ట్రైలర్ టాక్.. పంజా డైరెక్టర్ న్యూ లవ్ డోస్

ఇండియన్ సినిమా పరిశ్రమలో తనకంటూ ఒక ప్రత్యేకమైన స్టార్ ఇమేజ్ ను అందుకున్న దర్శకులతో స్టార్ డైరెక్టర్ శంకర్ ఒకరు. ఇక ఆయన కూతురు అదితి శంకర్‌ గా ఇండస్ట్రీలో నిలదొక్కుకునేందుకు ప్రయత్నం చేస్తోంది. మొదట సింగర్‌గా తన కెరీర్‌ను ఆరంభించిన అదితి, ఇప్పుడు హీరోయిన్‌గా తనకంటూ ప్రత్యేక స్థానం సంపాదించుకుంటోంది. తెలుగులో ప్రముఖ నటుడు బెల్లంకొండ సాయి శ్రీనివాస్ సరసన 'భైరవం' చిత్రంతో అదితి పరిచయం అవుతున్న విషయం తెలిసిందే.

ఇప్పుడు, ఆమె నటించిన తమిళ చిత్రం 'నేసిప్పయా' తెలుగులో 'ప్రేమిస్తావా' పేరుతో విడుదలకు సిద్ధమైంది. 'నేసిప్పయా' చిత్రానికి దర్శకుడు విష్ణువర్ధన్, గతంలో పవన్ కళ్యాణ్‌తో 'పంజా' సినిమాను డైరెక్ట్ చేశాడు. ఆ తరువాత తమిళంలో అలాగే హిందీలో బిజీగా మారిన విష్ణు వర్ధన్ ఇప్పుడు న్యూ యాక్షన్ లవ్ స్టోరీతో రాబోతున్నాడు.. పూర్తిస్థాయి ప్రేమకథా చిత్రం మాత్రమే కాకుండా యాక్షన్ మరియు ఎమోషనల్ ఎలిమెంట్స్‌తో నిండిపోయి ఉంటుంది.

తమిళనాడులో సంక్రాంతి సందర్భంగా విడుదలైన ఈ చిత్రం ఇప్పుడు తెలుగు ఆడియెన్స్ ముందుగా రాబోతోంది. మైత్రి మూవీ మేకర్స్ ఈ సినిమాను తెలుగులో రిలీజ్ చేస్తుండడం విశేషం. ఇక ఈ సందర్భంగా ట్రైలర్ ను రిలీజ్ చేశారు. అయితే, సినిమాలో అదితి శంకర్ నటన గురించి అందరూ ప్రత్యేకంగా చెప్పుకున్నారు. ఆమె నటనతో పాటు కొత్త హీరో ఆకాశ్ మురళి కూడా తనదైన ముద్ర వేయగలిగాడనే కామెంట్స్ వస్తున్నాయి. వీరితో పాటు శరత్ కుమార్, ఖుష్బూ, కల్కి కొచ్చిన్ వంటి ముఖ్య నటులు ఈ సినిమాలో భాగమయ్యారు.

ఇప్పుడీ సినిమాను తెలుగులో 'ప్రేమిస్తావా' పేరుతో డబ్ చేసి విడుదల చేయాలని మేకర్స్ నిర్ణయించారు. ఇటీవల విడుదలైన తెలుగు ట్రైలర్ సినిమా మీద ఆసక్తిని మరింత పెంచింది. ట్రైలర్‌లో ప్రేమ, ఎమోషన్, సంఘర్షణ, యాక్షన్ వంటి అంశాలు బలంగా నిండాయి. ఇది ఒక ప్రేమ కథ మాత్రమే కాకుండా, కొన్ని ఆసక్తికరమైన మలుపులతో ప్రేక్షకులను ఆకట్టుకోవాలని ప్రయత్నిస్తోంది. ప్రేయసి కోసం ఎంత దూరమైనా వెళ్లే ప్రేమికుడి ఎదురైన అనుభవాలు ఏంటి? అలాగే హఠాత్తుగా ఎందుకు బ్రేకప్ చెప్పాల్సి వచ్చింది? ఆ తరువాత జరిగిన పరిణామాలు ఏంటి అనే పాయింట్స్ ట్రైలర్ ద్వారా ఆసక్తిని కలిగించాయి.

ఇక తెలుగు ప్రేక్షకుల వద్ద ఇదే సినిమా కొత్తగా నిలవగలదా అనేది ఆసక్తికరంగా మారింది. కొన్ని చిత్రాలు వేరే భాషల్లో విజయవంతం అవ్వడమే కాకుండా, కొత్త మార్కెట్‌ను అందుకోవడంలో సహాయపడతాయి. 'ప్రేమిస్తావా' కూడా తెలుగు ప్రేక్షకులకు కొత్త అనుభవాన్ని అందించి విజయవంతం కావాలని చిత్ర బృందం ఆశిస్తోంది. ఈ నెల 30న 'ప్రేమిస్తావా' తెలుగు ప్రేక్షకుల ముందుకు రాబోతుంది. అదితి శంకర్‌కు ఇది తెలుగులో మంచి ఆరంభాన్ని అందిస్తుందని అనిపిస్తుంది. మరి ఈ సినిమా ఏ రేంజ్‌లో ప్రేక్షకుల ఆదరణ పొందుతుందో చూడాలి.