సంక్రాంతికి వస్తున్నాం: ఫస్ట్ వీక్ లెక్కతో పర్ఫెక్ట్ బ్లాస్ట్

విక్టరీ వెంకటేష్, అనిల్ రావిపూడి కాంబినేషన్‌లో వచ్చిన సంక్రాంతికి వస్తున్నాం సినిమా సంక్రాంతి పండుగను పర్ఫెక్ట్ గా క్యాష్ చేసుకోని బాక్సాఫీస్ వద్ద సంచలనాలు సృష్టిస్తోంది. పండుగ వాతావరణంలో ప్రేక్షకులను థియేటర్లకు రప్పించి, అందరి అంచనాలను మించి ఈ సినిమా రికార్డులను తిరగరాస్తోంది. పండుగ తరువాత కూడా అదే తరహాలో రికార్డులు బ్లాస్ట్ చేయడం విశేషం. కంటెంగ్ ఆడియెన్స్ కు కనెక్ట్ అయితే ఫలితం ఆ రేంజ్ లో ఉంటుందో ఈ సినిమా మరోసారి రుజువు చేసింది.

తొలి వారంలోనే ఈ చిత్రం సరికొత్త రికార్డును నెలకొల్పింది. 7 రోజుల్లోనే ప్రపంచవ్యాప్తంగా రూ. 203 కోట్లకు పైగా గ్రాస్ కలెక్షన్లు రాబట్టిన ఈ సినిమా, పండుగ సీజన్‌లో అత్యధిక వసూళ్లు సాధించిన ప్రాంతీయ తెలుగు చిత్రంగా నిలిచింది. దీనితో తెలుగు సినిమా చరిత్రలో పండుగ సీజన్‌లో సాధించిన బిగ్ సక్సెస్ గా ఈ సినిమా పేరొందింది.

అమెరికాలో ఈ సినిమా 2.3 మిలియన్ డాలర్లకు పైగా వసూళ్లు సాధించి, వెంకటేష్, అనిల్ రావిపూడి, శ్రీ వెంకటేశ్వర క్రియేషన్స్ కాంబినేషన్‌లో వచ్చిన సినిమాల కలెక్షన్ రికార్డులను అధిగమించింది. ఈ హ్యాట్రిక్ కాంబో మరోసారి తమ సత్తాను చాటుకుంది. ఇంతకుముందు వచ్చిన F2 - F3 సినిమాలు కూడా మంచి లాభాలను అందించాయి.

అనిల్ రావిపూడి మార్క్ వినోదంతో కూడిన కథనంతో పాటు వెంకటేష్ పాత్రలో చూపించిన అద్భుతమైన నటన ఈ సినిమాకు ప్రధాన ఆకర్షణలుగా నిలిచాయి. పండుగ సందడి, ఫ్యామిలీ ఆడియెన్స్‌ను ఆకట్టుకునే కంటెంట్ సినిమాకు మరింత బలాన్ని ఇచ్చాయి. దిల్ రాజు సమర్పణలో, శిరీష్ నిర్మాణంలో శ్రీ వెంకటేశ్వర క్రియేషన్స్ పతాకంపై రూపొందిన ఈ సినిమా, ప్రేక్షకుల నుంచి పొందుతున్న స్పందనను చూస్తే, రాబోయే రోజుల్లో మరిన్ని రికార్డులను తిరగరాయనుంది.

సంక్రాంతి సెలవుల్లో ప్రేక్షకులను అలరించి, కుటుంబ సమేతంగా థియేటర్లకు రప్పించిన ఈ చిత్రం పండుగ సీజన్‌లో తెలుగు బాక్సాఫీస్ కు సరికొత్త బూస్ట్ ను ఇచ్చింది. అలాగే తెలుజి రీజినల్ లాంగ్వేజ్ లో అత్యధిక కలెక్షన్స్ అందుకున్న సినిమాగా టాప్ లో నిలిచింది. ఇంతకుముందు ఈ రికార్డ్ లో అల్లు అర్జున్ అల.. వైకుంఠపురములో నెంబర్ వన్ స్థానంలో 180 కోట్లతో ఉండగా ఇప్పుడు సంక్రాంతికి వస్తున్నాం సినిమా ఆ లెక్కను దాటి 200 కోట్ల గ్రాస్ ను దాటడం విశేషం. ఇదే జోరు మరో వారం కొనసాగితే 300 కోట్ల మార్క్ ను కూడా టచ్ చేస్తుందని చెప్పవచ్చు.