నానీకి జోడీగా బాలీవుడ్ బ్యూటీ?

'దసరా' సినిమాతో బ్లాక్ బస్టర్ హిట్ అందుకున్న నేచురల్ స్టార్ నాని.. అదే కాంబినేషన్ లో మరో మూవీ చేస్తున్న సంగతి తెలిసిందే. శ్రీకాంత్ ఓదెల దర్శకత్వం వహించనున్న ఈ పాన్ ఇండియా చిత్రాన్ని సుధాకర్ చెరుకూరి నిర్మిస్తున్నారు. ఇటీవలే #NaniOdela2 అనే వర్కింగ్ టైటిల్ తో, పూజా కార్యక్రమాలతో ఈ ప్రాజెక్ట్ ని గ్రాండ్ గా లాంచ్ చేసారు. త్వరలోనే రెగ్యులర్ షూట్ కు వెళ్లాలని మేకర్స్ ప్లాన్ చేస్తున్నారు. ఈలోగా సినిమాలో ప్రధాన నటీనటులను ఫైనలైజ్ చెయ్యాలని భావిస్తున్నారు. ఈ నేపథ్యంలో హీరోయిన్ కు సంబంధించి ఓ క్రేజీ రూమర్ ప్రస్తుతం సోషల్ మీడియాలో చక్కర్లు కొడుతోంది.

తెలంగాణ రూరల్ బ్యాక్ డ్రాప్ లో 'దసరా' సినిమాని రూపొందించిన డైరెక్టర్ శ్రీకాంత్ ఓదెల.. ఈసారి కూడా నానితో కలిసి తెలంగాణ బ్యాక్ డ్రాప్ కథనే చెప్పడానికి రెడీ అయ్యారని తెలుస్తోంది. కథంతా సికింద్రాబాద్ ఏరియాలో జరగనుందని టాక్. ఇక దీంట్లో కథానాయకుడి పాత్ర ఎంత పవర్ ఫుల్ గా ఉంటుందో, కథానాయిక పాత్రకు కూడా అంతే ప్రాధాన్యత ఉంటుందట. అందుకే నానీకి జోడీగా ఓ పాపులర్ హీరోయిన్ ను తీసుకురావాలని భావిస్తున్నారట. ఇందులో భాగంగా బాలీవుడ్ బ్యూటీ శ్రద్ధాకపూర్ ను పరిశీలిస్తున్నారని టాక్ వినిపిస్తోంది.

నాని ప్రస్తుతం పాన్ ఇండియా ఇమేజ్ కోసం తనవంతు ప్రయత్నం చేస్తున్నారు. తన సినిమాలను అన్ని ప్రధాన భారతీయ భాషల్లో విడుదల చేసి మార్కెట్ విస్తరించుకోవాలని చూస్తున్నారు. 'దసరా' 'హాయ్ నాన్న' 'సరిపోదా శనివారం' సినిమాలు హిట్ అయ్యాయి కానీ, నార్త్ సర్క్యూట్స్ లో మాత్రం పెద్దగా ప్రభావం చూపించలేకపోయాయి. ఈసారి ఎలాగైనా హిందీ మార్కెట్ ను పట్టుకోవాలని ఫిక్స్ అయిన నాని.. శ్రద్ధా కపూర్ అయితే #NaniOdela2 సినిమాకు ప్లస్ అవుతుందని భావిస్తున్నారట.

'దేవర' సినిమాతో టాలీవుడ్ లో ఎంట్రీ ఇచ్చిన జాన్వీ కపూర్.. శ్రీకాంత్ ఓదెల సినిమాలో నాని సరసన హీరోయిన్ గా నటించనుందని ఇటీవల వార్తలు వచ్చాయి. ఇది కేవలం రూమర్ మాత్రమేనని, బహుశా జాన్వీని తీసుకోవడం కోసం చర్చలు జరుగుతూ ఉండొచ్చని నాని క్లారిటీ ఇచ్చారు. ఇంతలోనే ఇప్పుడు శ్రద్ధా కపూర్ పేరు తెర మీదకు వచ్చింది. 'సాహో' సినిమాతో తెలుగు ప్రేక్షకులను ఆకట్టుకున్న శ్రద్ధా.. నాని మూవీకి గ్రీన్ సిగ్నల్ ఇస్తుందో లేదో వేచి చూడాలి.

శ్రీ లక్ష్మీ వెంకటేశ్వర సినిమాస్ (SLV సినిమాస్) బ్యానర్ లో భారీ బడ్జెట్ తో పాన్ ఇండియా స్థాయిలో #NaniOdela2 సినిమా రూపొందనుంది. లార్జర్ థెన్ లైఫ్ స్టోరీతో, గ్రిప్పింగ్ స్క్రీన్ ప్లేతో శ్రీకాంత్ ఓదెల ఈ సినిమాని తెరకెక్కిస్తున్నారని చిత్ర బృందం చెబుతోంది. మునుపెన్నడూ చూడని మాస్ క్యారెక్టర్ లో నానీని ప్రెజెంట్ చేయబోతున్నట్లు తెలుస్తోంది. ఈ మూవీకి అనిరుధ్ రవిచందర్ ను మ్యూజిక్ డైరెక్టర్ గా తీసుకున్నట్లు టాక్. త్వరలో ఈ చిత్రానికి సంబంధించిన అన్ని వివరాలు వెల్లడికానున్నాయి.