మోసెస్ మాణిక్‌చంద్ పార్ట్-2.. ఫస్ట్ లుక్‌తో అదిరిపోయే సర్‌ప్రైజ్

సిద్ధు జొన్నలగడ్డ బ్రదర్ చైతు జొన్నలగడ్డ క్రేజీ ప్రాజెక్టుతో ప్రేక్షకుల ముందుకు రాబోతున్నాడు. పీపుల్ మీడియా ఫ్యాక్టరీ నిర్మాణంలో చైతు జొన్నలగడ్డ ప్రధాన పాత్రలో రాబోతున్న చిత్రం ‘మోసెస్ మాణిక్‌చంద్ పార్ట్-2’. ఈ ప్రాజెక్ట్‌తో చైతు కేవలం హీరోగానే కాకుండా కథ, స్క్రీన్‌ప్లే, డైలాగ్స్ రైటర్‌గా కూడా తన ప్రతిభను చాటుకుంటున్నాడు. ఈ చిత్రానికి బొమ్మ బ్లాక్ బస్టర్ ఫేమ్ రాజ్ విరాట్ దర్శకత్వం వహిస్తున్నారు.

రీసెంట్ గా నేచురల్ స్టార్ నాని ఈ చిత్రం టైటిల్ మరియు ఫస్ట్ లుక్ పోస్టర్‌ను ఆవిష్కరించారు, అలాగే టీమ్‌కి ప్రత్యేకంగా శుభాకాంక్షలు తెలిపారు. ఈ టైటిల్ ‘మోసెస్ మాణిక్‌చంద్ పార్ట్-2’ డిఫరెంట్ గా ఉండడంతో సోషల్ మీడియాలో గట్టిగానే హైలెట్ అవుతోంది. చిల్డ్రన్స్ డే సందర్భంగా రిలీజ్ చేసిన ఈ పోస్టర్‌లో ‘హ్యాపీ నో చిల్డ్రెన్స్ డే’ అని చెప్పడం చాలా కొత్తగా ఉంది.

ఈ పోస్టర్‌ టైటిల్ డిజైనింగ్ లో మద్యం బాటిల్, క్లాప్ బోర్డ్, అమ్మాయి వైన్ గ్లాస్ వంటి అంశాలు దర్శనమిస్తున్నాయి. ఇవి కథకు సంబంధించి ఒక ప్రత్యేక అర్థాన్ని కలిగించడమే కాకుండా గ్లామర్‌తో కూడిన నైజాన్ని కూడా సూచిస్తున్నాయి. చైతు జొన్నలగడ్డ ఈ ఫస్ట్ లుక్ పోస్టర్‌లో రాజ కుర్చీపై ధీమాగా కూర్చొని, స్టైలిష్ హెయిర్ మరియు సన్ గ్లాసెస్‌తో కొత్త లుక్‌లో కనిపిస్తున్నాడు.

అతని ఒంటిమీద గల టాటూలు అతని పాత్ర స్వభావాన్ని బాగా ప్రతిబింబిస్తున్నాయి. భారీ ఆభరణాలు ధరించి, ఆత్మవిశ్వాసం ఉట్టిపడేలా ఉన్న ఈ లుక్‌లో చైతు పాత్రలోని కంటెంట్ ను ప్రేక్షకులకు పరిచయం చేసింది. ఈ చిత్రం ట్యాగ్‌లైన్ ‘అ రియల్ విలన్ ఈజ్ ఆల్వేస్ బెటర్ దేన్ ఎ ఫేక్ హీరో’ కూడా ఆసక్తి రేకెత్తించేలా ఉంది. ఈ ట్యాగ్‌లైన్ ద్వారా చైతు పాత్రలోని సంక్లిష్టతను, అతని విలనీ వైపు ఉన్న విలక్షణతను చూపుతోంది. ‘మోసెస్ మాణిక్‌చంద్ పార్ట్-2’ చిత్రం పూర్తి స్థాయి ఎంటర్‌టైనర్‌గా ప్రేక్షకులను అలరించడానికి సిద్ధంగా ఉంది.

వివేక్ కూచిభొట్ల సహ నిర్మాతగా, కృతి ప్రసాద్ క్రియేటివ్ ప్రొడ్యూసర్‌గా ఈ ప్రాజెక్ట్‌కు వ్యవహరిస్తున్నారు. సిద్దూ జొన్నలగడ్డ అన్న చైతు ప్రధాన పాత్రలో నటించడం మాత్రమే కాకుండా, కథతో పాటు స్క్రీన్‌ప్లేలో కూడా తన వంతు కృషిని చూపించాడు. ఈ చిత్రం ఇతర నటీనటులు మరియు సాంకేతిక నిపుణుల వివరాలను త్వరలో తెలియజేయనున్నారు. మరి ఈ సినిమా ఆడియెన్స్ కు ఏ రేంజ్ లో కనెక్ట్ అవుతుందో చూడాలి.