‘సంభార్‌’లో దిగిన హీరో నాని

గతంలో హాలీవుడ్‌లోనే కనిపించే మూవీ ఫ్రాంచైజీలు ఇప్పుడు తెలుగు సినిమా పరిశ్రమలో కూడా కనిపిస్తున్నాయి. అందులో నేచురల్ స్టార్ నాని నిర్మాణంలో వస్తున్న HIT సిరీస్ ఒకటి. శైలేష్ కొలను దర్శకత్వంలో వచ్చిన ‘హిట్: ది ఫస్ట్ కేస్’లో విశ్వక్ సేన్ హీరోగా నటించాడు. ఆ తర్వాత వచ్చిన ‘హిట్: ది సెకెండ్ కేస్’లో అడివి శేష్ నటించాడు. ఈ రెండూ భారీ విజయాన్ని సొంతం చేసుకున్నాయి.

మొదటి రెండు భాగాలు ప్రేక్షకుల ఆదరణను సొంతం చేసుకోవడంతో ఇప్పుడు ‘హిట్ ది థర్డ్ కేస్’ను రూపొందిస్తున్నారు. ఇందులో నేచురల్ స్టార్ నాని హీరోగా చేస్తున్న విషయం తెలిసిందే. ఇప్పటికే దీనికి సంబంధించిన షూటింగ్ కూడా మొదలైంది. అంతేకాదు, చాలా వరకూ టాకీ పార్టును సైతం కంప్లీట్ చేసుకున్నారు. మిగిలిన దాన్ని కూడా వీలైనంత త్వరగా పూర్తి చేసేలా సన్నాహాలు చేస్తున్నారు.

నేచురల్ స్టార్ నాని - శైలేష్ కొలను కాంబినేషన్‌లో తెరకెక్కుతోన్న ‘హిట్: ది థర్డ్ కేస్’ మూవీకి సంబంధించిన షూటింగ్ ప్రస్తుతం రాజస్థాన్‌లోని జైపూర్‌కు 80 కిలోమీటర్ల దూరంలో ‘సంభార్’ అనే ఉప్పు నీటి సరస్సు దగ్గర జరుగుతోంది. ఇందులో హీరో నానిపై కొన్ని కీలకమైన సన్నివేశాలను చిత్రీకరించడంతో పాటు యాక్షన్ సీక్వెన్స్‌లను కూడా ప్లాన్ చేసినట్లు తెలిసింది.

‘సంభార్’ ఉప్పు నీటి సరస్సుపై ‘హిట్: ది థర్డ్ కేస్’ మూవీకి సంబంధించిన షూటింగ్ మరో రెండు వారాల పాటు జరగబోతుందని కూడా తెలిసింది. అయితే, గతంలో ఈ ప్రాంతంలో ఏ ఇండియన్ సినిమాకు కూడా షూటింగ్ జరగలేదు. దీంతో ఇప్పుడు నాని మూవీ కోసం ఇంత రిస్క్ ఎందుకు చేస్తున్నారు అన్నది ఆసక్తికరంగా మారింది. దీంతో ఇప్పుడీ వార్త టాలీవుడ్ వర్గాల్లో చర్చనీయాంశం అయింది.

ఇక, ‘సంభార్’ అనేది భారతదేశంలోనే పెద్ద లోతట్టు ఉప్పు సరస్సు అని చాలా మందికి తెలీదు. ఇందులో మంథా, రూపన్ గడ్, ఖరీ, ఖండేలా, మొడ్తా, సమోద్ వంటి ఆరు నదుల నీరు వచ్చి చేరుతుంది. 96 కిలో మీటర్లు ఉన్న ఈ సరస్సు 5700 చదరపు కిలోమీటర్లలో విస్తరించి ఉంటుంది. అక్కడ ఉష్ణోగ్రతల్లో కూడా చాలా తేడాలు కనిపిస్తుంటాయి. అలాంటి సరస్సులో నాని సినిమా షూటింగ్ చేయడం చాలా మందిని ఆశ్చర్యపరుస్తోంది.

నాని - శైలేష్ కొలను కాంబినేషన్‌లో రాబోతున్న ‘HIT: ది థర్డ్ కేస్’ సినిమాను నేచురల్ స్టార్ సమర్పణలో వాల్ పోస్టర్ బ్యానర్‌పై ప్రశాంతి తిపిర్నేని నిర్మిస్తున్నారు. దీనికి మిక్కీ జే మేయర్ సంగీతాన్ని సమకూర్చుతున్నాడు. ఈ చిత్రంలో శ్రీనిధి శెట్టి హీరోయిన్‌గా చేస్తోంది. ఈ మూవీ వచ్చే ఏడాది మే 1వ తేదీన రిలీజ్ కాబోతుంది.