వార్2 కోసం గొంతు ఇవ్వ‌నున్న స్టార్ హీరోలు

ఈ ఏడాది రానున్న క్రేజీ సినిమాల్లో వార్2 ఒక‌టి. ఎన్టీఆర్, హృతిక్ రోష‌న్ క‌లిసి న‌టిస్తున్న ఈ సినిమాపై భారీ హైప్ నెల‌కొంది. వీరిద్ద‌రి క‌లయిక అంటే అటు ఎన్టీఆర్ ఫ్యాన్స్ కు, ఇటు హృతిక్ రోష‌న్ ఫ్యాన్స్ కు ఎన్నో అంచ‌నాలు ఉంటాయి కాబట్టి వాట‌న్నింటినీ దృష్టిలో పెట్టుకుని డైరెక్ట‌ర్ అయాన్ ముఖ‌ర్జీ ఈ సినిమాను తెర‌కెక్కిస్తున్నాడు.

య‌ష్ రాజ్ ఫిల్మ్స్ బ్యాన‌ర్ లో భారీ బ‌డ్జెట్ తో రూపొందుతున్న ఈ పాన్ ఇండియా సినిమాకు సంబంధించి ఓ వార్త‌ నెట్టింట ప్ర‌స్తుతం తెగ వైర‌ల్ అవుతుంది. వార్2లో ఎన్టీఆర్, హృతిక్ రోష‌న్ పాత్ర‌ల‌ను ప‌రిచ‌యం చేయ‌డానికి స్టార్ హీరోలు గొంతు విప్ప‌నున్నార‌ట‌. తెలుగులో సూప‌ర్ స్టార్ మ‌హేష్ బాబు త‌న వాయిస్ ఓవ‌ర్ తో ఈ పాత్ర‌ల‌ను ప‌రిచ‌యం చేయ‌నున్న‌ట్టు తెలుస్తోంది.

ఇక హిందీలో ఆ పాత్ర‌ల‌ను ప‌రిచ‌యం చేయ‌డానికి స్టార్ హీరో ర‌ణ్‌బీర్ క‌పూర్ రంగంలోకి దిగుతున్నాడ‌ట‌. మూవీలో హీరోల క్యారెక్ట‌ర్ గురించి కొన్ని చోట్ల వాయిస్ ఓవ‌ర్ వ‌స్తుంద‌ని, సినిమాలో ఆ వాయిస్ ఓవ‌ర్ ఎంతో కీల‌క‌మ‌ని తెలుస్తోంది. ఇప్ప‌టికే వార్2 పై భారీ అంచ‌నాలుండ‌గా ఈ వార్త‌లు విన్నాక ఆ అంచ‌నాలు తారాస్థాయికి చేరాయి.

సూప‌ర్ స్టార్ మ‌హేష్ బాబు ఇప్ప‌టికే చాలా సినిమాల‌కు త‌న వాయిస్ ఓవ‌ర్ ను ఇచ్చారు. జ‌ల్సా సినిమాలో హీరో పాత్ర‌ను ప‌రిచ‌యం చేసిన మ‌హేష్ బాబు, రీసెంట్ గా ముఫాసా లయ‌న్ కింగ్ సినిమాకు కూడా త‌న వాయిస్ ఓవ‌ర్ ను అందించారు. ముఫాసాకు కేవ‌లం వాయిస్ ఓవ‌ర్ ఇచ్చినందుకే మ‌హేష్ బాబు థియేట‌ర్ల ద‌గ్గ‌ర ఆయ‌న ఫ్యాన్స్ ఫ్లెక్సీల‌ను పెట్టిన విష‌యం తెలిసిందే. ఈ నేప‌థ్యంలో ఇప్పుడు వార్2కు వాయిస్ ఓవ‌ర్ ఇస్తే ఇక ఆయ‌న ఫ్యాన్స్ హంగామా ఏ రేంజ్ లో ఉంటుందో ప్ర‌త్యేకంగా చెప్ప‌న‌క్క‌ర్లేదు. అస‌లే ఎన్టీఆర్, మ‌హేష్ మ‌ధ్య మంచి అనుబంధ‌ముంది.

ఇక వార్2 విష‌యానికొస్తే ఈ సినిమాలో హృతిక్ రోష‌న్ పాత్ర‌కు ధీటుగా ఎన్టీఆర్ పాత్ర ఉంటుంద‌ని తెలుస్తోంది. ఇండిపెండెన్స్ డే సంద‌ర్భంగా రిలీజ్ కానున్న ఈ సినిమాలో ఎన్టీఆర్ పాత్ర నెగిటివ్ షేడ్స్ క‌లిగి ఉంటుంద‌ని ఇన్‌సైడ్ టాక్. అదే నిజ‌మైతే వార్2లో ఎన్టీఆర్ న‌ట విశ్వ‌రూపం చూడొచ్చు. వార్2 షూటింగ్ పూర్త‌య్యాక ఎన్టీఆర్, ప్ర‌శాంత్ నీల్ ద‌ర్శ‌క‌త్వంలో డ్రాగ‌న్(వ‌ర్కింగ్ టైటిల్) సినిమాను సెట్స్ పైకి తీసుకెళ్ల‌నున్నాడు.