పుష్ప 2 మొదటి రోజు TNలో 3500 షోలు

పాట్నాలో ఉరుములు మెరుపుల‌తో కూడిన ఘ‌న‌ స్వాగతం లభించిన తర్వాత అల్లు అర్జున్ `పుష్ప: ది రూల్` బృందం ఈ చిత్రాన్ని ప్రమోట్ చేయడానికి చెన్నైకి వెళ్లింది. సాయి రామ్ ఇంజినీరింగ్ కాలేజీలో లియో ముత్తు ఇండోర్ స్టేడియంలో ఈ సాయంత్రం మెగా ఈవెంట్ కోసం అల్లు అర్జున్, ర‌ష్మిక మంద‌న్న‌, శ్రీలీల వంటి తార‌లు అటెండ‌య్యారు. ఈ వేడుక‌లో శ్రీ‌లీల స్పెష‌ల్ సాంగ్ `కిస్సిక్`ను విడుదల చేయనున్నారు.

పాట్నా ఈవెంట్‌లో ట్రైల‌ర్ ని విడుద‌ల చేయ‌గా అద్భుత స్పంద‌న వ‌చ్చింది. ఇప్పుడు చెన్నై ఈవెంట్ కి కిస్సిక్ ప్ర‌త్యేక ఆక‌ర్ష‌ణ కానుంది. త‌ర్వాత‌ నవంబర్ 25న కొచ్చిలో పుష్ప 2ని ప్రమోట్ చేయాలని టీమ్ ప్లాన్ చేసింది. మైత్రీ మూవీ మేకర్స్ నిర్మించిన‌ ఈ చిత్రం మూడేళ్ల నిరీక్ష‌ణ ఫ‌లించి చివ‌రికి డిసెంబర్ 5న విడుదల కానుంది. పుష్ప 2 కోసం చెన్నై ఈవెంట్‌లో బ‌న్ని, ర‌ష్మిక మంద‌న్న ఇత‌ర చిత్ర‌బృంద స‌భ్యులు అటెండ‌య్యారు.

ఆస‌క్తిక‌రంగా నిర్మాత అర్చన కల్పతికి చెందిన‌ AGS ఎంటర్‌టైన్‌మెంట్ త‌మిళ‌నాడులో పుష్ప‌ 2ని పంపిణీ చేయనుంది. చెన్నై ఈవెంట్‌లో అర్చ‌న క‌ల్ప‌తి మాట్లాడుతూ, ``ఈ చిత్రాన్ని దాదాపు 800 స్క్రీన్‌లలో విడుదల చేయడానికి ప్లాన్ చేస్తున్నాము. మొదటి రోజు తమిళనాడులో 3,500 షోలు వేయడానికి ప్లాన్ చేస్తున్నాము. ద‌ళ‌పతి విజయ్ నటించిన GOAT బ్లాక్ బస్టర్ హిట్ అయ్యింది. పుష్ప కూడా అంత‌టి విజ‌యం సాధిస్తుంద‌ని ఆశిస్తున్నాము`` అన్నారు. పుష్ప 2 చెన్నై ఈవెంట్ కి అల్లు అర్జున్ గ్రాండ్ ఎంట్రీ ఇవ్వ‌గా, అభిమానుల నుంచి ఘన స్వాగతం లభించింది. బ‌న్ని వేదిక వ‌ద్ద‌ పూర్తిగా నలుపు రంగు దుస్తులలో కనిపించాడు. ర‌ష్మిక మందన్న వేదిక వ‌ద్ద సంద‌డి చేసారు.