సూపర్‌ హిట్‌ మూవీ సూపర్‌ అప్‌డేట్‌

కన్నడ స్టార్‌ రిషబ్‌ శెట్టి ప్రధాన పాత్రలో నటించి స్వీయ దర్శకత్వంలో రూపొందించిన 'కాంతార' సినిమా ఏ స్థాయి విజయాన్ని సొంతం చేసుకుందో ప్రత్యేకంగా చెప్పనక్కర్లేదు. చిన్న సినిమాగా వచ్చిన 'కాంతార' సినిమా బాక్సాఫీస్ వద్ద ఏకంగా రూ.400 కోట్ల వసూళ్లు నమోదు చేసింది. కొన్ని పదుల రెట్ల లాభాలను నిర్మాతలకు తెచ్చి పెట్టిన కాంతార సినిమాకు సీక్వెల్‌ రావాలని ప్రేక్షకులు కోరుకున్నారు. అంతా కోరుకున్నట్లుగానే కాంతార 2 రాబోతున్న విషయం తెల్సిందే. కాంతార లో చూపించిన కథకు ముందు జరిగే కథతో కాంతార : చాప్టర్‌ 1 టైటిల్‌తో ప్రేక్షకుల ముందుకు తీసుకు రాబోతున్నారు.

'కాంతార'ను లో బడ్జెట్‌ మూవీగా తీసుకు వచ్చిన రిషబ్‌ శెట్టి ఈసారి వంద కోట్లకు మించిన బడ్జెట్‌తో రూపొందించడం జరిగింది. భారీ బడ్జెట్‌తో రూపొందుతున్న ఈ సినిమా షూటింగ్‌ ఇప్పటికే శరవేగంగా జరుగుతోంది. 2025లో సినిమాను ప్రేక్షకుల ముందుకు తీసుకు వస్తామని గతంలోనే రిషబ్‌ శెట్టి ప్రకటించాడు. ఇప్పుడు ఆ విషయమై మరింత స్పష్టత వచ్చింది. అక్టోబర్‌ 2, 2025న సినిమాను ప్రేక్షకుల ముందుకు తీసుకు రాబోతున్నట్లుగా అధికారికంగా ప్రకటన చేస్తూ ఒక పోస్టర్‌ను విడుదల చేయడం జరిగింది. భారీ అంచనాల నడుమ రూపొందుతున్న ఈ సినిమా విడుదల తేదీ రావడంతో అంతా ఆసక్తిగా ఎదురు చూస్తున్నారు.

ఈ మధ్య కాలంలో కాంతార సినిమా నుంచి అప్డేట్‌ రావడం లేదు అంటూ ఫ్యాన్స్ తీవ్ర ఆగ్రహం వ్యక్తం చేస్తున్న నేపథ్యంలో రిలీజ్ డేట్‌ను ప్రకటించడం ద్వారా అభిమానులకు పెద్ద సర్‌ప్రైజ్ ఇచ్చినట్లు అయింది. కేవలం కన్నడంలోనే కాకుండా పాన్‌ ఇండియా రేంజ్‌లో కాంతార 2 సినిమాను ప్రేక్షకుల ముందుకు తీసుకు రాబోతున్నారు. మొదటి పార్ట్‌ రూ.400 కోట్లకు పైగా వసూళ్లు సాధించిన నేపథ్యంలో ప్రీక్వెల్‌ మూవీకి కచ్చితంగా రూ.1000 కోట్ల వసూళ్లు నమోదు కావడం ఖాయం అనే నమ్మకం వ్యక్తం అవుతోంది. సోషల్‌ మీడియాలో ఈ సినిమాకు సంబంధించిన చర్చ అప్పుడే మొదలైంది.

సినిమా కోసం హాలీవుడ్‌ టెక్నీషియన్స్‌ను రంగంలోకి దించుతున్న రిషబ్‌ శెట్టి ఇదొక హాలీవుడ్‌ రేంజ్ మూవీగా ఉండబోతుంది అంటూ హామీ ఇచ్చాడు. సోషల్‌ మీడియాలో సినిమా ఎదురు చూస్తున్నాం అంటూ అన్ని భాషల ప్రేక్షకులు కామెంట్స్ చేస్తున్నారు. అన్ని వర్గాల వారిని ఆకట్టుకునే విధంగా కాంతార చాప్టర్‌ 1 సినిమా ఉంటుంది అంటూ అభిమానులు చాలా నమ్మకంగా చెబుతున్నారు. రిషబ్‌ శెట్టి పాత్ర ఎలా ఉంటుంది, కథలో కాంతార ను ఇంకా ఎలా చూపిస్తారు అనేది అందరిలో ఉన్న ప్రశ్నలు. కన్నడ సినిమాలకు పాన్‌ ఇండియా రేంజ్‌లో మంచి మార్కెట్‌ ఉంది. కనుక కాంతార 2 సినిమాకు భారీ వసూళ్లు నమోదు చేసే అవకాశాలు పుష్కలంగా ఉన్నాయి.