టీజ‌ర్ ట్రైల‌ర్ : 'మిషన్ ఇంపాజిబుల్‌' సిరీస్‌లో చిట్ట‌చివ‌రి విన్యాసాలు

ప్ర‌పంచంలోనే అత్యంత ప్ర‌తిష్టాత్మ‌క‌మైన ఫ్రాంఛైజీ టామ్ క్రూజ్ `మిష‌న్ ఇంపాజిబుల్` ఎండ్ స్టేజ్ కి వ‌చ్చింది. ఈ ఫ్రాంఛైజీ నుంచి చిట్ట చివ‌రి సినిమా `మిషన్ ఇంపాజిబుల్- ది ఫైనల్ రెకనింగ్` సినిమా థియేటర్ ల‌లో విడుదల కానుంది. 23 మే 2025 తేదీని అభిమానులు మార్క్ చేసి పెట్టుకోండి. ఏతాన్ హంట్‌కి ఇదే ముగింపు అని ఇప్ప‌టికే టామ్ ప్ర‌క‌టించేశారు. అంటే ప్ర‌తిష్ఠాత్మ‌క సిరీస్ నుంచి ఇక సినిమాలు రావు. ఇదే చిట్ట‌చివ‌రి చిత్రం.

మోస్ట్ అవైటెడ్ 2025 మూవీ `మిషన్: ఇంపాజిబుల్ - ది ఫైనల్ రెకనింగ్` (మొదటి మిషన్ ఇంపాజిబుల్ 8) టీజ‌ర్ ట్రైలర్ ఇప్పుడు వెబ్ లోకి వచ్చింది. ఇది వేగంగా అభిమానుల్లోకి దూసుకెళ్లింది. గ‌గుర్పొడిచే యాక్ష‌న్ విన్యాసాల‌తో టామ్ మ‌రోసారి ఆశ్చ‌ర్య‌ప‌రిచాడు. ఇప్ప‌టికీ అతడు గాల్లో ఎగిరే విమానంలో అద్భుత సాహ‌సాలు చేసేందుకు వెన‌కాడ‌క‌పోవ‌డం ఆశ్చ‌ర్య‌ప‌రిచింది. ఇందులో యాక్ష‌న్ ని మించి క‌చ్చితంగా గ‌గుర్పొడిచే థ్రిల్స్ థియేట‌ర్ల‌కు ప్ర‌జ‌ల్ని రిపీటెడ్ గా ర‌ప్పిస్తాన్న న‌మ్మ‌కం ఉంది. ఓవైపు ట్రైల‌ర్ అద్భుతంగా ఉంద‌న్న ఆనందం, మ‌రోవైపు ఈ సినిమాతో ఫ్రాంఛైజీ ముగుస్తోంద‌న్న దుఃఖం రెండూ అభిమానుల్లో క‌ట్ట‌లు తెంచుకున్నాయి. సంచ‌ల‌నాల యాక్షన్ హీరో టామ్ క్రూజ్ సూపర్ స్పై యాక్ష‌న్ అవ‌తార్ కి ముగింపు ప‌ల‌క‌డం ఎవ‌రికీ న‌చ్చ‌నిది. గూఢచారి ఈతాన్ హంట్ మళ్లీ ఈ భూమండ‌లాన్ని పెను ప్ర‌మాదం నుంచి కాపాడేందుకు ఎలాంటి సాహ‌సాలు చేసాడు? అన్న‌ది ఈ టీజ‌ర్ ట్రైల‌ర్ లో చూపించారు. బ్రియాన్ డి పాల్మా దర్శకత్వం వహించిన 1996 చలనచిత్రం `మిషన్: ఇంపాజిబుల్` నుండి ఫుటేజీని కూడా తాజా టీజ‌ర్ లో చూపించ‌డం ఉత్కంఠ‌ను పెంచుతోంది. ``మన జీవితాలు ఏ ఒక్క చర్య ద్వారా నిర్వచించలేదు. మన జీవితాలు మన ఎంపికల స‌మాహారం. మీరు ఉన్న ఈ స్థితి మీరు చేసిన ప్రతిదానికి మ‌రు స్థితి`` అని ట్రైలర్‌లో వాయిస్ ఓవర్ చెప్పారు.

ఎం.ఐ 8 కూడా ఇత‌ర సినిమాల మాదిరిగానే ఎడ్జ్-ఆఫ్-ది-సీట్ యాక్షన్ థ్రిల్ల‌ర్ అని టీజ‌ర్ చెబుతోంది. ``మీరు నన్ను చివరిసారిగా విశ్వసించాలి`` అని ఏతాన్ చెప్పడంతో అభిమానులు దీనిని జీర్ణించుకోలేని ప‌రిస్థితి ఉంది. ఈ టీజ‌ర్ కి అభిమానుల నుంచి స్పంద‌న‌లు అంతే అసాధార‌ణంగా ఉన్నాయి. ``నాకు 20 సంవత్సరాల వయస్సు ఉన్నప్పుడు, నేను సినిమాల్లో టామ్ క్రూజ్ రన్నింగ్ చూసాను. ఇప్పుడు నాకు దాదాపు 40 ఏళ్లు నిండాయి. టామ్ క్రూజ్ తన కోసం రేపు లేదు అనేలా ఇప్పటికీ సినిమాల్లో ప‌రిగెత్తుతున్నాడు`` అని ప్ర‌శంసించారు.

మిషన్ ఇంపాజిబుల్ 8 గురించి వివ‌రాల్లోకి వెళితే... ఎం.ఐ- రోగ్ నేషన్ నుండి ఈ సిరీస్‌లోని ప్రతి చిత్రానికి దర్శకత్వం వహించిన క్రిస్టోఫర్ మెక్‌క్వారీ ఈ చిత్రానికి కూడా దర్శకత్వం వహించారు. మిషన్: ఇంపాజిబుల్ 7 & 8 డెడ్ రికనింగ్ - పార్ట్ వన్ - పార్ట్ 2గా పేరు పెట్టినా త‌ర్వాత మార్చారు. ఏడవ చిత్రం విడుద‌లైన‌ తర్వాత పార్ట్ 8 టైటిల్ ని నిర్ణయించారు. మిషన్: ఇంపాజిబుల్ - ది ఫైనల్ రెకనింగ్ 23 మే 2025న థియేటర్‌లలో విడుదల కానుంది.