పుట్టిన రోజున పుణ్యక్షేత్రంలో చరణ్‌

మెగా పవర్‌ స్టార్‌ రామ్‌ చరణ్‌ పుట్టిన రోజు నేడు. ఈ సందర్భంగా మెగా ఫ్యాన్స్ పెద్ద ఎత్తున తెలుగు రాష్ట్రాలతో పాటు ప్రపంచవ్యాప్తంగా వేడుకలు నిర్వహిస్తున్నారు. కేక్‌ కట్టింగ్స్ మొదలుకని సేవా కార్యక్రమాల వరకు ఎన్నో చేస్తున్నారు. మరో వైపు మగధీర సినిమా రీ రిలీజ్ చేస్తున్న విషయం తెల్సిందే.

ఇక రామ్‌ చరణ్‌ తన భార్య ఉపాసన మరియు పాప క్లింకార తో కలిసి తిరుమల శ్రీవారిని దర్శించుకున్నారు. బుధవారం వీఐపీ ప్రారంభ దర్శనంలో రామ్‌ చరణ్ దంపతులు శ్రీవారిని దర్శించుకుని ప్రత్యేక పూజలో పాల్గొన్నారు. టీటీడీ అధికారులు చరణ్ దంపతులకు సాదర స్వాగతం పలికారు.

స్వామి వారి దర్శనం అనంతరం రామ్‌ చరణ్ దంపతులు బయటకు వచ్చిన సమయంలో మీడియా వారు పెద్ద ఎత్తున వారిని చుట్టుముట్టి పోటోలు తీసేందుకు పోటీ పడ్డారు. ఉపాసన ఒడిలో క్లింకార ఉంది. ఆమె ఫేస్ కనిపించకుండా ఉపాసన తన చీర కొంగులో చుట్టుకున్నారు.

రామ్‌ చరణ్ మరియు ఉపాసన దంపతులు సాంప్రదాయ వస్త్రాల్లో చూసి ఫ్యాన్స్ ఫిదా అవుతున్నారు. సోషల్‌ మీడియాలో చరణ్ బర్త్‌ డే స్పెషల్‌ ఫోటోలుగా ఈ ఫోటోలు వైరల్‌ అవుతున్నాయి. ఈ సందర్భంగా అయినా క్లింకార ఫేస్ ను రివీల్ చేసి ఉంటే బాగుండేది అన్నట్టు కొందరు అభిప్రాయం వ్యక్తం చేస్తున్నారు.

ఇక నేడు రామ్‌ చరణ్‌ నటిస్తున్న గేమ్‌ చేంజర్ సినిమా నుంచి పాట విడుదల అవ్వబోతుంది. మగధీర సినిమా స్క్రీనింగ్ అవుతున్న ప్రతి థియేటర్ లో కూడా గేమ్‌ చేంజర్ పాటను ప్రేక్షకులకు అదనంగా చూపించబోతున్నారు. మరో వైపు బుచ్చిబాబు దర్శకత్వంలో కూడా చరణ్‌ సినిమా చేస్తున్న విషయం తెల్సిందే. ఆ సినిమా అప్‌డేట్ లేదా పోస్టర్‌ ఏమైనా నేడు వస్తుందేమో చూడాలి.