మహేష్ ఇలా సర్ ప్రైజ్ ఇచ్చాడేంటీ..

టాలీవుడ్ సూపర్ స్టార్ మహేష్ బాబు.. ప్రస్తుతం దర్శకధీరుడు రాజమౌళితో చేయబోయే సినిమా కోసం మేకోవర్ చేసుకునే పనిలో ఉన్నారనే విషయం తెలిసిందే. ఎన్నడూ చూడని విధంగా SSMB 29లో మహేష్ లుక్ ఉండనున్నట్లు అర్థమవుతోంది. ప్రస్తుతం ప్రీ ప్రొడక్షన్ దశలో సినిమా ఉండగా.. రాజమౌళి షూటింగ్ లొకేషన్స్ ను ఫిక్స్ చేసే పనిలో ఉన్నట్లు తెలుస్తోంది. రీసెంట్ గా కార్తికేయతో ఆఫ్రికా వెళ్లి వచ్చారు జక్కన్న.

అయితే మహేష్ మాత్రం తనను తాను ఫుల్ గా మేకోవర్ చేసుకుంటున్నారు. గుబురు గడ్డం, లాంగ్ హెయిర్ తో కనిపిస్తున్నారు. అది కూడా పబ్లిక్ కమ్ సినిమా ఈవెంట్స్ లో కాదు. కేవలం ఎయిర్ పోర్ట్ లో ఎప్పటికప్పుడు దర్శనమిస్తున్నారు. ఆ సమయంలో ఆయన లుక్స్ క్యాప్చర్ అవుతుండగా.. నెట్టింట వైరల్ అవుతున్నాయి. ఇప్పుడు మహేష్ బాబు మాట్లాడిన వీడియో సడెన్ గా సోషల్ మీడియాలో ప్రత్యక్షమైంది. తెగ చక్కర్లు కొడుతోంది.

అందులో గ్రీన్ కో గ్రూప్ ఎండీ అనిల్ కుమార్ చలమలశెట్టికి మహేష్ బాబు పుట్టినరోజు శుభాకాంక్షలు తెలిపారు. "మీకు 50వ పుట్టినరోజు శుభాకాంక్షలు అనిల్ గారు. నాకు తెలిసిన దయగల వ్యక్తులలో మీరు ఒకరు. ఈ రోజు, రేపు మరియు ఎప్పటికీ మీ ఆనందాన్ని నేను కోరుకుంటున్నాను. ఈ ప్రత్యేకమైన రోజు మీతో జరుపుకోవడానికి వేచి ఉండలేను చీర్స్!" అని మహేష్ వీడియోలో తెలిపారు. అర్థరాత్రి ఆ వీడియోను షూట్ చేసినట్లు తెలుస్తోంది.

అయితే అనిల్ కుమార్ కపుల్ తో మహేష్, నమ్రత ప్రస్తుతం మాల్దీవుల్లో ఉన్నారు. రీసెంట్ గా వారు నలుగురూ బీచ్ లో దిగిన పిక్స్ సోషల్ మీడియాలో వైరల్ అయ్యాయి. దీంతో అనిల్, మహేష్ కుటుంబాల మధ్య సన్నిహిత సంబంధాలు ఉన్నట్లు అర్థమైంది. ఇప్పుడు మహేష్ ఆయనకు స్పెషల్ విషెస్ చెబుతున్న వీడియో వైరల్ గా మారింది. వీడియోలో ఏం మహేష్ చెప్పారో పక్కన పెడితే.. ఆయన లుక్ పై ఫ్యాన్స్ ఇప్పుడు నెట్టింట రెస్పాండ్ అవుతున్నారు.

వీడియోలో మందపాటి గడ్డం, ఫుల్ జట్టుతో మహేష్.. అల్ట్రా స్టైలిష్ మోడ్ లో కనిపిస్తున్నారు. బ్లాక్ కలర్ టీ షర్ట్ లో ఓ రేంజ్ లో ఉన్నారు. దీంతో మహేష్ లుక్ అదిరిపోయిందని ఆయన అభిమానులు చెబుతున్నారు. ఎవర్ గ్రీన్ ప్రిన్స్ అంటూ నెటిజన్లు కామెంట్లు పెడుతున్నారు. ఏజ్ పెరుగుతున్నా.. మహేష్ మాత్రం అదే లుక్స్ తో ఆకట్టుకుంటున్నారని అంటున్నారు. అదే సమయంలో SSMB 29 అప్డేట్ కోసం వెయిటింగ్ అంటూ సందడి చేస్తున్నారు.