ గా అత‌డికి ఉన్న గ్రిప్ గొప్ప స్టార్ల‌ను సైతం త‌న కోసం క్యూక‌ట్టేలా చేస్తోంది. అయితే అత‌డు తెర‌కెక్కించిన లియో చిత్రంపై తీవ్ర విమ‌ర్శ‌లొచ్చాయి. స్క్రీన్ ప్లే అంత బాలేద‌ని కూడా విమ‌ర్శించారు. కానీ ఈ సినిమాకి సీక్వెల్ ఉంటుంద‌నే ప్ర‌క‌ట‌న‌లు కొన్నాళ్లుగా వైర‌ల్ అవుతున్నాయి.

ఇటీవల కవిన్ నటించిన 'బ్లడీ బిచ్చగాడు' చిత్రం స్క్రీనింగ్‌కు హాజరైన లోకేష్ కనగరాజ్‌ను మీడియా వెంబ‌డించింది. ద‌ళ‌పతి విజయ్‌తో లియో 2 చేస్తారా? అని కొంద‌రు మీడియా ప్ర‌తినిధులు అడిగారు. ఓ వీడియో ఇంట‌ర్వ్యూలో లోకేష్ మాట్లాడుతూ.. ''విజయ్ అన్న మాత్రమే నిర్ణయించగలడు.. అతడు అంగీకరిస్తే నేను క‌చ్చితంగా లియో 2 చేస్తాను''అని చెప్పాడు. అదే ఇంటరాక్షన్‌లో ద‌ళ‌ప‌తి రాజ‌కీయ‌ పార్టీ TVK కోసం విజయ్ నిర్వహించిన రాష్ట్ర సదస్సుపై దర్శకుడిని అభిప్రాయాన్ని అడిగారు. లోకేష్‌ స్పందిస్తూ ''దాని గురించి నేను ఏమి చెప్పగలను? విజయ్ సర్‌కి శుభాకాంక్షలు'' అని అన్నాడు.

లోకేష్ కనగరాజ్ దర్శకత్వం వహించిన లియో చిత్రానికి సీక్వెల్ తీయాలంటే ఇప్ప‌ట్లో సాధ్య‌మ‌య్యే ప‌ని కాదు. ఇప్ప‌టికే విజ‌య్ రాజ‌కీయ ఆరంగేట్రం చేస్తూ చివ‌రి సినిమాల గురించి ప్ర‌క‌టించేసాడు. కాబ‌ట్టి అత‌డు తిరిగి రాజ‌కీయాలు వ‌దిలేసి వ‌చ్చాకే ఇత‌ర సినిమాల గురించి ఆలోచించ‌గ‌ల‌డు.

కూలీ గురించి...

రజనీకాంత్ నటించిన కూలీ షూట్ సజావుగా సాగుతోందని, ఇంకా రెండు షెడ్యూల్‌లు మాత్రమే మిగిలి ఉన్నాయని దర్శకుడు లోకేష్ తాజా ఇంట‌ర్వ్యూలో ధృవీకరించారు. షూటింగ్ పూర్తయిన తర్వాతే సినిమా విడుదల తేదీని ప్రకటిస్తామని ఆయన స్పష్టం చేశారు. సూపర్ స్టార్ హై-ఆక్టేన్ యాక్షన్ అవతార్ తో మెప్పిస్తార‌ని టీజర్ ట్రైలర్‌తో అర్థ‌మైంది. యాక్షన్‌ థ్రిల్లర్‌గా రూపొందనున్న ఈ చిత్రంలో రజనీకాంత్‌ నెగటివ్‌ షేడ్స్‌ ఉన్న పాత్రలో నటిస్తున్నారు. ఈ చిత్రంలో నాగార్జున అక్కినేని, ఉపేంద్రరావు వంటి ప్రముఖ స్టార్లు కూడా కీలక పాత్రల్లో కనిపించనున్నారు. శ్రుతి హాసన్, సౌబిన్ షాహిర్, సత్యరాజ్ కీల‌క‌ పాత్రలు పోషించనున్నారు. ఈ చిత్రంలో బాలీవుడ్ స్టార్ అమీర్ ఖాన్ అతిధి పాత్రలో కనిపించనున్నారనే ఊహాగానాలు కూడా ఉన్నాయి.