సీజన్‌ 3 తో సమంత రీ ఎంట్రీ ఇవ్వనుందా?

సౌత్ సినిమాలతో ఇండస్ట్రీలో అడుగు పెట్టి నార్త్ లో కూడా మంచి గుర్తింపును, అభిమానులను సొంతం చేసుకున్న ముద్దుగుమ్మ సమంత. ఈ అమ్మడు ప్రస్తుతం అధికారికంగా బ్రేక్ లో ఉన్న విషయం తెల్సిందే. తన ఆరోగ్యం మరియు మానసిక పరిస్థితుల నేపథ్యంలో ఏడాది పాటు బ్రేక్ తీసుకుంటున్నట్లుగా అధికారికంగా సమంత ప్రకటించిన విషయం తెల్సిందే.

సమంత వచ్చే ఏడాది ఆరంభంలోనే సమంత షూటింగ్స్ షురూ అయ్యే అవకాశాలు కనిపిస్తున్నాయి. ఆ మధ్య సమంత తెలుగు సినిమాలకు సంబంధించిన చర్చలు జరిగాయి. కానీ ఇప్పుడు వాటికి సంబంధించిన ఎలాంటి హడావుడి లేదు. దాంతో సమంత రీ ఎంట్రీ హిందీ సినిమాలు లేదా సిరీస్ తో ఉంటుందని మీడియా వర్గాల ద్వారా సమాచారం అందుతోంది.

బాలీవుడ్‌ వర్గాల ద్వారా అందుతున్న అనధికారిక సమాచారం ప్రకారం ఫ్యామిలీ మ్యాన్ వెబ్‌ సిరీస్ సీజన్ 3 తో సమంత రీ ఎంట్రీ ఇవ్వాలని భావిస్తోందట. హిందీ ప్రేక్షకులు సమంత ను ఫ్యామిలీ మ్యాన్ సీజన్ 2 తో ఆధరించారు. ఇప్పుడు సమంత తన కెరీర్‌ ను బాలీవుడ్‌ లో ప్లాన్ చేసుకుంటూ ఉంది. అందుకే హిందీ సిరీస్ లో నటించాలని నిర్ణయించుకుందట.

కొన్ని రోజుల క్రితం ప్రముఖ నటుడు ఫ్యామిలీ మ్యాన్ కొత్త సిరీస్ గురించి అప్డేట్ ఇచ్చాడు. సీజన్ 2 ఎక్కడ అయితే ముగిసిందో అక్కడే మళ్లీ ప్రారంభం అవ్వబోతుంది అంటూ హింట్‌ ఇచ్చాడు. అంటే కచ్చితంగా కొత్త సీజన్ లో కూడా సమంత ఉంటుంది అన్నట్లుగా ఆయన మాటలను బట్టి అర్థం అవుతోంది.

సమంత సౌత్ లో నటించేందుకు ఆసక్తి చూపించాలే కానీ చాలా సినిమాలు, సిరీస్ లు ఆమె ముందుకు వచ్చే అవకాశాలు ఉన్నాయి. పెద్ద మొత్తంలో ఆమెకి పారితోషికం ఇచ్చి మరీ తెలుగు నిర్మాతలు ఆమెతో సినిమాలు చేసేందుకు ఆసక్తిగా ఉన్నారు. కానీ సామ్‌ మాత్రం బాలీవుడ్‌ పై ఆసక్తి కనబర్చుతున్నట్లుగా తెలుస్తోంది. ఇటీవల హిందీ టీవీ షోకి హాజరు అవ్వడంకు కూడా అదే కారణం అంటూ కొందరు విశ్లేషిస్తున్నారు.