మరో ఇంట్రస్టింగ్ మూవీతో ట్యాలెంటెడ్‌ నటుడు

ఈ మధ్య కాలంలో కోలీవుడ్ తో పాటు సౌత్ సినీ ప్రేక్షకులను తన నటన మరియు దర్శకత్వంతో అలరిస్తున్న రాధాకృష్ణన్‌ పార్తీపన్‌ మరో విభిన్న చిత్రంతో ప్రేక్షకుల ముందుకు వచ్చేందుకు రెడీ అవుతున్నాడు. ఈయన నటుడిగా మరియు దర్శకుడిగా చేసిన ఇరవిన్ నిళల్‌ చిత్రంకు విమర్శకుల ప్రశంసలు దక్కిన విషయం తెల్సిందే.

ఇప్పుడు అదే జోష్ తో టీన్స్ అనే విభిన్నమైన కాన్సెప్ట్‌ ఓరియంటెడ్‌ సినిమాను రూపొందించేందుకు రెడీ అయ్యాడు. ఈయన ఆ సినిమాలో కూడా కీలక పాత్రలో కనిపించబోతున్నట్లుగా సమాచారం అందుతోంది. గతంలో పలు అవార్డులను, రివార్డులను సొంతం చేసుకోవడంతో పాటు కమర్షియల్‌ విజయాన్ని సొంతం చేసుకున్న ఈయన మరోసారి అలాంటి సినిమానే చేయబోతున్నాడు.

థ్రిల్లర్ కథాంశంతో రాధాకృష్ణన్‌ పార్తీపన్ రూపొందించబోతున్న టీన్స్ సినిమాను పలువురు ప్రముఖ నిర్మాతలు కలిసి నిర్మించేందుకు ముందుకు వస్తున్నారు. ఈ సినిమాకు ఇమ్మాన్ సంగీతాన్ని అందించబోతున్నాడు అంటూ ఇప్పటికే అధికారికంగా ప్రకటించారు.

తాజాగా ఈ సినిమా గురించి రాధాకృష్ణ పార్తీపన్‌ ఒక మీడియా సందేశం విడుదల చేశాడు. అందులో ఆయన మాట్లాడుతూ... గత 30 ఏళ్లుగా నన్ను ఆదరిస్తున్నందుకు కృతజ్ఞతలు. త్వరలో నా నుంచి రాబోతున్న టీన్స్ సినిమాకు కూడా మీ యొక్క ఆదరాభిమానాలు ఉంటాయని ఆశిస్తున్నాను అన్నాడు.