చరణ్.. ఇట్స్ RC 16 టైమ్..

టాలీవుడ్ స్టార్ హీరో రామ్ చరణ్.. ఆర్ ఆర్ ఆర్ తర్వాత సోలోగా గేమ్ ఛేంజర్ మూవీతో ప్రేక్షకుల ముందుకు వచ్చేందుకు సిద్ధమవుతున్న విషయం తెలిసిందే. కోలీవుడ్ స్టార్ డైరెక్టర్ శంకర్ తెరకెక్కిస్తున్న ఆ మూవీ.. ప్రస్తుతం పోస్ట్ ప్రొడక్షన్ వర్క్ జరుపుకుంటోంది. వచ్చే ఏడాది సంక్రాంతి కానుకగా జనవరి 10వ తేదీన విడుదల అయ్యేందుకు రెడీ అవుతోంది.

అయితే చరణ్.. నెక్స్ట్ ఉప్పెన ఫేమ్ బుచ్చిబాబు సానాతో వర్క్ చేయనున్న విషయం తెలిసిందే. కొద్దిరోజుల క్రితం హైదరాబాద్ లో RC 16 పూజా కార్యక్రమాలు ఘనంగా జరిగాయి. రీసెంట్ గా మూవీ షూటింగ్ కూడా స్టార్ట్ అయినట్లు డైరెక్టర్ బుచ్చిబాబు సోషల్ మీడియాలో పోస్ట్ చేశారు! మైసూర్ చాముండేశ్వరి దేవి ఆలయం వెలుపల స్క్రిప్ట్ పేపర్స్ పట్టుకుని దిగిన పిక్ ను షేర్ చేశారు.

ఇదొక బిగ్ డే అని.. ఎప్పటి నుంచో ఎదురు చూస్తున్న టైమ్ వచ్చిందని ట్వీట్ చేశారు. మైసూరులో షూటింగ్ స్టార్ట్ అయినట్లు పరోక్షంగా తెలిపారు. ఫస్ట్ షెడ్యూల్ లో కీలక సన్నివేశాలను చిత్రీకరిస్తున్నట్లు తెలుస్తోంది. ఇప్పుడు రామ్ చరణ్ మైసూరు బయలుదేరి వెళ్ళారు. రేపటి నుంచి షూటింగ్ లో పాల్గొంటారని సమాచారం. అయితే హైదరాబాద్ నుంచి మైసూరు వెళ్ళే క్రమంలో.. ఎయిర్ పోర్ట్ లో చరణ్ కనిపించిన విజువల్స్ ఇప్పుడు సోషల్ మీడియాలో వైరల్ గా మారాయి.

దీంతో మెగా అభిమానులు ఫుల్ ఖుషీ అయిపోతున్నారు. షూటింగ్ త్వరగా కంప్లీట్ చేసేయండి అన్నా అంటూ కామెంట్స్ పెడుతున్నారు. వెయిటింగ్ ఫర్ క్రేజీ అప్డేట్స్ అంటూ సందడి చేస్తున్నారు. అయితే ఇప్పటికే RC 16పై ఆడియన్స్ లో భారీ అంచనాలు నెలకొన్నాయి. ఉత్తరాంధ్ర బ్యాక్‌ డ్రాప్‌ లో సాగే విలేజ్ స్పోర్ట్స్ యాక్షన్ డ్రామాగా మూవీని బుచ్చిబాబు రూపొందించనున్నట్లు సమాచారం.

మూవీకి పెద్ది అనే టైటిల్ ను ఖరారు చేసినట్లుగా ఎప్పటి నుంచో వార్తలు వినిపిస్తున్నాయి. అయితే చరణ్ ను సినిమాలో పవర్ ఫుల్ గా చూపించేందుకు బుచ్చిబాబు ప్లాన్ చేస్తున్నట్లుగా తెలుస్తోంది. రా అండ్ రస్టిక్ గా చూపించనున్నట్లు సమాచారం. అందుకు తగ్గట్లే చరణ్ మేకోవర్ అవుతున్నట్లు క్లియర్ గా కనబడుతోంది. ఫుల్ గా వర్కౌట్ చేస్తున్నట్లు అర్థమవుతోంది.

ఇక మూవీ విషయానికొస్తే.. చరణ్ సరసన బాలీవుడ్ బ్యూటీ జాన్వీ కపూర్ హీరోయిన్ గా నటిస్తున్నారు. టాలీవుడ్ నటుడు జగపతి బాబు కీలక పాత్రలో కనిపించనున్నారు. ఆస్కార్ విన్నింగ్ మ్యూజిక్ డైరెక్టర్ ఏ ఆర్ రెహమాన్ సంగీతం అందిస్తున్నారు. సుకుమార్ రైటింగ్స్‌, వృద్ధి సినిమాస్ తో కలిసి బడా నిర్మాణ సంస్థ మైత్రీ మూవీ మేకర్స్ బ్యానర్‌ గ్రాండ్ గా నిర్మిస్తోంది. మరి RC 16 ఎప్పుడు రిలీజ్ అవుతుందో వేచి చూడాలి.