ట్రైల‌ర్ టాక్: కంత్రీ 'సైతాన్' వికృత ఆట‌

హార‌ర్ థ్రిల్ల‌ర్ జాన‌ర్ లో చంద్ర‌ముఖి, కాంచ‌న ఫ్రాంఛైజీలు గొప్ప విజ‌య‌వంత‌మైన ఫ్రాంఛైజీలుగా ప్ర‌జ‌ల‌కు తెలుసు. అయితే ఇవ‌న్నీ దెయ్యాలు ఆత్మ‌ల చుట్టూ తిరిగే క‌థ‌లు. ఇవే అంశాల‌ను ఎంపిక చేసుకున్నా కానీ వాట‌న్నిటి కంటే భిన్నంగా ఒక థ్రిల్ల‌ర్ స్టోరీని ఎలా డ్రైవ్ చేయాలి? అనేదానికి ఇదిగో ఇప్పుడు వ‌స్తున్న సైతాన్ ఒక ఎగ్జాంపుల్. తాజాగా సైకలాజికల్ థ్రిల్లర్ మూవీ 'సైతాన్' ట్రైలర్ విడుద‌లైంది. ట్రైల‌ర్ ఇన్ స్టంట్ హిట్. అజయ్ దేవగన్, జ్యోతిక, మాధవన్ లాంటి టాప్ స్టార్స్ నటించిన ఈ చిత్రం మంచి చెడుల మధ్య జ‌రిగే పోరాటం.. చెడుపై మంచి గెలుపు వంటి అంశాల‌తో తెర‌కెక్కింది. ర‌క‌ర‌కాల మ‌లుపుల‌తో సాగుతున్న ఈ థ్రిల్ల‌ర్ మూవీలో మ్యాడీ పాత్ర చాలా ప్ర‌త్యేకంగా ఆక‌ట్టుకుంటోంది.

మాధ‌వ‌న్ ఒక సైతాన్. అత‌డు దేవ‌గ‌న్ కుమార్తెను వ‌శ‌ప‌రుచుకుంటాడు. యువ‌తిపై వ‌శీక‌ర‌ణ మంత్రాన్ని ప్ర‌యోగిస్తాడు. అనూహ్యంగా ఆ యువ‌తి ఇంట్లోనే అత‌డు సాగించే భ‌యాన‌క‌మైన ఆట ఏమిట‌న్న‌ది ఈ ట్రైల‌ర్ లో చూడొచ్చు. ట్రైల‌ర్ ఆద్యంతం ర‌క్తి క‌ట్టిస్తోంది. కుమార్తె వ‌ల్ల గంద‌ర‌గోళంలో ప‌డే అన్ హ్యాపీ క‌పుల్ గా దేవగన్-జ్యోతిక నటించారు. మాధవన్ పాత్ర ఒక మంత్ర‌గాడి కుయుక్తుల‌తో సాగుతుంది. అత‌డు చూడ‌టానికి అధునాత‌నంగా క‌నిపించినా కానీ వ‌శీక‌ర‌ణ విద్య‌లో ఆరితేరిన వాడిగా క‌నిపిస్తున్నాడు.

అత‌డు కుమార్తెను అడ్డుపెట్టుకుని దంప‌తుల‌ను సాధించాల‌నుకున్నాడా? వారి వ‌ల్ల జ‌రిగిన పాపం ఏమిటి? అన్న‌ది ఎక్క‌డా రివీల్ కాలేదు. సైతాన్ ఉద్దేశ్యాలు రహస్యం..అతడు ఆ టీనేజీ యువ‌తిని ఒక వికృత‌మైన‌ ఆటలో పావుగా ఉపయోగించుకున్నాడు. ఆద‌ర్శ‌ దంప‌తుల జీవితాల‌ను తారుమారు చేస్తాడు. వారు క్ష‌ణ‌క్ష‌ణం ఉనికి కోసం భ‌య‌ప‌డే ప‌రిస్థితి వ‌స్తుంది. ట్రైలర్ ఆద్యంతం సీట్ అంచుపైకి జారిపోయేంత‌టి థ్రిల్లింగ్ మూమెంట్స్‌తో ఆక‌ట్టుకుంది. వీక్షకులు సైతాన్ అంతిమ లక్ష్యం ఏమిటో ముందే ఊహించగలరు. గంభీరమైన వాతావరణం.. వెంటాడే సంగీతం.. దేవగన్ -జ్యోతిక‌లో టెన్ష‌న్ వాతావ‌ర‌ణం.. విలాసంగా న‌వ్వుతూ మాధ‌వ‌న్ ఆడే ఆట ఇదంతా ర‌క్తి క‌ట్టిస్తుంది. ట్రైల‌ర్ తోనే ఈ సినిమా ఎంత గ్రిప్పింగ్ గా తెర‌కెక్కిందో అర్థ‌మ‌వుతోంది.

ఈ సినిమా ఒక రీమేక్ చిత్రం. గుజరాతీ చిత్రం 'వాష్' ఆధారంగా రూపొందింది. 'క్వీన్' ఫేం వికాస్ బహ్ల్ దర్శకత్వం వహించారు. చిత్రం 8 మార్చి 2024న అంత‌ర్జాతీయ‌ మ‌హిళా దినోత్స‌వ కానుక‌గా విడుద‌ల‌వుతోంది.