అప్పుడు 'దాన వీర శూర కర్ణ'.. ఇప్పుడు 'పుష్ప 2'..!

భారతీయ సినీ చరిత్రలోనే అత్యధిక కలెక్షన్లు సాధించిన చిత్రంగా ''పుష్ప 2: ది రూల్'' చరిత్ర సృష్టించింది. 'బాహుబలి 2' వసూళ్లను అధిగమించి నెంబర్‌ వన్‌ ఇండియన్ ఫిల్మ్‌గా నిలిచింది. ఇక 'పుష్ప 2' మరో సంచలనానికి సిద్ధమవుతోంది. జనవరి 11 నుంచి మరో 20 నిమిషాల ఫుటేజ్ తో రీలోడెడ్‌ వెర్షన్‌ ను థియేటర్లలోకి తీసుకురాబోతున్నట్లు మేకర్స్ అఫిషియల్ గా అనౌన్స్ చేశారు. దీంతో తెలుగులో రెండో లాంగెస్ట్ మూవీగా 'పుష్ప 2' అవతరించబోతోంది.

ఐకాన్‌ స్టార్‌ అల్లు అర్జున్‌, బ్రిలియంట్‌ డైరెక్టర్ సుకుమార్‌ల కలయికలో 'పుష్ప-2: ది రూల్' సినిమా తెరకెక్కింది. 3 గంటల 20 నిమిషాల రన్ టైంతో డిసెంబర్ 5వ తేదీన వరల్డ్ వైడ్ గా రిలీజ్ అయింది. ఆ సమయంలో నిడివి చాలా ఎక్కువైందనే కామెంట్లు కూడా వచ్చాయి. ఒక మాస్ మసాలా కమర్షియల్ సినిమా అన్ని గంటలు ఆడియన్స్ ను థియేటర్లో కూర్చోబెడుతుందా? అనే సందేహాలు వ్యక్తం చేశారు. అయితే పుష్పరాజ్ అందరి అనుమానాలను పటాపంచలు చేసాడు. అయితే ఇప్పుడు 'పుష్ప 2'కి అదనంగా మరో 20 నిమిషాలు యాడ్ చేయడం వల్ల, 3 గంటల 40 నిమిషాల పెద్ద సినిమా కాబోతోంది. 'పుష్ప 1' నిడివి కూడా 1 నిమిషం తక్కువ 3 గంటలు వచ్చింది.

నిజానికి తెలుగు ప్రేక్షకులకు పెద్ద నిడివి ఉన్న సినిమాలు కొత్తేమీ కాదు. 1977లో సీనియర్ ఎన్టీఆర్ స్వీయ దర్శకత్వంలో వచ్చిన 'దాన వీర శూర కర్ణ' సినిమా రన్ టైమ్ దాదాపు 3 గంటల 46 నిమిషాలు వుంది. ఇప్పటి వరకూ ఇదే అత్యంత పొడవైన తెలుగు సినిమా. ఇప్పుడు "పుష్ప 2: ది రూల్'' 3 గంటల 40 నిమిషాలతో రెండవ పొడవైన తెలుగు చిత్రంగా నిలుస్తోంది. ఈ లిస్టులో 'లవకుశ' (3 గంటల 28 నిమిషాలు), 'పాండవ వనవాసం' (3 గంటల 18 నిమిషాలు), 'పాతాళ భైరవి' (3 గంటల 15 నిమిషాలు), 'అల్లూరి సీతారామరాజు' (3 గంటల 7 నిమిషాలు), 'నిజం' (3 గంటల 7 నిమిషాలు), 'మాయాబజార్' (3 గం. 4 నిమిషాలు), మిస్సమ్మ (3 గం.1 నిమిషం) చిత్రాలు కూడా ఉన్నాయి. అర్జున్ రెడ్డి, RRR, కల్కి 2898 AD, మహానటి, మను, ప్రస్థానం, నువ్వు నాకు నచ్చావ్ లాంటి సినిమాల నిడివి కూడా మూడు గంటలకు పైగానే వుంది.

భారతదేశంలోని అత్యంత పొడవైన చిత్రాల జాబితా చూసుకుంటే.. తవమై తవమిరుండు - తమిళ్(ఒరిజినల్ కట్ 4 గంటల 35 నిమిషాలు), LOC కార్గిల్ - హిందీ(4 గంటల 15 నిమిషాలు), మేరా నామ్ జోకర్ - హిందీ (4 గంటల 4 నిమిషాలు), సంగం - హిందీ(3 గం. 58 నిమిషాలు), లగాన్ - హిందీ( 3 గం. 44 నిమిషాలు) వంటి సినిమాలు ఉన్నాయి. తెలుగు నుంచి ''దాన వీర శూర కర్ణ'' సినిమా ఒక్కటే టాప్-10 లాంగెస్ట్ మూవీస్ లిస్టులో ఉండగా.. ఇప్పుడు "పుష్ప 2: ది రూల్" సినిమా ఆ జాబితాలో చేరిపోతోంది. పైన చెప్పుకున్న చిత్రాలన్నీ ఒక భాగంగా తెరకెక్కినవే. కానీ పుష్ప రెండు భాగాలుగా వచ్చింది. 2 పార్ట్స్ కలిపితే 'పుష్ప' మొత్తం కథ 7 గంటల 40 నిమిషాలు అవుతోంది.

అయినా సినిమా నిడివి ఇన్ని గంటలే ఉండాలని రూలేం లేదు. జనాలు ఆదరిస్తారనే నమ్మకం ఉంటే ఎంత పెద్ద సినిమా అయినా తీయొచ్చు. మంచి ఆసక్తికరమైన కథ ఉండి, కథనం ఎంగేజింగ్ గా అనిపిస్తే ప్రేక్షకులు ఎంతసేపైనా థియేటర్లో కూర్చుంటాడు. బ్లాక్ అండ్ వైట్ కాలం నుంచి ఇప్పటి వరకూ అనేక చిత్రాలు ఈ విషయంలో విజయం సాధించాయి. పైన చెప్పుకున్న సినిమాలనే దీనికి ఉదాహరణగా చెప్పుకోవచ్చు. అయితే ఇటీవల కాలంలో ఏదైనా పెద్ద సినిమా వస్తుందంటే, 3 గంటలకు పైగానే నిడివి ఉంటుందని అందరూ ఫిక్స్ అయిపోయే పరిస్థితి వచ్చింది. 'పుష్ప 2' సినిమా ఫైనల్ రన్ టైమ్ 3 గం. 40 నిమిషాలు అవుతోంది. మరి రాబోయే రోజుల్లో తెలుగులో 4 గంటల పాటు కూర్చోబెట్టే సినిమాలు కూడా వస్తాయేమో చూడాలి.