నాని- పవన్ రికార్డు.. ఆ మ్యాటర్ ఏంటంటే?

టాలీవుడ్ నేచురల్ స్టార్ నాని రీసెంట్ గా సరిపోదా శనివారం మూవీతో ప్రేక్షకుల ముందుకు వచ్చిన విషయం తెలిసిందే. వివేక్ ఆత్రేయ దర్శకత్వం వహించిన ఆ సినిమా.. ఆగస్టు 29వ తేదీన విడుదలైంది. ప్రియాంక అరుల్ మోహన్ హీరోయిన్‌ గా నటించగా.. కోలీవుడ్ నటుడు ఎస్‌ జే సూర్య విలన్ గా కనిపించారు. స్టార్ ప్రొడ్యూసర్ డీవీవీ దానయ్య నిర్మాణంలో రూపొందిన ఆ సినిమా.. కంప్లీట్ యాక్షన్ ఎలిమెంట్స్ తో సందడి చేసింది.

అయితే రిలీజ్ కు ముందు మేకర్స్ విడుదల చేసిన ప్రమోషనల్ కంటెంట్ మూవీపై మంచి బజ్ క్రియేట్ చేసింది. టీజర్, ట్రైలర్.. అంచనాలు పెంచాయి. దీంతో తొలి రోజు సాలిడ్ ఓపెనింగ్స్ సాధించింది. మధ్యలో కాస్త వర్షాలు ఇబ్బంది పెట్టినప్పటికీ.. రెండో వీకెండ్ ను కూడా బాగా క్యాష్ చేసుకుంది. నాని కెరీర్ లో హిట్ గా నిలిచిన సరిపోదా శనివారం.. తెలుగు రాష్ట్రాల్లో రీసెంట్ గా బ్రేక్ ఈవెన్ టార్గెట్ పూర్తి చేసుకుంది.

ప్రస్తుతం సక్సెస్ ఫుల్ గా రన్ అవుతూ లాభాలను అందిస్తోంది. అయితే యూఎస్ మార్కెట్ లో ఎప్పుడో టార్గెట్ కొట్టేసి భారీ లాభాలు సంపాదిస్తోంది సరిపోదా శనివారం మూవీ. నార్త్ అమెరికా బాక్సాఫీస్ వద్ద ఎక్కువ సార్లు మిలియన్ డాలర్ల మార్క్ క్రాస్ చేసిన మహేష్ బాబు రికార్డును రీసెంట్ గా నాని బద్దలు కొట్టారు. తాజాగా మరో అరుదైన ఘనత సాధించారు. పవర్ స్టార్ పవన్ కళ్యాణ్ రికార్డును కూడా బ్రేక్ చేశారు.

ఇప్పటి వరకు నార్త్ అమెరికా బాక్సాఫీస్ వద్ద సరిపోదా శనివారం మూవీ 2.45 మిలియన్ డాలర్లకు పైగా వసూలు చేసింది. అలా నార్త్ అమెరికాలో పవన్ కళ్యాణ్ భీమ్లా నాయక్ లైఫ్ టైమ్ కలెక్షన్లను సరిపోదా శనివారం అధిగమించింది. ఇప్పుడు ఈ విషయం సోషల్ మీడియాలో వైరల్ గా మారింది. మరోసారి ఓవర్సీస్ లో నాని తన సత్తా చాటుకున్నారని నెటిజన్లు కామెంట్లు పెడుతున్నారు. దటీజ్ నాని అని అంటున్నారు.

ఇక నాని కెరీర్ విషయానికొస్తే, గత ఏడాది దసరా, హాయ్ నాన్న సినిమాలతో హిట్స్ అందుకున్న నేచురల్ స్టార్.. ఇప్పుడు సరిపోదా శనివారంతో తన ఖాతాలో వేసుకున్నారు. రీసెంట్ గా హిట్-3 మూవీని అనౌన్స్ చేశారు. హంటర్స్ కమాండ్ పేరుతో వీడియో కూడా విడుదల చేశారు. దాంతోపాటు ఓజీ ఫేమ్ సుజిత్ తో ఒక మూవీ, దసరా డైరెక్టర్ శ్రీకాంత్ ఓదెలతో మరో చిత్రం.. ఆయన లైనప్ లో ఉన్నాయి. మరి నాని అప్ కమింగ్ చిత్రాలతో ఎలాంటి విజయం సాధిస్తారో చూడాలి.