మెగాస్టార్‌తో బాలీవుడ్ సూప‌ర్‌స్టార్?

త‌న‌కు అవ‌కాశం వ‌స్తే ర‌జ‌నీకాంత్, క‌మ‌ల్ హాస‌న్ లాంటి దిగ్గ‌జ హీరోల‌తో క‌లిసి ప‌ని చేస్తాన‌ని అన్నారు స్టార్ హీరో సూర్య‌. కంగువ ప్రచారంలో భాగంగా ఆయ‌న ఈ వ్యాఖ్య‌లు చేసారు. ఒక‌వేళ ఇదే నిజ‌మైతే భార‌త‌దేశంలో ఇది అరుదైన ప్రాజెక్టుగా చ‌ర్చ‌ల్లోకి వ‌స్తుంది.

అదే విధంగా సౌత్ లో అగ్ర హీరోతో అక్ష‌య్ కుమార్ మ‌ల్టీస్టార‌ర్ కి వీలుంద‌ని గుస‌గుస వినిపిస్తోంది. ఇది వ‌ర్క‌వుటైతే పైన చెప్పుకున్న‌ట్టే అది కూడా స్పెష‌ల్ ప్రాజెక్ట్ అవుతుంది. అక్ష‌య్ ప్ర‌ధాన పాత్ర‌లో ఓ సినిమా తెర‌కెక్కించాల‌నుంద‌ని సింగం ఎగైన్ (సింగం 3) ద‌ర్శ‌కుడు రోహిత్ శెట్టి ప్ర‌క‌టించాడు గ‌నుక‌ అతడు సౌత్ - నార్త్ స్టార్ల క‌ల‌యిక‌లో ఓ మ‌ల్టీస్టార‌ర్ తీస్తార‌ని అంతా భావిస్తున్నారు. బాలీవుడ్ సూపర్ స్టార్ అక్ష‌య్ కుమార్ తో కామెడీ ఎంట‌ర్ టైన‌ర్‌కి ప్లాన్ చేస్తాన‌ని కూడా శెట్టి వ్యాఖ్యానించారు. ఒక‌వేళ ఇదే గ‌నుక‌ జ‌రిగితే ఈ చిత్రంలో ప్ర‌ముఖ సౌత్ స్టార్ న‌టించే అవ‌కాశం ఉంటుంద‌ని భావిస్తున్నారు. సింగం ఎగైన్ లో అక్ష‌య్ కామియోకి థియేట‌ర్ల‌లో గొప్ప స్పంద‌న వ‌చ్చింది. అదే క్ర‌మంలో రోహిత్ శెట్టి ప్ర‌క‌ట‌న ఆస‌క్తిని క‌లిగిస్తోంది. సింగం ఎగైన్ ఘ‌న‌విజ‌యం ఇచ్చిన కిక్కులో అత‌డు త‌దుప‌రి సినిమా గురించి తీవ్రంగా ఆలోచిస్తున్నాడు. సౌత్ స్టార్ ల‌తో క‌లుపుతూ అక్ష‌య్ కుమార్ ప్ర‌ధాన పాత్ర‌లో రోహిత్ శెట్టి సినిమా తెర‌కెక్కే అవ‌కాశం ఉంద‌ని ఇప్పుడు అభిమానులు గెస్ చేస్తున్నారు.

ఈ ఊహ నిజ‌మైతే సౌత్ నుంచి ఎవ‌రిని ఎంపిక చేస్తున్నాడు? అన్న‌ది ఆస‌క్తిని రేకెత్తిస్తోంది. సౌత్ లో మెగాస్టార్లు సూప‌ర్ స్టార్ల‌ను క‌లుపుతూ అక్షయ్ తో శెట్టి మ‌ల్టీస్టార‌ర్ ప్లాన్ చేస్తే బావుంటుంద‌ని కూడా అభిమానులు భావిస్తున్నారు. ఇంత‌కుముందు చెన్న‌య్ ఎక్స్ ప్రెస్ లాంటి అద్భుత‌మైన కామెడీ యాక్ష‌న్ ఎంట‌ర్ టైన‌ర్ ని తెర‌కెక్కించిన రోహిత్ శెట్టి ఈసారి కూడా సౌత్ నేప‌థ్యంలో ఒక నార్త్ స్టార్ ని క‌లుపుతూ అలాంటి జానర్ లో సినిమాని తీస్తాడ‌ని ఆశిస్తున్నారు. ఇటీవ‌ల ట్రెండ్ మారింది. సౌత్ - నార్త్ స్టార్ల‌ను క‌లుపుతూ సినిమాలు చేయ‌డం ద్వారా పాన్ ఇండియా మార్కెట్లో భారీ వ‌సూళ్ల‌కు ఆస్కారం ఉంది. అందువ‌ల్ల క‌చ్ఛితంగా రోహిత్ శెట్టి అలాంటి పెద్ద ప్ర‌య‌త్నం చేస్తాడ‌నే అంచ‌నా వేస్తున్నారు.