రాజమౌళికి 1000 కోట్ల ప్రెజర్.. అందుకే తోడుగా అతను..

సూపర్‌స్టార్ మహేష్ బాబు, దర్శకధీరుడు రాజమౌళి కాంబినేషన్‌లో తెరకెక్కబోయే మెగా పాన్‌ వరల్డ్‌ ప్రాజెక్ట్‌ SSMB29 గురించి ప్రతిరోజూ కొత్త విషయాలు వెలుగులోకి వస్తున్నాయి. లేటెస్ట్‌గా ఈ సినిమా ఎగ్జిక్యూటివ్ ప్రొడ్యూసర్‌గా శోభు యార్లగడ్డ వ్యవహరించనున్నట్లు సమాచారం. రాజమౌళి-శోభు కలయికకు ఉన్న బలాన్ని బాహుబలి సిరీస్‌ ద్వారా సినీ ప్రపంచమంతా చూసింది. ఇప్పుడు అదే మళ్లీ సూపర్‌స్టార్ సినిమాకు పెద్ద ప్లస్‌ అవుతుందని అంచనా వేస్తున్నారు.

శోభు యార్లగడ్డ రాజమౌళి చిత్రాల మార్కెటింగ్‌ డైరెక్షన్‌లో అద్భుతమైన అనుభవాన్ని కలిగి ఉన్నారు. గతంలో మర్యాదరామన్న, బాహుబలి సినిమాలకు ఆయనే నిర్మాత. ఇక RRR వంటి చిత్రాలకు ఆయన ఇచ్చిన మద్దతు సినిమాలను ప్రపంచస్థాయిలో గుర్తింపుకు తీసుకెళ్లింది. ఆస్కార్ నామినేషన్స్ వరకు వెళ్లే ప్రాసెస్‌లో శోభు కీలక పాత్ర పోషించినట్లు సినీ వర్గాలు చెబుతున్నాయి. ఇక SSMB29 భారీ బడ్జెట్‌, అంతర్జాతీయ స్థాయి ప్రాజెక్ట్ కావడంతో రాజమౌళి శోభును ప్రత్యేకంగా తీసుకోవడం అవసరమైందని టాక్.

SSMB29 సినిమాను KL నారాయణ 'జై దుర్గా ఆర్ట్స్' పతాకంపై నిర్మిస్తున్నారు. అయితే ఈ ప్రాజెక్ట్‌కు వెయ్యి కోట్లకు పైగా బడ్జెట్ పెట్టనున్నారని టాక్. అంత పెద్ద బడ్జెట్‌ను మేనేజ్‌ చేయడంలో అనుభవజ్ఞుడు కావడం వల్లే శోభును ఈ ప్రాజెక్ట్‌కు తీసుకున్నారు. పైగా, ఈ సినిమా పాన్ వరల్డ్‌గా విడుదల కానుండటంతో మార్కెటింగ్, డిస్ట్రిబ్యూషన్ వ్యూహాలు కీలకంగా మారనున్నాయి. ఆ బాధ్యతలను శోభు సమర్థంగా నిర్వహించగలరని రాజమౌళి నమ్మకంగా ఉన్నట్లు తెలుస్తోంది.

ప్రస్తుతం సినిమా ప్రీ ప్రొడక్షన్ పనులు శరవేగంగా జరుగుతున్నాయి. కేవలం కథ మాత్రమే కాదు, ఇందులో ఉండే యాక్షన్ సీక్వెన్సులు, వీఎఫ్ఎక్స్ వర్క్ అంతా ప్రపంచ స్థాయిలో ఉండాలని రాజమౌళి లక్ష్యంగా పెట్టుకున్నారు. ఈ ప్రాజెక్ట్‌ను ప్యాక్ చేసి ప్రేక్షకులకు అద్భుతమైన అనుభవంగా అందించడంలో శోభు మార్కెటింగ్ పట్ల ప్రత్యేకంగా శ్రద్ధ తీసుకుంటున్నట్లు సమాచారం.

ఇక సినిమా అప్డేట్ కోసం మహేష్ బాబు అభిమానులు చాలా కాలంగా వెయిట్ చేస్తున్నారు. కానీ జక్కన్న మాత్రం టైమ్ ఎక్కువగానే తీసికుంటున్నాడు. సినిమాపై అంచనాలు హై రేంజ్ లో ఉండడంతో ఆ అంచనాలను అధిగమించేందుకు సకల సన్నాహాలు జరుగుతున్నాయి. SSMB29 ప్రాజెక్ట్‌పై బాలీవుడ్ ఇండస్ట్రీలో కూడా అంచనాలు భారీగా పెరిగాయి. ఇక ఆఫ్రికా అడవుల నేపథ్యంలో ఈ సినిమా ఉండనుంది. ఇప్పటికే లొకేషన్స్ పై రెక్కీ నిర్వహించిన దర్శకుడు త్వరలోనే ప్రత్యేకంగా వర్క్ షాప్ తో అసలు పనులు స్టార్ట్ చేయనున్నారు.