'పుష్ప 2' అరాచకం ఖాయం... ఇదే సాక్ష్యం

అల్లు అర్జున్‌, సుకుమార్‌ కాంబోలో రూపొందుతున్న పుష్ప 2 సినిమా డిసెంబర్‌ 5న ప్రేక్షకుల ముందుకు రాబోతుంది. ఇప్పటికే వచ్చిన టీజర్ సినిమా స్థాయిని అమాంతం పెంచేసింది. ఇప్పుడు రాబోతున్న ట్రైలర్‌ సినిమాకి ఏ స్థాయి హైప్‌ ను తీసుకు వస్తుందో అంటూ అంతా ఆసక్తిగా ఎదురు చూస్తున్నారు. ఇప్పటికే సినిమాకు పతాక స్థాయిలో ఉన్న హైప్‌ ను మరింత పెంచాలి అంటే ట్రైలర్‌లో కంటెంట్‌ అరాచకం అన్నట్లుగా ఉండాలి. అలా ఉంటేనే ప్రేక్షకులు ఒప్పుకుంటారు, ఫ్యాన్స్ సంతోష పడతారు. ఆ విషయం సుకుమార్‌ కి బాగా తెలుసు. అందుకే పుష్ప 2 ట్రైలర్‌ మరో లెవల్‌ అన్నట్లుగా ఉండే విధంగా కట్‌ చేశాడట.

బీహార్‌లో ట్రైలర్‌ను విడుదల చేసేందుకు భారీ ఈవెంట్‌ ను నిర్వహించబోతున్నారు. ఇప్పటికే బీహార్‌ రాజధాని పాట్న నగరంలో భారీ ఏర్పాట్లతో కుమ్మేస్తున్నారు. ఒక సౌత్‌ ఇండియన్ మూవీకి ఎప్పుడూ జరగని స్థాయిలో పాట్నాలో సినిమా వేడుక జరిపేందుకు ఏర్పాట్లు దాదాపు పూర్తి అయ్యాయి. ఇప్పటికే కొందరు యూనిట్‌ సభ్యులు అక్కడకు చేరుకున్నారు. రేపు ఉదయం మొత్తం యూనిట్‌ సభ్యులు పాట్నా చేరుకుంటారు. సాయంత్రం జరగబోతున్న ఈవెంట్‌ కోసం అల్లు అర్జున్‌ ఎంట్రీని భారీగా ప్లాన్‌ చేస్తున్నారు. ట్రైలర్‌ ను ఆ భారీ ఈవెంట్‌లో రిలీజ్‌ చేయడం ద్వారా భారీ రీచ్ ఉండే అవకాశాలు ఉన్నాయి.

ట్రైలర్‌ రిలీజ్‌కి సంబంధించిన పోస్టర్‌ను తాజాగా విడుదల చేయడం జరిగింది. ఆ పోస్టర్‌లో అల్లు అర్జున్‌ గొడ్డల్లు పట్టుకుని ఉన్న తీరు చూస్తే బాబోయ్‌ అనిపిస్తుంది. ఈ స్థాయిలో అల్లు అర్జున్‌ ట్రైలర్‌ ఉండబోతుందా అనిపిస్తుంది. తప్పకుండా భారీ ఎత్తున ఈ సినిమాకి అంచనాలు పెంచే విధంగా ట్రైలర్‌ ఉంటుంది అంటూ మేకర్స్‌ ఈ పోస్టర్‌ తో చెప్పకనే చెప్పారు. అల్లు అర్జున్‌ అభిమానులు మాత్రమే కాకుండా ప్రతి ఒక్కరు సైతం పుష్ప 2 సినిమాను చూడాలి అని కోరుకునే విధంగా సినిమా ఉంటుంది అంటూ మేకర్స్‌ చెబుతున్నారు.

రష్మిక మందన్న హీరోయిన్‌గా నటిస్తున్న ఈ సినిమాలో కిస్సిక్ అంటూ సాగే ఐటెం సాంగ్‌ను శ్రీలీలతో చేయించారు. బాలీవుడ్‌ నుంచి ముద్దుగుమ్మను దించాలని భావించినా కొన్ని కారణాల వల్ల శ్రీలీల ఎంట్రీ ఇచ్చింది. ప్రస్తుతం సినిమాకు సంబంధించిన చివరి దశ షూటింగ్‌ జరుగుతోంది. మరో వారం రోజుల పాటు షూటింగ్‌ జరపాల్సి ఉందని తెలుస్తోంది. దేవి శ్రీ ప్రసాద్‌ సంగీతాన్ని అందిస్తున్న ఈ సినిమా పాటలు ఇప్పటికే మంచి విజయాన్ని సొంతం చేసుకున్నాయి. ట్రైలర్‌లో ఈయన బ్యాక్ గ్రౌండ్‌ స్కోర్‌ అదరగొట్టాడని తెలుస్తోంది. మొత్తంగా సినిమాకి దేవి శ్రీ ప్రసాద్‌ సంగీతం ప్రత్యేక ఆకర్షణగా నిలవడం ఖాయం అనిపిస్తుంది. వెయ్యి కోట్లకు పైగా ప్రీ రిలీజ్ బిజినెస్ చేసిన ఈ సినిమా బాహుబలి 2 ని మించిన వసూళ్లు సాధిస్తుంది అనే నమ్మకం ప్రతి ఒక్కరు వ్యక్తం చేస్తున్నారు.