నాని - శ్రీకాంత్.. టైటిల్ తోనే కిక్కిచ్చేలా..

తెలుగు సినీ ఇండస్ట్రీలో విభిన్న పాత్రలతో ప్రేక్షకుల్ని అలరిస్తూ వస్తున్న నేచురల్ స్టార్ నాని, మరోసారి డిఫరెంట్ స్టైల్ లో ఆశ్చర్యపరచడానికి సిద్ధమయ్యాడు. దసరా వంటి బ్లాక్ బస్టర్ తర్వాత నాని, దర్శకుడు శ్రీకాంత్ ఓదేలతో కలిసి మరో ప్రాజెక్ట్ చేస్తున్నాడు. ఈ ప్రాజెక్ట్‌కు “ద ప్యారడైజ్” అనే టైటిల్ ఖరారు చేయబడింది. త్వరలోనే షూటింగ్ స్టార్ట్ చేయబోతున్న సందర్భంగా ఈ టైటిల్ పోస్టర్‌ను విడుదల చేసి ఫ్యాన్స్‌కు సర్‌ప్రైజ్ ఇచ్చారు.

ప్యారడైజ్ అనే టైటిల్ పై గత రెండు మూడు రోజుల నుంచి అనేక రకాల గాసిప్స్ వస్తున్నాయి. మొదట వేరే రెండు టైటిల్స్ చర్చల్లోకి వచ్చినప్పటికీ దర్శకుడు కథకు తగ్గట్టుగా ఇదే సెట్టవుతుందని అఫీషియల్ గా ఒక క్లారిటీ ఇచ్చేశారు. పోస్టర్ లో చూపించిన విధంగా ఈ చిత్ర కథ పూర్తిగా హింసాత్మకత, రక్తపాతం చుట్టూ తిరుగుతుంది అని స్పష్టమవుతోంది. చార్మినార్ బ్యాక్‌డ్రాప్‌ సింబల్ ను కూడా హైలెట్ చేశారు. ఇక గన్నులు కూడా ఉన్నాయి.

హైదరాబాద్ మాఫియా బ్యాక్ డ్రాప్ లో ఈ సినిమా ఉంటుందని సమాచారం. నాని ఈ కథలో అత్యంత పవర్‌ఫుల్ రోల్‌తో ఉంటాడని అర్ధమవుతుంది. అంతే కాకుండా కథను మరింత ఎమోషనల్‌, వైలెంట్ షేడ్స్‌ తో ప్రేక్షకుల ముందుకు తీసుకురానున్నారు. ఈ సినిమాకి అద్భుతమైన సంగీతం అందించేందుకు అనిరుద్ రవిచందర్‌ను మ్యూజిక్ డైరెక్టర్‌గా ఎంచుకున్నారు. జెర్సీ, గ్యాంగ్ లీడర్ వంటి సినిమాల్లో నాని-అనిరుద్ కాంబినేషన్ ప్రేక్షకులను ఆకట్టుకుంది.

ఇప్పుడు ఈ సినిమా కోసం అనిరుద్ మరింత ఇంటెన్స్ బ్యాక్‌గ్రౌండ్ మ్యూజిక్ అందించనున్నారు. ఎస్ఎల్వీ సినిమాస్ బ్యానర్ పై సుధాకర్ చెరుకూరి భారీ బడ్జెట్‌తో నిర్మిస్తున్న ఈ చిత్రం, నాని కెరీర్‌లోనే అత్యంత ఖరీదైన ప్రాజెక్ట్‌గా నిలవనుంది. నిర్మాత సుధాకర్ చెరుకూరి ఈ సినిమాను అత్యున్నత స్థాయిలో తీసుకురావడానికి ప్రతిష్టాత్మకంగా వ్యవహరిస్తున్నారు. కథ, స్క్రీన్ ప్లే పరంగా కూడా ఈ చిత్రం ప్రేక్షకుల్ని ఆకట్టుకునే విధంగా రూపొందుతోంది.

ఇక ఈ సినిమాలోని ఇతర నటీనటులు, సాంకేతిక నిపుణుల వివరాలు త్వరలో వెల్లడించనున్నారు. ప్యాన్ ఇండియా స్థాయిలో రూపొందుతున్న సినిమా కావడంతో క్యాస్టింగ్ గట్టిగానే ఉంటుందని అర్ధమవుతుంది. చూస్తుంటే ఈ సినిమా తెలుగు చిత్రసీమలో మరో సరికొత్త రికార్డు సాధించే అవకాశం ఉందనిపిస్తోంది. ఇక మరోవైపు నాని హిట్ 3 తో బిజీగా ఉన్న విషయం తెలిసిందే. ఆ సినిమా అనంతరం వెంటనే శ్రీకాంత్ ప్రాజెక్టుకు షిఫ్ట్ కానున్నాడు.